Puwaykaq mankaman tinkutsinqan
24
Babiloniaman prësu apayämanqan isqun wata cumplinanpä ishkay killa pishiykaptinmi chunka junaqcho Tayta Dios nimarqan: 2 “Runapa tsurin, kanan junaq imay kaykanqantsiktapis anotakuy. Kanan junaqmi Jerusalénta Babilonia nacionpa mandaqnin rey atacar qallaykunqa.† 3 Tsaynö kaykaptinqa tinkutsiypa willar tsay mana cäsukuq Jerusalén runakunata niy: ‘Tayta Diosmi nin: Jatun mankataa churkurkur tsayman yakuta wiñayay. 4 Uywata pishtaskir chankanta, jirka washanta y allinnin kaq tullunkunatapis tsayman wiñayay. 5 Tsay aytsata y tullukunata mankaman wiñayänaykipä wera üshata pishtayay. Nirkur yantata junta waykapäyay tullunkunapis qotukanqanyaq shumaq chänanpä’ ”.6 Tayta Diosmi nin:
“¡Allaw, imanörä kanqa wanutsikuq Jerusalén marka!
Jerusalén markaqa moqusyashqa mankanömi kaykan.
Yanayashqa imaypis mana yarquqnömi kaykan.
Llapan pedasyashqa aytsata mana akrar mankapita jipiqnömi Jerusalén runakunatapis llapanta prësu apakuyanqa.
7 “Jerusalénchöqa pasaypa wanutsinakuyllami kaykan.
Wanutsiyanqan runakunapa yawarninta allpawan tsapäyänallanpäpis manami yarpachakuyantsu.
Tsaypa rantinqa rumi janankunachöpis yawarnin tsakishqami kaykan.
8 Tsaymi paykunatapis wanutsiptï rumi janankunacho pillchinqan yawarnin tsakinqa.
Tsayta rikarmi pïmaypis musyanqa pasaypa ajar Jerusalén runakunata castiganqäta”.
9 Tsaymi Tayta Dios nin:
“¡Allaw, imanörä kanqa wanutsikuq Jerusalén marka!
Lunyaypa lunyar nina rupananpämi noqapis tsay churkuraykaq mankata waykapäshä.
10 Ninata tsariskatsirmi atska yantata waykushä.
Aytsa chanqanyaqmi timputsishä.
Caldunpis tsakinqanyaq y tullunkunapis qewshanqanyaqmi waykushä.
11 Nirkurmi shanshawan pukayanqanyaq jäkuq mankata wayllätsishä.
Tsaynö wayllätsishä moqusyanqanpis y yanayanqanpis illakänanpämi.
12 Mayjina wayllätsiptïpis qanran manami yarqunqatsu.
Manakaqllapämi tsay mankata wayllätsishä.
13 “Jerusalén marka, mana penqakuypa ïdulukunata adorar jutsata ruranqaykipitami qanra mankanö kaykanki. Limpiuyätsiyta munaptïpis manami munashqaykitsu. Alli cösa castigaptïrämi limpiuyanki. 14 Noqa Tayta Diosmi tsaynö nï. Ninqänöllami llapantapis rurashä. Manami qelanäshätsu, kuyapäshaykitsu ni llakipäshaykitsu. Imanöpis kawanqaykiman tupu y ruranqaykiman tupumi castigayäshayki”. Tayta Diosmi tsaynö nin.
Ezequielpa warmin wanunqan
15 Tayta Diosmi nimarqan: 16 “Runapa tsurin, pasaypa kuyanqayki warmikitami illaqpita apakushä. Apakuptï ama waqankitsu ni llakikunkitsu. 17 Tsaypa trokinqa shonqullaykicho yarpachakunki. Lütutapis ama jatikunkitsu. Qalla uma ni qalla chakipis ama purinkitsu. Qaqllaykitapis ama tsapakunkitsu. Aya mikuytapis ama mikunkitsu”.
18 Tsaypitanami tutapa runakunata parlaparqä. Tardipanami warmï wanuskirqan. Wanupakushqa kaykarpis Tayta Dios nimanqannöllami waraynin tuta karqä. 19 Tsaymi runakuna tapuyämarqan: “Warmiki wanushqa kaykaptin ¿imanirtä tsaynö kaykanki?” nir.
20 Tsaynö tapuyämaptinmi nirqä: “Tayta Diosmi nimashqa 21 qamkunata y wakin Israel mayintsikkunatapis ninäpä: ‘Tayta Diosmi nin: Qamkunaqa templüta pasaypa kuyarmi imaypis tsaycho kayta munayanki. Tsaynöpis templüman yärakurmi imapis mana päsayäshunaykipä kanqanta yarpaykäyanki. Tsaynö kuyaykäyaptikipis templüta ushakätsishämi. Jerusaléncho quëdamuq tsurikikunata warmitapis ollqutapis espädawanmi wanutsiyanqa.
22 “ ‘Tsay witsanmi Ezequiel kanan kaykanqannö qamkunapis kayanki. Manami qaqllaykikunata tsapakuyankitsu ni aya mikuytapis mikuyankitsu. 23 Manami qalla uma kayankitsu. Zapatuykikuna jatishqami puriyanki. Tsaynöpis manami lütuyankitsu ni waqayankitsu. Jutsaykikunapita llakikurmi pasaypa kallpaynaqnö rikakuyanki. Jukniki juknikipis shonqullaykikunachömi pasaypa llakikuyanki. 24 Ezequiel imanö kanqanta rikayay. Warmin wanuptin mana llakikunqannömi qamkunapis runa rikay llakikuyankitsu. Tsaynö karrämi Tayta Dios kanqäta musyayanki’.
25 “Runapa tsurin, templu kuyayllapä kaptinmi Israel runakuna pasaypa kushikur imaypis tsaycho kayta munayan. Tsaynö kuyaykäyaptinpis tsay templuta ushakätsishämi. Tsaynöpis kuyanqan tsurinkunatami ollquta warmitapis wanutsishä.