Sacerdötikunapa cuartunkuna
42
Tsaypitanami tsay runa norti kaqlächo kaykaq jatun patiuman pushamar chätsimarqan sacerdötikunapä cuartukuna kanqan kaqman. Tsay cuartukunaqa templupa qepancho kaykaq patiu kaqläpa y tsaycho jatun wayi kaqläpami rikararqan. 2 Cuartukunapa largunta tupuptinmi pitsqa chunka (50) metru karqan. Anchunnami ishkay chunka pitsqa (25) metru karqan.3 Tsay cuartukunapa waqtanchömi templu qepancho kaykaq chunka metru anchu patiu karqan. Frentinchönami rumiwan empedrashqa jatun patiu karqan.
Tsay cuartukunaqa kimsa grädaman qatashqami kayarqan. 4 Punkunkunaqa norti kaqläpami rikaräyarqan. Tsayläpami päsararqan juk pasadïsu pitsqa metru anchuyuq y pitsqa chunka (50) metru larguyuq.
5 Ultimu grädacho kaykaq cuartukunaqa mas takshami karqan. Chawpi grädacho kaykaq cuartukunami itsanqa mas jatullan karqan. Gräda qallanancho kaykaq cuartukunanami mas jatun karqan. 6 Cuartukuna kimsa pïsu kaykarpis manami patiucho kaq cuartukunanötsu paradoryuq karqan. Tsaymi cada pïsucho cuartukuna urapita janayaq mas taksha karqan.
7-8 Tsay cuartukunapa largunmi karqan ishkay chunka pitsqa (25) metru. Punku ñöpancho pirqanami karqan ishkay chunka pitsqa (25) metru. Frenticho kaq pasadïsunami karqan pitsqa chunka (50) metru. 9 Jatun patiupita cuartukunaman yaykuyänanpä punkunami rupay yarqamunan kaqlächo karqan.
10 Tsaynöllami sur kaqläpapis cuartukuna karqan. Tsay cuartukunaqa templu qepancho kaykaq wayi frentincho y templu qepancho kaykaq patiu frentinchömi karqan. Tsay wayipa y patiupa murällan waqtanchömi tsay cuartukuna karqan.
11 Norti kaqlächo kaykaq cuartukunapa frentincho pasadïsu kanqannöllami sur kaqlä cuartukunapa frentinchöpis pasadïsu karqan. Tsaynöllami sur kaqlä cuartukunapa largunpis, anchunpis, yarqukunanpis y punkunkunapis norti kaqlä cuartukunapanö karqan.
12 Sur kaqlä cuartukunaman yaykuyänanpämi pasadïsu qallaykunancho punku karqan. Tsay punkuqa rupay yarqamunan kaqläpami rikararqan.
13 Pushamaq runami nimarqan: “Norti kaqlächo y sur kaqlächo kaykaq cuartukuna sagrädumi kaykan. Tsay cuartukunachömi Tayta Diospa ñöpancho sirviq sacerdötikunaa mas sagrädu kaq ofrendakunata mikuyanqa. Tsay cuartukuna sagrädu kaptinmi tsayman churayanqa tsaki mikuy ofrendakunata, purificatsina sacrificiukunata y consagratsina sacrificiukunatapis.
14 “Templucho kaykanqanpita jatun patiuman manarä yarqurmi latsapankunata sacerdötikuna trukakuyanqa. Tsaynö trukakuyanqa templucho jatikuyanqan latsapa sagrädu kaptinmi. Juk latsapata trukakuskirrämi runakunawan tinkuyänanpä yarqayämunqa”.
15 Templuta y tsaycho kaykaq patiukunata tupur ushaskirnami rupay yarqamunan kaqlä punkupa tsay runa yarqatsimarqan. Nirkurmi murällatana jiruruypa tupurqan. 16 Aptaraykanqan värawan rupay yarqamunan kaqläpa tupuptinmi ishkay pachak pitsqa chunka (250) metru karqan. 17 Norti kaqläpa tupuptinmi ishkay pachak pitsqa chunka (250) metru karqan. 18 Sur kaqläpa tupuptinmi ishkay pachak pitsqa chunka (250) metru karqan. 19 Tsaypita rupay jeqanan kaqläpa tupuptinmi ishkay pachak pitsqa chunka (250) metru karqan. 20 Tsaymi murällapa largun y anchunpis ishkay pachak pitsqa chunka (250) metru karqan. Tsay murällami rakirqan sagrädu kaqpita mana sagrädu kaqta.