Asiria kanqannö Egiptupis kananpä ninqan
31
Babiloniaman prësu apayämanqanpita chunka juk wataman aywaykaptinnami kimsa kaq killa punta junaqcho Tayta Dios nimarqan: 2 “Runapa tsurin, Egipto nacionpa mandaqnin rey Faraónta y nacionnincho taykaq runakunata niy:“ ‘Manami pipis qamkunanö munayyuq kantsu.
3 Qamkunaqa Asiria nación kanqannömi munayyuq kaykäyanki.
Asiriaqa Líbanucho kaykaq cedru jachami karqan.
Kuyayllapämi jatunkaray llimllasapa karqan.
Ñükanpis pukutayyaqmi charqan.
4 Oqucho karmi shumaq wiñarqan.
Chakinpa yaku aywarmi wakin jachakunatapisa ushmarqan.
5 “ ‘Tsaymi llapan jachapitapis mas jatunyarqan.
Atska yaku shumaq ushmaptinmi pasaypa llimllasapayarqan.
Llimllankunapis wakläman kaylämanrämi mashtararqan.
6 Llimllankunachömi imaykaläya pishqukunapis qeshunta rurayaq.
Chakinchömi tukuy casta uywakunapis wachayaq.
Llantuyninchömi maytsay nación runakunapis täyaq.
7 “ ‘Kuyayllapämi tsay jacha wiñarqan.
Jawanta atska yaku ushmaptinmi llimllankuna shumaq raprasapayarqan.
8 Tayta Diospa huertanchob mayqan cedrupis manami tsaynö jatunqa karqantsu.†
Cipreskunapa llimllankunapis manami tsay jachapa llimllankunanötsu karqan.
Castäñu jachakunapa llimllankunapis manami tsay jachapa llimllankunanötsu karqan.
Tayta Diospa huertancho mayqan jachapis tsaynö kuyayllapäqa manami karqantsu.
9 Kuyayllapäta y llimllasapatami Tayta Dios rurarqan.
Tsaynö kaptinmi Tayta Diospa Edén huertancho wakin jachakuna tsay cedruta chikiyaq.
10 “ ‘Tsaymi Tayta Dios nin: Llapan jachakunapita mas jatunyar ñükanpis pukutayyaq chaptinmi shonqun pasaypa orgullösu rikakurqan. 11 Tsaymi jäpa nacionpa mandaqnin reypa makinman churaykurqä. Tsay reymi jutsata ruranqanman tupu castigarqan. 12 Mana alli jäpa runakuna mutuyaptinmi jirkakunacho, pampakunacho y raqrakunachöpis tsay jachapa llimllankuna pakishqa jitaräyarqan. Tsaymi maytsay nación runakuna llantuynincho taykäyanqanpita aywakuyarqan. 13 Ishkiskatsiptinmi tukuy casta pishqukuna troncunchöna qeshunkunata rurar täyarqan. Llimllankunatanami tukuy casta munti uywakuna jarur ushayarqan.
14 “ ‘Kananpitaqa atska yaku ushmaptinpis mananami ima jachapis tsaynö llimllasapayanqatsu. Mayjina qarpashqa karpis manami pukutayman chanqanyaq wiñanqanatsu. Llapanpis ushakaqlla karmi wanushkuna kaykäyanqanman chäyanqa. Runa ushakaqlla kanqannömi ushakaqlla kaykäyan.
15 “ ‘Tayta Diosmi nin: Wanushkuna kaykäyanqanman Asiria nación chanqan junaqmi mayukuna y patsa rurincho kaykaq lamarpis pasaypa llakikur tsakirqan. Líbano muntipis llakikuptinmi tsaycho kaykaq llapan jachakunapis wanupaskiyarqan. Tsaynö kananpä noqami kamakätsirqä.
16 “ ‘Cedru jachanö qapaparrä ishkiptinmi maytsay nación runakunapis mantsariywan tsuktsukyäyarqan. Wanushkuna kaykäyanqanman chätsiptïmi Edéncho y Líbanucho atska yakuwan wiñaq kuyayllapä jachakuna kushikur niyarqan: “Noqakunawannami wanushkuna kaykäyanqancho kaykanki”.
17 “ ‘Ñöpataqa tsay jachakuna cedru jachapa llantuynincho kar yanapaqninmi kayarqan. Kananqa llapanpis tsay jachakuna espädawan wanutsishqa runakunanömi ushakashqa kaykäyan.
18 “ ‘Egipto nación, cedru jachanömi qampis kaykanki. Kuyayllapä kanqaykimanqa Edéncho jachakunapis manami mayqanpis tinkuntsu. Tsaynö karpis Edéncho kaq wakin jachakunanöllami wanushkuna kaykäyanqanman chanki. Mana cäsukamaqkuna y guërracho espädawan wanuqkuna ushakäyanqannöllami qampis y qamcho taq runakunapis ushakäyanki. Tayta Diosmi tsaynö nin’ ”.