Tiro markapä llakikunqan
27
Tayta Diosmi nimarqan: 2 “Runapa tsurin, Tiro markapä wanupakuy cantuta cantay. 3 Tiro markamanmi büquikuna lamarpa maytsaypitapis aywayan. Tsay markamanmi rantipakuq chäyan lamar kuchun karu markakunapitapis. Tiro marka ushakänanpä kanqanta willar ninki:“ ‘Tayta Diosmi nin:
Tiro marka, qam yarpaykanki llapanpitapis mas kuyayllapä kanqaykitami.
4 Munanqaykipami lamar jananpa aywanki.a
Carpintërukunami shumaq kuyayllapäta rurayäshushqayki.
5 Senir jirkapita apayämunqan pïnu qerupitami rurayäshushqayki.
Líbanupita apayämunqan cedru qerupitami mastilnikitab rurapäyäshushqayki.
6 Basánpita apayämunqan encina qerupitami rëmuykikunatapisc rurapäyäshushqayki.
Lamarcho kaykaq Quitim islapitad apayämunqan pïnu tablawanmi entablayäshushqayki.
Nirkurmi marfilwan adornayäshushqayki.
7 “ ‘Wayra apashunaykipä jatun rakta tëlaykikunapis Egiptucho bordayanqan lïnupitami kashqa.
Bandëraykikunapis tsay tëlapitami kashqa.
Azul tëlakunapita y granäti tëlakunapita rurashqami tolduykikunapis kashqa.
Tsay tëlatami lamar kuchuncho kaykaq Elisa markapita apayämushqa.
8 “ ‘Sidón runakuna y Arvad runakunami rëmu sutaqkunapis kayashqa.
Buqui manijaqkunapis yachaq Tiro runakunami kayashqa.
9 Alli yachaq Gebal carpintërukunapis qamwanmi maypapis aywayaq.
Tsay carpintërukunami perdiptikipis allitsayäshushqayki.
Negociantikunapis maytsaypitami büquikunawan negociunkunata qam kaqman apayämuq.
10 Soldäduykikunapis Persiapita, Ludpita y Futpitami kayashqa.
Adornayäshurnikimi tsapakuyänan escüdunkunata y cascunkunatapis qam kaqcho warkurkuyaq.
11 “ ‘Arvadeo runakunawan soldäduykikunami marka murällayki janancho tsapäyäshunaykipä jiruruypa kaykäyashqa. Rikachakuna törrikikunachönami Gamad runakuna kaykäyashqa. Escüdunkunapis murällaykicho jiruruypa warkuräyaptinmi shumaq adornashqa kashqayki.
12 “ ‘Imaykayuqpis kaptikimi Tarsispita shayämuq negociunta rantikuyänanpä. Qellayta, fiërruta, estäñuta y plömuta apakurkurmi trukapakuyänanpä shayämuq.
13 “ ‘Tsaynöllami Grecia, Tubal y Mesec runakunapis wätay runakunata y broncipita rurashqa manëjukunata rantikuyäshuq kanki.
14 “ ‘Bet-togarma runakunapis cargapä cawallukunawan, guërra cawallukunawan y mulakunawanmi negociuykipita pägayäshuq kanki.
15 “ ‘Rodaspita shamuq runakunapis y lamar kuchun nacionkunacho taq runakunapis negociuykikunawan trukapakuyänanpämi marfilta y ébano qerukunata apayämuq.
16 “ ‘Imaykayuqpis kaptikimi rantikuyäshunaykipä edomita runakunapis apayämuq kuyayllapä coloryuq rumikunata, granätiman tiñishqa tëlakunata, bordashqa latsapakunata, lïnupita awashqa fïnu tëlakunata, coral niyanqan adornuta y rubí rumikunatapis.
17 “ ‘Judá runakunawan Israel runakunapis Minit partipitami trïguta, biscöchuta, abëjapa mishkinta, aceitita y balsamu ninqan jampikunata trukayänaykipä apapäyämushuq kanki.
18 “ ‘Imaykayuqpis kaptikimi Damasco runakunapis Helbónpita apayämunqan vïnuta y Saharpita apayämunqan millwata rantikuyäshuq kanki. 19 Tsaynöllami Uzalpita apayämunqan vïnuta, fiërruta, canëlata y mushkuq cäñakunata rantikuyäshuq kanki.
20 “ ‘Dedánpita shamuqkunanami silla jananman churayänanpä alfombrata rantikuyäshuq kanki.
21 “ ‘Arabia runakuna y Cedarcho taq mandaqkunapis üshakunata, carnërukunata y chïvukunatami rantikuyäshuq kanki.
22 “ ‘Sabácho y Raamacho taq negociantikunapis qampitami rantiyaq. Paykunami mas allinnin kaq perfümikunata, kuyayllapä cuestaq rumikunata y qorita rantikuyäshuq kanki.
23 “ ‘Tsaynöllami Harán, Cane y Edén markakunapita y Sabá, Asiria y Media nacionkunapita negociunkunata apamur rantikuyäshuq kanki. 24 Paykuna rantikuyäshuq kanki fïnu tëlakunata, bordashqa azul jakukunata, tukuy color alfombrakunata y kuyayllapä color jïlukunawan pilltashqa watukunata.
25 “ ‘Tsaynöllami negociuykikunata Tarsis runakuna büquinkunawan maytsaypapis rantikuyänanpä apayaq.
“ ‘Tiro marka, maytsaymanpis riquëzata apaq büquinömi kashqayki.
26 Juk kutimi büqui manijaqkuna lamar chawpinpa rëmunkunawan apayäshushqayki.
Tsaychömi illaqpita rupay yarqamunanläpita shamuq wayra llaktikätsishushqayki.e
27 Tsaymi riquëzaykikunapis y rantikunaykipä kaq negociuykikunapis ushakashqa.
Tsaynöllami ushakäyashqa rëmuwan büqui apaq runakuna, büqui manijaqkuna, büqui uchkukaptin tsapaqkuna, rantikuqnikikuna, soldäduykikuna y büquicho aywaq wakin runakunapis.
28 “ ‘Büqui manijaqkuna qayaräyaptinmi lamar kuchunkunapis tsuktsukyäyashqarä.
29 Rëmu sutaqkunapis büqui manijaqkunapis büquita jaqiriykurmi lamar kuchunman yarquyashqa.
30 Pasaypa llakikur qayarayparä qampä waqayanqanpis maytsaymanmi wiyakashqa.
Umankunaman allpata wiñakurninmi uchpa janancho qoshpayashqa.
31 Qampä llakikurninmi qara putuypa rutukuyashqa.
Qachqa latsapata jatikurninmi llakikuywan waqayashqa.
32 “ ‘Wanushkunapä cantayanqan cantuta cantapäyäshurnikimi niyan:
“Lamarcho kaykaq Tiro marka, ¿mayqan markallarä qamman tinkunman karqan?
33 Maytsay nacionkuna ministiyanqantami büquikikunawan chätsiq kanki.
Atska riquëzaykikunawanmi reykunatapis rïcuyätsiq kanki.
34 Lamar chawpincho ushakashqana kaptikimi llapan negociuykipis ushakashqa.
Qamwan kaykaq runakunapis chipyaqmi ushakäyashqa.
35 “ ‘ “Tsaynö ushakanqaykita rikarmi lamar kuchunkunacho taqkunapis pasaypa mantsakäyashqa.
Reykunapis mantsariywan tsuktsukyarninmi pasaypa mantsakäyashqa.
36 Juklä nación negociantikunapis mantsakashqami wichyakuyashqa.
Mantsariypä ushakar mananami imaypis kankinatsu” ’ ”.†