2 Israel nacionman revelacioncho chätsimarmi altunnin jirkaman Tayta Dios churamarqan. Tsaypita sur kaqläpa rikachakurmi rikarqä markanörä atska wayikuna kaykaqta.^† 3 Tsayman chätsimaptinmi broncipita rurashqa runa niraqta rikarqä. Lïnupita rurashqa cordelnin y tupukuna väran aptashqami^† punku ñöpancho ichiraykarqan. 4 Tsay runami nimarqan: “Runapa tsurin, ninqäkunata tantiyakunaykipä shumaq wiyamay. Llapanta rikatsinäpämi Tayta Dios kayman apamushushqayki. Llapan rikanqaykita Israel runakunata willanki”.

5 Tsaymi templu^† patiuta tumaypa murälla kaykaqta rikarqä. Tsay runa tupunanpä aptaraykanqan väranqa kimsa metrumi karqan. Tsaywan murällapa anchunta tupuptinmi kimsa metru karqan. Altunta tupuptinnami kimsa metru karqan.

6 Nirkurnami aywarqan rupay yarqamunan kaqlä murälla punkumanna. Punkuman yaykuna grädapa yarkuskirmi pirqapa anchunta tupurqan. Tupuptinmi kimsa metru karqan. 7-10 Punkupa yaykuskirmi cadalächo kimsa cuartukunata rikarqä. Llapanpis tsay cuartukuna kimsa metru anchu y kimsa metru largumi karqan. Cuartukunata rakiq pirqapa anchunmi ishkay metru pullan karqan. Tsay soqta cuartukunata päsaskiptinmi jatun cuartu kaykarqan. Tsay cuartupa anchunmi chusku metru karqan. Tsay cuartupita templuman yaykunanchömi juk metru anchu pirqa karqan. Taksha cuartukunapita jatun cuartuman rakiq pirqapa anchunmi kimsa metru karqan.

11 Punkupa anchunmi soqta metru pullan karqan. Punku yaykuna pirqata tupuptinnami anchun pitsqa metru karqan. 12 Cada taksha cuartu yaykunachömi pullan metru altu pirqa karqan. Cuartukunapa anchunpis largunpis kimsa metrumi karqan. 13 Juk cuartupa ruri kuchunpita frentin kaq cuartupa ruri kuchunyaq tupuptinmi chunka ishkay metru pullan karqan. 14 Jatun cuartupa y wakin cuartukunapa anchunta entërupa tupuptinmi soqta chunka metru karqan. 15 Yaykuna punkupita ruri kaq punkuyaq pasadïsuta tupuptinmi ishkay chunka pitsqa metru largun karqan. 16 Cada taksha cuartukunapis ventänayuqmi karqan. Ruripanami rëjakuna karqan. Tsaynöllami jatun cuartupapis ventänankuna karqan. Rakiq pirqankunachönami dibujashqa palmërakuna karqan.

17 Tsaypitanami tsay runa pushamarqan jatun kaq patiuman. Tsaychömi patiu ñöpan kaqpa rikarqä kimsa chunka (30) cuartukunata. Tsay patiuqa läja rumikunawanmi kuchu kuchu empedrashqa karqan. 18 Altar kanqan patiupita mas jawachömi karqan. Anchunmi ishkay chunka pitsqa (25) metru karqan.

19 Yaykuna punkupa frentinchömi juk punkupis karqan. Tsay punkuyaq tupuptinmi pitsqa chunka (50) metru karqan. Tsaynömi karqan rupay yarqamunan kaqlä punkucho. Nirkurnami rikarqä norti kaqlä punku imanö kanqantapis.

20 Norti kaqläpapis patiuman yaykuna punku karqanmi. Tsay punkutapis largunta y anchuntami tupurqan. 21 Pasadïsupa cada ñöpanchömi kimsa cuartukuna karqan. Rupay yarqamunan kaqläpa kaykaq punkuchönöllami cuartukunata rakiq pirqa y jatun kaq cuartupis karqan. Tupuptin largun karqan ishkay chunka pitsqa (25) metru y anchunnami karqan chunka ishkay metru pullan. 22 Jatun cuartupis, ventänakunapis, palmëra dibüjunkunapis rupay yarqamunan kaqlä punkucho kaykanqannöllami karqan. Tsayman yaykunanpäpis qanchis grädakunami karqan. Tsaychöpis patiu kaq ñöpanpami jatun cuartu karqan. 23 Rupay yarqamunan kaqlä punkupa frentincho kaykanqannömi norti kaqlä punku frentinchöpis ruri kaq patiuman yaykunapä juk punku kaykarqan. Tsay punkuyaq tupuptinmi pitsqa chunka (50) metru karqan.

24 Tsaypitanami sur kaqlächo punkuman pushamarqan. Llapanta tupuptinmi wakin kaq punkukunanölla karqan. 25 Cuartunkunapa ventänankunapis wakin kaqpanöllami karqan. Largunta tupuptinmi pitsqa chunka (50) metru karqan. Anchunta tupuptinnami chunka ishkay metru pullan karqan. 26 Witsänanpäpis qanchis grädakunami karqan. Jatun cuartupis patiu kaqläpami karqan. Rakiq pirqankunachöpis ishkanlächömi palmërakuna dibujashqa karqan. 27 Sur kaqlächo kaykaq punku yaykunapa frentinchöpis ruri kaq patiuman yaykuyänanpä punku karqanmi. Juk punkupita jukaq punkuyaq tupuptinmi pitsqa chunka (50) metru karqan.

28 Tsaypitanami pushamarqan ruri kaq patiuman yaykuna juk punkuman. Tsay punkuqa sur kaqlächömi karqan. Tsay punkuta tupuptinmi wakin kaq punkukuna tamäñulla karqan. 29 Taksha cuartunkunapis, rakiq pirqakunapis y jatun cuartu alarpis wakin punkukunacho kaykaq tamäñullami karqan. Ventänankunapis sawan kaqläpami karqan. Tupuptin largun ishkay chunka pitsqa (25) metru y anchunnami chunka ishkay metru pullan karqan. 30 Ñöpankunacho cuartukunata tupuptinmi largun karqan chunka ishkay metru pullan y anchunnami karqan ishkay metru pullan. 31 Cuartukunata rakiq pirqankunachöpis palmërakunami dibujashqa kaykarqan. Yarkukuyänan grädankunapis puwaqmi karqan. Punkuqa ura kaq patiumanmi rikaraykarqan.

32 Nirkurmi rupay yarqamunan kaqlä ruri kaq patiu punkuman pushamarqan. Tsaycho tupuptinmi wakin kaq punku tamäñulla karqan. 33 Taksha cuartunkuna, rakiq pirqankuna y jatun cuartupis tsay tamäñullami karqan. Patiu kaqläpami ventänankunapis karqan. Tupuptinmi largun ishkay chunka pitsqa (25) metru karqan. Anchunnami chunka ishkay metru pullan karqan. 34 Rakiq pirqankunachöpis palmërakunami dibujashqa karqan. Yarkukuyänan grädankunapis puwaqmi karqan. Punku yaykunaqa ura kaq patiumanmi rikaraykarqan.

35 Tsaypitanami pushamarqan norti kaqlä punkuman. Tsay punkuta tupuptinmi wakin kaq tamäñulla karqan. 36 Taksha cuartunkuna, rakiq pirqankuna, jatun cuartu y llapan ventänankunapis tsay tamäñullami karqan. Tupuptinmi ishkay chunka pitsqa (25) metru largun karqan. Anchunnami chunka ishkay metru pullan karqan. 37 Cuartukunata rakiq pirqankunachöpis palmërakunami dibujashqa karqan. Witsäkuyänan grädankunapis puwaqmi karqan. Punku yaykunaqa ura kaq patiumanmi rikaraykarqan.

38 Tsay punku yaykunachömi juk cuartu karqan. Tsaychömi sacrificiupä apayämunqan uywakunata pishtaskir mayllayaq. 39 Tsay cuartucho pishtapakuyänanpämi jukaq ñöpancho ishkay y jukaqlächo ishkay mësakuna karqan. Tsaychömi pishtayaq rupatsina sacrificiupä, purificatsina sacrificiupä y consagratsina sacrificiupäpis. 40 Tsay cuartu waqtanchöpis norti kaqlä punkuman gräda witsaq ñöpanchömi ishkay mësakuna karqan. Tsaynöllami jukaqlächöpis ishkay mësakuna karqan. 41 Tsaymi ruri cuartucho chusku mësakuna y waqta punku ñöpancho chusku mësakuna karqan. Llapan mësakunami puwaqnintin kayarqan. Tsay mësakuna jananchömi sacrificiupä uywakunata pishtayaq. 42 Pishtapakuyänan manëjukunata churakuyänanpä chusku mësakunami rumipita karqan. Tsay mësakunapa largunpis y anchunpis qanchis chunka pitsqa (75) centïmetrumi karqan. Altunnami pullan metru karqan. 43 Cuartupa ruri pirqankunachömi ganchunkuna cuarta masllan jiruruypa jatiräyarqan. Mësakunachönami pishtayanqan uywakunapa aytsan churaraykarqan.

44 Ruri kaq patiuchömi ishkay cuartukuna karqan. Juk cuartumi norti kaqlä punku ñöpancho karqan. Tsay cuartupa punkunmi sur kaqläpa karqan. Jukaq cuartunami sur kaqlä punku ñöpancho karqan. Tsay cuartupa punkunnami norti kaqläpa karqan. 45 Pushamaq runami nimarqan: “Sur kaqläpa punkuyuq cuartuqa templuta rikaq sacerdötikunapämi kaykan. 46 Norti kaqläman punkuyuq cuartunami altarcho aruq sacerdötikunapä kaykan. Tsay sacerdötikunami Sadocpita aywaraq sacerdötikuna kayan. Leví trïbu mayinkunapita paykunallami Tayta Diospa ñöpancho sirviyänanpä kaykäyan”.

47 Tsaypitanami tsay runa tupurqan ruri kaq patiuta. Tupuptinmi largunpis anchunpis pitsqa chunka (50) metru karqan. Tsaymi cuadrädu karqan. Altarqa templu ñöpanchömi kaykarqan. 48 Nirkurnami templuman yaykuna kaq cuartuman pushamarqan. Tsaycho ishkan ñöpanpa pirqata tupuptinmi ishkay metru pullan anchun karqan. Punkupa anchunta tupuptinnami qanchis metru karqan. Punkupa cada ñöpancho kaykaq pirqakunapa largunta tupuptinmi juk metru pullan karqan. 49 Tsay cuartupa anchunnami chunka metru karqan. Yaykuna punkupita frentincho kaq punkuyaq tupuptinmi soqta metru karqan. Chunka grädakunapami tsayman witsäyaq. Templuman yaykunacho ishkay paradorkunami ishkanlächo ichiraykäyarqan.