3 Nirkurmi pushamaq runa ruri kaq cuartuman yaykurqan. Tsay punkucho ishkanlä pirqakunata tupuptinmi juk metru anchun karqan. Punkupa anchunta tupuptinnami kimsa metru karqan. Punkupa cada ñöpancho kaykaq pirqakunapa largunta tupuptinmi kimsa metru pullan karqan. 4 Ruri kaq cuartupa cada lädunta tupuptinmi largunpis anchunpis chunka metru karqan. Nirkurmi pushamaq runa nimarqan: “Kay cuartuqa Lugar Santïsimumi”.

5 Tsaypitanami tsay runa tupurqan templupa pirqanta. Tupuptinmi anchun kimsa metru karqan. Tsaynöllami jiruruypa templuman laqaraq cuartukuna karqan. Tsay cuartukunapa anchunmi ishkay metru karqan. 6 Cuartukunaqa kimsa chunkami (30) karqan. Tsay cuartukuna ishkay altusyuqmi karqan. Altuskuna kayänanpämi templu waqtan pirqacho patakkuna karqan. Tsay patakkunachömi altuscho kaq cuartukunapa vïgankuna churararqan. Tsaymi vïga churananpä templuta uchkurqannatsu.

7 Altuscho y janan kaq altuscho cuartukunaqa patsacho cuartukunapita mas anchumi karqan. Altusman y janan kaq altusman yarkuyänanpämi jiruruypa escalëra karqan.

8 Tsaynöllami templu waqtanpa kimsa metru altu cimientu tumarämuqta rikarqä. Tsay cimientu jananchömi templu waqtacho kaykaq cuartukuna karqan.

9 Cuartukunapa pirqanpa anchunmi ishkay metru pullan karqan. Tsaymi tsay cuartukunapita 10 hasta sacerdötikunapa cuartunkunayaq chunka metru libri karqan. Sacerdötikunapa cuartunkunaqa templu waqtanpa jiruruypami karqan. 11 Templucho laqaraykaq cuartukunapa punkunkunami jäkuq kaqläpa karqan. Jukaq punkumi rikararqan norti kaqläpa y jukaq punkunami rikararqan sur kaqläpa. Templu waqtanpa tumarämuq jäkuq kaqpa anchunmi ishkay metru pullan karqan.

12 Templu qepanchömi jatunkaray wayi karqan. Tsay wayi rikararqan frentincho kaykaq patiu kaqläpami. Tsay wayipa anchunmi kimsa chunka pitsqa (35) metru karqan. Largunnami chusku chunka pitsqa (45) metru karqan. Wayipa pirqanpa anchunmi ishkay metru pullan karqan.

13 Templuta tupuptinmi pitsqa chunka (50) metru largun karqan. Tsaynöllami templu qepancho kaykaq patiuta, wayita y pirqata tupuptin pitsqa chunka (50) metru largun karqan. 14 Templupa anchunta y patiupa anchunta tupuptinmi pitsqa chunka (50) metru karqan. 15 Nirkurnami tupurqan templu qepancho kaykaq jatun wayita. Tsay wayiqa frentincho kaykaq patiumanmi rikararqan. Tupuptinmi tsay wayi ishkanlä cuartuntin pitsqa chunka (50) metru karqan.

Templu rurin y yaykunan 16 entablashqami karqan. Tsaynöllami marcunkunapis, rëjashqa ventänakunapis y llapan paredkunapis patsapita ventänayaq y ventänapita janaman entablashqa karqan. 17 Mas ruri kaq cuartupa y wakin cuartukunapa llapan pirqankunachöpis 18 querubinkuna y palmërakunami dibujashqa karqan. Juk querubín y juk palmëra, juk querubín y juk palmërami tumaypa dibujashqa karqan.

Tsay querubinkunaqa ishkay qaqllayuqmi karqan. 19 Jukaq qaqllanqa runapa qaqllan niraqmi karqan. Tsay qaqllanmi rikaraykarqan jukaq palmëra kaqpa. Jukaq qaqllannami leonpa qaqllan niraq karqan. Tsay qaqllannami rikaraykarqan jukaqlä palmëra kaqläpa. Entëru templuchömi tsaynö dibujashqa tumaypa karqan. 20 Querubinkuna y palmërakunami templupa entëru pirqancho patsapita punku jananyaq dibujashqa karqan.

21 Templuman yaykuna marcunkunami chusku esquïnayuq karqan.

Lugar Santïsimuman yaykunachömi 22 qerupita rurashqa altar karqan. Altunmi juk metru pullan karqan. Largunpis y anchunpis juk metrumi karqan. Tsay altarpa esquïnankuna, janankuna y jamaräkunanpis qerupita rurashqami karqan. Tsaymi pushamaq runa nimarqan: “Kayqa Tayta Diospa ñöpancho kaykaq mësami”.

23 Lugar Santuman y Lugar Santïsimuman yaykunapis punkuyuqmi karqan. 24 Cada punku ishkay höjayuq karmi ishkanläman kichana karqan. 25 Querubinkuna y palmërakuna pirqakunacho dibujaraqnöllami tsay punkukunachöpis dibujashqa karqan.

Templuman yaykuna punkuqa tablawanmi qatashqa karqan.

26 Yaykuna cuartukunapis ventänayuqmi karqan. Tsaychömi palmërakuna dibujashqa karqan.

Templuman laqaraykaq cuartukunaqa qerupita rejïllayuqmi karqan.