Tirupa mandaqnin rey imanö kananpäpis ninqan
“ ‘Tayta Diosmi nin:
Runalla kaykarmi pasaypa orgullösu rikakurnin nikanki:
“Noqaqa juk diosmi kaykä.
Jamaraykäpis dioskuna jamaränanchömi.
Lamar chawpinchömi kaykäpis.a
Dios yarpanqannömi yarpäpis”.
“ ‘Tsaynö nirpis manami diostsu kanki.
3 ¿Danielpitapis mas yachaqtsurä kanki?
¿Aja tantiyay kaqkunatapis llapantatsurä tantiyanki?
4 Yachaq kaynikiwan imaykatapis tarirmi imaykayuq tikrashqayki.
Babulnikikunamanmi qellayta y qoritapis juntashqayki.
5 Negociu rantikuyta yacharmi imaykayuq tikrashqayki.
Imaykaykikunapis atska kaptinmi pasaypa runa tukushqayki.
6 “ ‘Tsaynö kaptikimi noqa Tayta Dios nï:
Qam nikanki juk diospanö yarpaynikipis kanqantami.
7 Tsaynö kanqaykipitami jäpa mana alli runakunata atacayäshunaykipä kachamushä.
Paykunami alli yachaq kaynikiwan qorinqaykikunata y shäritsinqaykikunata ushakätsiyanqa.
Munayyuq tukuykaqtami ushakätsiyäshunki.
8 Illaqpita wanutsiyäshuptikimi lamarcho shenqaypa wanuqkunanö qampis kanki.
9 Wanutsishuqniki runakunapa ñöpanchöpis ¿dios kanqaykitatsurä ninki?
Wakin runakunatanöllami wanutsiyäshunki.
10 Llutan ruraqkunatanömi mana cäsukamaq jäpa runakuna wanutsiyäshunki’ ”.
Tayta Diosmi tsaynö nin.
11 Tayta Diosmi nimarqan: 12 “Runapa tsurin, Tiro markapa mandaqnin reypä wanupakuy cantuta cantarnin ninki:
“ ‘Tayta Diosmi nin:
Qamqa pïmaypis rikayänanpämi pasaypa yachaq y kuyayllapä karqayki.
13 Tayta Diospa Edén huertanchömi tarqayki.
Latsapaykikunapis imaykaläya chipipiq rumikunawan bordashqami karqan.
Tsay kuyayllapä rumikunami karqan cornalina, topacio, jaspe, crisólito, berilo, ónice, zafiro, carbunclo y esmeralda.
Alhäjaykikuna y arëtikikunapis qoripitami karqan.
Kamashunqayki junaqpita patsami llapan tsaykuna kamarishqana kaykarqan.
14 “ ‘Querubinnö cuidakuq kanaykipämi qamta churarqä.
Sagrädu jirkächo karmi chipipiykaq rumikuna chawpincho puriq kanki.
15 Kamanqä junaqpita patsami allillata rurar kawashqayki.
Tsaynö kaykarmi jutsa rurayman churakashqayki.
16 Negociuyki alli yarqapäshuptikimi mana allikunaman jitarpukashqayki.
Tsaymi sagrädu jirkäpita qarqushqä.
Cuidakuq querubinnö kaptikipis chipipiykaq rumikuna chawpincho kaykanqaykipitami qamta qarqushqä.
17 “ ‘Kuyayllapä karmi orgullösu rikakushqayki.
Pïmaypitapis alabashqa kar runa tukurmi yachaq kaynikitapis manakaqman churashqayki.
Kananqa mana cäsushqa kanaykipämi kacharishqä.
Reykuna asipäyäshunaykipämi manakaqman qamta churashqä.
18 “ ‘Negociuykikunata engañaypa rantikurmi pasaypa jutsata rurashqayki.
Templuykitapis manakaqmanmi churashqayki.
Tsaymi qamta y makikicho kaqkunata llapanta penqakuyman churashqä.
Llapan runakunapis mana väliqtanömi rikaykäyäshunki.
19 Maytsay markacho llapan reqishuqnikikunapis tsaynö kanqaykita rikarmi pasaypa mantsariywan äyakäyashqa.
Pasaypa mantsariypämi ushakashqayki.
Manami pipis rikashunkinatsu’ ”.
Sidón imanö kananpäpis ninqan
“ ‘Tayta Diosmi nin:
Sidón marka, contraykimi tikrashqä.
Qamta castigaptïmi santu kanqäta pïmaypis musyayanqa.
Tsaynöpami Tayta Dios kanqäta musyayanki.
23 “ ‘Qammanqa tukuyläya qeshyatami kachamushä.
Contrayki soldädukunami qamcho taykaq runakunata wakcho kaychöpis espädawan wanutsiyanqa.
Llapan cällikikunachöpis yawarmi mashtaranqa.
Tsaynöpami Tayta Dios kanqäta musyayanqa.
24 “ ‘Tsaynö castigaptïmi Israel runakunata ñöpan nacionkunacho taq runakuna ñakatsiyanqanatsu.
Israel runakuna mananami kashakuna chawpincho kaykaqnönatsu kayanqa.
Tsaynöpami Tayta Dios kanqäta musyayanqa.
25 “ ‘Tayta Diosmi nin:
“ ‘Juklä nacionkunacho mashtakashqa kaykaq Israel runakunatami qorimushä.
Sirvimaqnï Jacobta unay rikatsinqä nacionmanmi kutitsimushä.
Kutitsimuptïmi maytsay nación runakuna santu kanqäta musyayanqa.
26 Wayinkuna rurar, üvankuna plantarmi pipis mana wajupashqa añaw tsaycho kawakuyanqa.
Mayqan nación runakunatapis Israel runakunata ñakatsiyaptinqa castigashämi.
Tsaynöpami Tayta Diosninkuna kanqäta Israel runakuna musyayanqa’ ”.