Ezequiel 25

Amón nacionpä willakunqan

Tsaypitanami Tayta Dios nimarqan: 2 “Runapa tsurin, Amón nación runakuna^† kaqläpa rikaskir paykunata ima päsananpä kaqtapis willar 3 ninki: ‘¡Tayta Dios nishunqaykita wiyayay! Paymi nishunki: Templüta ushakätsiyaptin “allirächi” nirmi pasaypa kushipäyashqayki. Tsaynöllami kushipäyashqayki Israel nacionta ushakätsir Judá runakunata jukläpa apakuyaptin.

4 “ ‘Tsaynö kayanqaykipitami rupay yarqamunan kaqlächo taq runakuna shamur vinciyäshunaykipä kacharishayki. Paykunami toldunkunata ichïtsirnin llapan murukuyanqaykita mikuyanqa y uywaykikunapa lichintapis upuyanqa. 5 Rabá markaykitami camëllukunata mitsikuyänanman tikratsishä. Wakin markaykikunatanami üshakunata mitsikuyänanman tikratsishä. Tsayrämi Tayta Dios kanqäta musyayanki’.

6 “Tayta Diosmi nin: ‘Amonita runakuna, makikikunatapis taqllarrä y saltakacharrämi Israel runakunata ushakätsiyaptin kushipäyashqayki. 7 Tsaymi qamkunata jäpa nación runakunapa makinman kachaykuptï llapan imaykaykikunatapis apakuyanqa. Chipyaq ushakätsiptïmi nacionnikipis kanqanatsu. Tsayrämi Tayta Dios kanqäta musyayanki’ ”.

Moab nacionpä willakunqan

8 “Tayta Diosmi nin: ‘Seir niyanqan Moab nación runakunami^† Judá runakunata penqakuyman churar wakin nacionkunanölla kayanqanta niyan. 9 Tsaynö kayaptinmi Moab nación ñöpancho kaykaq Bet-jesimot, Baal-meón y Quiriataim kuyayllapä markakunata jäpa runakuna atacar vinciyanqa. 10 Rupay yarqamunan kaqlächo taq runakuna Moab nacionta vinciskirmi amonita runakunatanölla makincho tsararäyanqa. Tsaynöpami moabita runakunapäqa imaypis parlayanqanatsu. 11 Moabita runakunata castigaptïrämi noqa Tayta Dios kanqäta musyayanqa’.

Edom nacionpä willakunqan

12 “Tayta Diosmi nin: ‘Edomita runakunaqa^† Judá runakunata mana kuyapaypa venganzata rurarninmi pasaypa jutsata rurayashqa. 13 Tsaynö kayaptinmi noqa Tayta Dios nï: Temán partipita Dedán partiyaqmi edomita runakunata uywantinta espädawan wanutsir chipyaq ushayanqa. 14 Tsaynö ushakätsiyänanpämi kuyanqä Israel runakunata nishä. Tsayrämi pasaypa rabyanar ushakätsikuq kanqäta edomita runakuna musyayanqa’. Tayta Diosmi tsaynö nin.

Filistea nacionpä willakunqan

15 “Tayta Diosmi nin: ‘Filisteo runakuna unaypitami^† Judá runakunata chikir vengakurnin ushakätsiyashqa’.

16 “Tsaynö kayaptinmi Tayta Dios nin: ‘Cereteo niyanqan filisteo runakunata y lamar kuchuncho kaykaq llapan markankunata chipyaqmi ushakätsishä. 17 Pasaypa ajar mana kuyapaypa tsaynö castigaptïrämi noqa Tayta Dios kanqäta musyayanqa’ ”.