Egipto runakunata castigananpä ninqan
29
Babiloniaman prësu apayämanqanpita chunka wata cumplinanpä ishkay killa pishiykaptinmi chunka ishkay junaqcho Tayta Dios nimarqan: 2 “Runapa tsurin, Egipto nacionpa mandaqnin rey Faraón kaqläpa rikaskir paypä y tsaycho taq llapan Egipto runakunapäpis willakuy.† 3 Willakur ninki:“ ‘Tayta Diosmi nin:
Egipto nacionpa mandaqnin rey Faraón, contraykimi kaykä.
Mayu chawpincho jatunkaray mantsaypä uywanömi kaykanki.
Tsaynö karmi Nilo mayu kikikipa kanqanta nikanki.
Tsaynöllami nikanki tsay mayuta kikiki ruranqaykita.
4 Tsaynö nikaqtami noqa shamur jatun anzuëluwan shimipita tsarimushayki.
Mayupita jipimuptïmi atska pescädukuna escämaykiman laqakashqa yarqayämunqa.
5 Janaykicho laqaraykaq pescäduntintami tsunyaman jitariyäshayki.
Tsaycho jitaräyaptiki manami pipis qoriyäshunkitsu.
Munti uywakunawan wiskurkunami mikuyäshunki.
6 Tsaynöpami Egipto runakunapis musyayanqa Tayta Dios kanqäta.
“ ‘Yanapanaykipä Israel runakuna yärakuyäshuptikipis shoqush tukrunöllami kashqayki.†
7 Aptarkuyäshuptiki pakirmi paykunata ikishninpa tuksishqayki.
Tukmakurkuyäshuptiki pakirmi ishkitsir tseqllankunata pakitsishqayki.
8 “ ‘Tsaymi Tayta Dios nin: Egipto nación, qamcho taq runakunatapis y uywakunatapis espädäwanmi chipyaq ushakätsishä. 9 Nilo mayuta kikiki ruranqaykita ninqaykipita y tsay mayu qampa kanqanta ninqaykipitami pipis mana tänan tsunyaqman tikratsishayki. Tsaynöpami Tayta Dios kanqäta musyanki.
10 “ ‘Egipto nación, qampapis y mayuykikunapapis contraykimi rikakü. Qamta ushakätsirmi pasaypa tsunyaqta jaqirishayki. Migdol markapita Sevene markayaq y tsaypita Etiopía tinkuq lindërunyaqmi ushakätsishayki. 11 Chusku chunka (40) watayaqmi pasaypa tsunyaqlla kanki. Manami runapis tanqatsu ni uywakunapis qamcho puriyanqatsu.
12 “ ‘Wakin nacionkunata ushakätsinqäpitapis chipyaqmi ushakätsishayki. Markaykikunatapis wakin markakunapita chipyaq raqällatanami jaqirishä. Chusku chunka (40) watayaqmi tsaynölla kanki. Qamcho taykaq runakunatapis maytsay nacionkunamanmi qarqushä.
13 “ ‘Tayta Diosmi nin: Chusku chunka (40) watapitarämi Egipto runakunata maytsay nacionman qarqunqäpitapis qorimushä. 14 Paykunata prësu apayanqanpita qorirkamurmi unay castankuna yuriyanqan Patros partiman apashä. Tsaychömi pipis mana cäsushqa kayanqa. 15 Pasaypa wallkayätsiptïmi wakin nacionkunanönatsu munayyuq kanqa. Tsaymi wakin nacionkunata munayninman churanqanatsu.
16 “ ‘Egiptupa mandaqnin Faraónmanqa Israel runakuna mananami yapay yärakuyanqanatsu. Tsaymi tantiyakuyanqa Faraónman yärakur conträ shäriyanqanta. Tsaynöpami Tayta Dios kanqäta musyayanqa’ ”.
Egipto runakunata Nabucodonosor vincinanpä ninqan
17 Babiloniaman prësu apayämanqan ishkay chunka qanchis (27) wata qallanan killachömi Tayta Dios nimarqan: 18 “Runapa tsurin, Babilonia nacionpa mandaqnin rey Nabucodonosormi soldädunkunawan Tiro nación runakunata atacarnin pasaypa ñakayashqa. Tsaymi soldädunkunapa umankunapis paqlayashqa y waqtankunapis pushllushqa.a Tsaynö arurpis vinciyta mana kamäpakur manami imatapis jipiyashqatsu.
19 “Tsaymi Tayta Dios kar nï: Babilonia nacionpa mandaqnin rey Nabucodonosor Tiro markapita imatapis mana jipishqa kaptinmi Egipto nacionta vincinanpä kamakätsishä. Tsaymi Egipto runakunapa riquëzankunata y imaykankunatapis apakur soldädunkunata päganqa. 20 Noqa kachaptïmi Tiro markata atacaq aywashqa. Tsaymi Egiptumanna kachashä tsaypita imaykantapis apakuyänanpä”. Tayta Diosmi tsaynö nin.
21 “Tsay witsanmi Israel nación unay munayyuq kanqannö yapay munayyuq kananpä yanapashä. Ezequiel, tsaynöllami qamtapis yanapashayki willakuynïta willakuptiki Israel runakuna shumaq chaskikuyänanpä. Tsayrämi Tayta Dios kanqäta musyayanqa”.