Egipto runakunata yapay castigananpä ninqan
“ ‘Tayta Diosmi nin:
¡Egipto runakuna, pasaypa castigashqa kayänaykipä kaq junaq chaykämunnami!
¡Pasaypa llakikurnin waqayay!
3 Tsay castïgu junaqqa chaykämunnami.
Qamkunata castiganäpä wallkallanami pishiykan.
Tsay junaqqa patsapis tsakaskiqnörämi kanqa.
Llapan nacionkunapis pasaypami mantsariyanqa.†
4 Nacionnikicho guërra kaptinmi atska runakuna wanuyanqa.
Marka murällaykikunatapis cimientunpita juchuratsirmi imaykaykikunatapis apakuyanqa.
Tsayta musyarmi Etiopíachöpis mantsariywan tsuktsukyäyanqa.
5 “ ‘Tsay guërrachömi Etiopía nacionpa, Fut nacionpa, Lud nacionpa, Arabia nacionpa, Libia nacionpa y Egiptuta yanapaq wakin nacionkunapa soldädunkunapis wanuyanqa.
6 “ ‘Tayta Diosmi nin:
Egipto nacionta yanapaqkunaqa llapanpis wanuyanqami.
Migdolpita qallaykurmi Seveniyaq guërracho wanuyanqa.
Munayyuq kar chölu tukunqanpis ushakanqami.
Tayta Diosmi tsaynö nin.
7 “ ‘Ushakaq nacionkunapitapis mas peormi Egipto nación ushakanqa.
Ushakaq markakunanöllami markankunapis chipyaq ushakanqa.
8 Egipto nacionta ninawan kayarmi llapan yanapaqninkunatapis ushakätsishä.
Tsayrämi Tayta Dios kanqäta musyayanqa.
9 “ ‘Tsay witsanmi büquiwan Etiopíaman kachata kachashä.
Tsaynö kachashä mana yarpachakuq Etiopía runakunapis ushakäyänanpäna kanqanta willananpämi.
Tsaymi Etiopía runakuna pasaypa mantsakäyanqa.
Tsay junaq chämunanpä wallkallanami pishiykan.
10 “ ‘Tayta Diosmi nin:
Babilonia nacionpa mandaqnin rey Nabucodonosorwanmi Egipto nacionpa imayka riquëzankunatapis ushakätsishä.
11 Paytami imatapis mana mantsaq soldädunkunatawan Egiptuman kachashä.
Paykunami tsay nacionta espädankunawan ushakätsiyanqa.
Tsaymi maytsaychöpis ayakuna mashtaräyanqa.
12 Nilo mayutapis tsakitsirmi mana alli runakunapa makinman tsay nacionta churashä.
Jäpa runakunawanmi tsay nacionta llapan imaykankunatawan ushakätsishä.
Tayta Diosmi tsaynö nin.
13 “ ‘Tayta Diosmi nin:
Egipto runakuna rurayanqan ïdulukunata llapantami ushakätsishä.
Menfis markacho adorayanqan ïdulukunatapis chipyaqmi ushakätsishä.
Tsayta rikarmi tsay nacioncho taq runakuna pasaypa mantsakäyanqa.
Egiptucho reypis manami kanqanatsu.
14 “ ‘Patros partita chipyaqmi ushakätsishä.
Zoán markatapis kayaypami ushakätsishä.
Tebas marka runakunatapis llapantami juzgashä.
15 Egiptucho alli corralashqa Sin markata castigaptïrämi rabyanaynï qallqunqa.
Tebas markatapis chipyaqmi ushakätsishä.
16 “ ‘Egipto nacionta ushananpämi ninata tsaritsipaykushä.
Sin markacho taqkunapis nanaywanmi qoshpayanqa.
Tebas markapa murällankunapis rachikarmi kichakäyanqa.
Menfis markacho taqkunapis mantsakashqallami imaypis kayanqa.
17 On markacho y Pibeset markacho taq chölukunapis guërrachömi wanuyanqa.
Warmikunatanami juk nacionman prësu apakuyanqa.
18 “ ‘Egipto nación munayyuq kaptinpis ushakätsishämi.
Orgullösu rikakunqanpitami penqakuyman churashä.
Tsay junaqmi Tafnes markacho patsapis tsakaskinqa.
Llapan Egiptucho pukutaypis yanayparämi tsapaskinqa.
Egipto markakunacho taq runakunatami juklä nacionman prësu apakuyanqa.
19 Jutsata rurayanqanpitami Egipto runakunata tsaynö castigashä.
Tsayrämi Tayta Dios kanqäta musyayanqa’ ”.
20 Babiloniaman prësu apayämanqanpita chunka juk wata qallanan killa qanchis junaqchömi Tayta Dios nimarqan: 21 “Runapa tsurin, Egipto nacionpa mandaqnin rey Faraónpa rikrantami pakirishqä.a Tsay pakinqä rikranta manami ni imallawanpis jampipashqatsu ni watapashqatsu. Tsaymi yapay espädata aptanallanpäpis rikran alliyanqanatsu.
22 “Tayta Diosmi nin: Egipto nacionpa mandaqnin Faraónpa contran rikakurmi ishkan rikranta pakirishä. Sänu kaqta y pakish kaqtapis pakirishämi. Tsaynö ruraptïmi aptaraykanqan espädantapis kachapakunqa. 23 Maytsay nacionkunapa qarquptïmi Egipto runakuna mashtakar aywakuyanqa.
24 “ ‘Babilonia nacionpa mandaqnin reytami munayyuq kananpä yanapashä.
Espädätapis paytami entregashä.
Faraónpa rikrantami itsanqa pakirishä.
Tsaymi Babilonia nacionpa mandaqnin reypa ñöpancho wanunaykaqnörä nanaywan waqanqa.
25 Yapaymi nï: Babilonia nacionpa mandaqnin reytami munayyuq kananpä yanapashä.
Faraóntami itsanqa munayniynaqta kachaykushä.
Babilonia nacionpa mandaqnin reytami espädäta aptatsishä.
Paymi Egipto runakunata chipyaq wanutsinqa.
Tsaynöpami Tayta Dios kanqäta musyayanqa.
26 “ ‘Maytsay nacionkunapa qarquptïmi Egipto runakuna mashtakar aywakuyanqa.
Tsayrämi Tayta Dios kanqäta musyayanqa’ ”.