Gog vincishqa kananpä ninqan
39
“Runapa tsurin, jutïcho mandaq Gogpa contran willakur niy: ‘Tayta Diosmi nin: Mesec y Tubal nacionkunapa mandaqnin Gog, qampa contraykimi kanan rikakü. 2 Norti kaqlä karupita qarachashqa apamurmi Israel jirkakunaman chätsimushayki. 3 Tsaychömi itsuq kaq makikicho aptaraykanqayki flëchakunaykita pakirishä. Derëcha kaq makikicho tsararaykanqayki flëchaykikunatapis jitarishä. 4 Soldäduykikunawan y juk nacionkunapita qamwan shayämuq soldädukunawanmi Israel jirkakunacho llapayki wanuyanki. Tsaychömi wiskurkuna y chucaru uywakuna mikuyäshunaykipä kamakätsishä. 5 Jäkuq pampakunachömi wanushqa jitaräyanki. Noqa Tayta Diosmi tsaynö nï.6 “ ‘Tsaynöllami Magog runakuna taykäyanqan markakunata ninawan kayashä. Costacho alli sigurashqa markakunatapis tsaynöllami rurashä. Tsayrämi Tayta Dios kanqäta musyayanqa. 7 Kuyanqä Israel runakunata salvarmi santu kanqäta pïmaytapis tantiyatsishä. Mananami imaypis santu jutïta manakaqman churayanqanatsu. Tsaynöpami maytsay nacioncho Israel runakunapa santu Tayta Diosnin kanqäta musyayanqa. 8 Ninqänö kananpä junaq chämuptinmi llapan ninqäkuna cumplinqa’. Tayta Diosmi tsaynö nin.
9 “ ‘Tsaymi Israel runakuna markankunapita yarqur chikiqninkunapa escüdunkunata, flëchankunata, taksha lanzankunata y jatun lanzankunata kayayänanpä qoriyanqa. Tsay qoriyanqanmi qanchis watantin kusinakuyänanpä yantankuna kanqa. 10 Tsaymi jirkakunapita yantata apayämunqanatsu ni muntiman qeru mutuqpis aywayanqanatsu. Tsaypa trokinqa qoriyanqan armakunami yantankuna kanqa. Imaykanta qechuyänanpä yaykuptinmi kikinkunatapis qechuyanqa. Suwapayta munayaptinpis kikinkunatami suwapäyanqa’. Tayta Diosmi tsaynö nin.
11 “ ‘Tsay witsanmi Gog y soldädunkuna pampakuyänanpä Israelcho juk partita rakishä. Tsayqa kanqa Kachi Lamar tsimpan Viajëru jutiyuq pampachömi. Tsaycho mandaq Gog llapan soldädunkunawan tsaytsika pamparäyaptinmi runakuna tsaypa puriyanqanatsu. Tsaymi tsay partipa jutinta churapäyanqa Hamón-gog Pampaa jutin kananpä. 12 Israel runakuna qanchis killatarämi tsay ayakunata pampayta ushayanqa. Tsayrämi Israel nación limpiu quëdanqa. 13 Israel runakunaqa llapanmi aya pampayman churakashqa kayanqa. Munayyuq kaynïwan chikiqninkunata ushakätsinqätami Israel runakuna imaypis yarparäyanqa’. Tayta Diosmi tsaynö nin.
14 “ ‘Ayakunata pampar qallaykuyanqanpita qanchis killa päsaskiptinmi runakunata kachayanqa llapan nacionpa aywar tullukunata ashi ashiykur pampayänanpä. 15 Rikapakur aywaqkuna runapa tullunta tarirqa juk señaltami churayanqa pampaqkuna qoriskir apayänanpä. Hamón-gog Pampa niyanqanmanmi tsay tullukunatapis pampayanqa. 16 Tsaynöpami Israel nación limpiu quëdanqa.
“ ‘Tsaynöllami tsay pamparäyanqan pampacho juk marka kanqa. Tsay markapa jutinmi Hamonab kanqa’ ”.
17 Tayta Diosmi nimarqan: “Runapa tsurin, wiskurkunata, condorkunata y llapan chucaru uywakunata qorikäyänanpä niy. Maytsaypitapis qorikäyämutsun kamarinqä mikuyta mikuyänanpä.c Israel jirkakunachömi paykunapä mikuyta kamarishä. Tsaychömi aytsata mikuyanqa y yawarta upuyanqa. 18 Basáncho kaykaq wera carnërupa, üshapa, chïvupa y törukunapa aytsanta mikuqnö y yawarninta upuqnömi soldädukunapa aytsanta mikuyanqa y kay patsacho mandaqkunapa yawarninta upuyanqa. 19 Wanutsinqä runakunapa wirantami jimayanqanyaq mikuyanqa. Machäyanqanyaqmi yawarnintapis upuyanqa. 20 Tsay banquëtichömi pacha junta mikuyanqa cawallu aytsakunata, muntädu aywaqkunapa aytsankunata y llapan soldädukunapa aytsankunata”.† Tayta Diosmi tsaynö nin.
21 “ ‘Tsaynöpami maytsay nación runakunata munayyuq kanqäta musyatsishä. Paykunami rikayanqa llutanta rurayanqankunapita juzgar castiganqäta. 22 Israel runakunapis tsay junaqpita patsami musyayanqa paykunapa Tayta Diosninkuna kanqäta.
23 “ ‘Israel runakunata tsaynö salvaptïmi maytsay nación runakunapis musyayanqa munayyuq kanqäta. Manami munayniynaq kaptïtsu Israel runakuna juklä nacionkunacho ñakaykäyan, tsaypa trokinqa jutsankunapita y ninqäta mana cumpliyanqanpitami. Tsaymi paykunata yanapanäpa trokin chikiqninkunata yanapashqä guërracho wanutsiyänanpä. 24 Mana cäsukamaypa jutsata rurayanqanman tupumi Israel runakunata castigarqä’.
25 “Tsaymi Tayta Dios nin: ‘Jacobpita aywaraq Israel runakunata kuyaparmi juklä nacionkunacho taykaqta Israel nacionman kutitsimushä. Tsaynö kutitsimuptïmi pïmaypis santu jutïta respitanqa. 26 Nacionnincho pipis mana wajupaptinmi añaw kawayanqa. Tsaymi ñöpata conträ shärir llutanta rurayanqanpita pasaypa penqakuyanqa.
27 “ ‘Juklä nacionkunacho y chikiqninkunapa markankunacho täyanqanpitami paykunata qorimushä. Tsaynö ruranqäta maytsay nacioncho taq runakunami rikayanqa. Tsaynöpami santu Dios kanqäta musyatsishä. 28 Jäpa nacionkunaman prësu aywayänanpä noqami kamakätsirqä. Maytsaymanpis qarqunqänöllami ni juktapis mana kachaypa markankunaman qorimushä. Tsayrämi Tayta Diosninkuna kanqäta musyayanqa. 29 Israel runakunamanmi Espïritüta churamushä. Yapayqa mananami paykunata kacharishänatsu’. Tayta Diosmi tsaynö nin”.