Tiro marka nacionpä willakunqan
26
Babiloniaman prësu apayämanqan chunka juk wata qallanan junaqchömi Tayta Dios nimarqan: 2 “Runapa tsurin, Tiro marka runakunami† Jerusalénta ushakätsiyaptin kushipar niyashqa: ‘¡Allirächi! ¡Maytsay nación runakunapis negociunkunawan chänan marka kananqa juchushqami kaykan! ¡Ushakätsishqana kaptinmi noqantsikmanna kananqa suerti chämushqa! ¡Tsaymi noqantsikkunana paykunanö imaykayuq rikakushun!’3 “Tsaymi Tayta Dios kar nï: Tiro marka, qampa contraykimi shärï. Wayrawan junishyaq lamar pulchaqyar kuchunman chaqtanömi juklä nación runakunata atacashunaykipä apamushä. 4 Tsaparäshuqniki murällaykikunatapis juchutsirmi ushayanqa. Rikachakuyänayki törrikikunatapis ushakätsiyanqami. Allpatapis chipyaq pitsaypa ushakätsirmi rumillatana kachaykushayki. 5 Kaykanqayki islapis mälla majakuna rumillanami rikakunqa. Tayta Diosmi tsaynö nin.
“Imaykaykitapis juk nación runakunami apakuyanqa. 6 Lamar kuchuncho taksha markaykikunatapis espädawanmi ushakätsiyanqa. Tsayrämi tsaycho taqkuna Tayta Dios kanqäta musyayanqa.
7 “Noqa Tayta Diosmi nï: Qamta ushakätsishunaykipämi norti kaqläpita Babilonia nacionpa mandaqnin rey Nabucodonosorta apamushä. Payqa llapanpitapis mas munayyuq rey karmi carrëtankunawan y cawallun muntashqa atska soldädunkunawan shamunqa. 8 Lamar kuchuncho taksha markaykikunata atacarmi tsaycho taq runakunata espädawan wanutsiyanqa. Nirkurmi markaykikunaman yaykuyänanpä murälla waqtankunapa törrikunata shäritsiyanqa, allpata qotuyanqa y escüdunkunawanmi tsapakuyanqa. 9 Markayki tsaparaq murällatapis mäquinawanmi ishkitsiyanqa. Rikachakuyänayki törrikunatapis juchutsirmi ushayanqa.
10 “Tsaynöllami marka punkukunatapis pakiskir yaykayämunqa. Atska cawallunkunawan shayämuptinmi qoshninörä polvu shäriqwan tsapakashqa rikakuyanki. Patatarrä cawallukuna shayämunqan wiyakaptin y jaqrararrä carrëtakuna shayämunqan wiyakaptinmi murällaykikunapis tsuktsukyanqa. 11 Llapan cällikikunatami cawallunkuna llutskar ushayanqa. Qamcho taykaq runakunatami espädawan wanutsiyanqa. Raku jorcunnikikunatapis ishkitsirmi ushayanqa. 12 Imayka riquëzaykikunatapis qechuyäshurnikimi negociuykikunatapis apakuyanqa. Murällaykikunatapis juchuskatsirmi kuyayllapä wayikikunatapis juchutsiyanqa. Taquyanqan rumikikunata y qeruykikunatapis lamarmanmi jitariyanqa.
13 “Tsaynöpami kushishqa cantayanqaykita upällatsishayki. Arpaykikuna waqanqanpis manami wiyakanqanatsu.† 14 Markaykita allpaynaq qaqatanöllami kachaykushä. Mälla majakunallamanmi tikraratsishä. Mananami imaypis yapay shäritsiyäshunkinatsu. Noqa Tayta Diosmi tsaynö nï”.
15 Tiro markatami Tayta Dios nin: “Bunrururrä wayikikuna juchunqanta wiyar, däñakushqakuna qayaräyanqanta wiyar y runakunata wanutsiyanqanta musyaskirmi lamar kuchuncho kaq nación runakunapis mantsariywan tsuktsukyäyanqa. 16 Tsay nacionkunapa mandaqnin reykunapis trönunkunapita shäriskirmi cäpankunata y shumaq bordashqa latsapankunatapis llushtikuskir lütuta jatikuyanqa. Ushakäyanqaykita musyarmi pasaypa mantsariywan patsachöna tsuktsukyaykar jamaräyanqa. 17 Tsaymi ayata cantapäyanqan cantuta cantapäyäshurniki niyanqa:
“ ‘Qamqa wakin markakunapitapis masmi büquikikunawan lamar jananpa purishqayki.
Kananqa ¿imanöpatä ushakaykushqayki?
Pïmaypitapis reqishqa markami karqayki.
Qamcho taq runakuna pasaypa munayyuqmi kayarqan.
Ñöpaykikunacho nacionkunatapis llapantami mantsakätsiq kanki.
18 Ushakanqaykita musyaskirmi lamar kuchuncho kaykaq markakuna tsuktsukyaykäyan.
Pasaypa ushakashqana kaptikimi islakunacho taqkunapis pasaypa espantash mantsakashqa kaykäyan’.†
19 “Tiro markatami Tayta Dios nin:
Pipis manana tanqan markakunatanö raqällatanami kachaykushayki.
Lamarpita atska yaku yarqamur apashunaykipämi kamakätsishä.
20 Tsaynöpami unay wanuqkuna kaykäyanqanman jitarpushayki.
Patsa ruriman qarpuriptïmi imayyaqpis ushakashqana kanki.
Unay wanuqkunawanna kaptikimi marka kanaykipä pipis shäritsishunkinatsu.
Qamcho mananami pipis tanqanatsu.
21 Chipyaq ushakätsiptïmi marka kanqayki partipis pasaypa mantsariypä rikakunqa.
Ashiyäshurnikipis mananami tariyäshunkinatsu”.†
Tayta Diosmi tsaynö nin.