Samaria y Jerusalén markakuna tsay ñañalla kayanqan
23
Tayta Diosmi yapay nimarqan: 2 “Runapa tsurin, jukpinmi ishkay warmi wamrakuna tsay ñañalla kayarqan.† 3 Jipashyarnami paykunaqa Egiptucho jukta jukta waynäkuyarqan. Chuchunkunatapis yataparmi perditsiyarqan. 4 Mayor kaqpa jutinmi karqan Ahola y qepa kaqpanami jutin karqan Aholiba. Ishkanwan taptïmi ollqupis warmipis tsurïkuna kashqa. Aholami Samaria marka y Aholibanami Jerusalén marka.5 “Aholaqa warmï kaykarmi vecïnun Asiria runakunata waynäkurqan. 6 Paykunaqa llapanpis kayarqan granäti latsapashqa y cawallunkuna muntashqami. Tsaynöllami kayarqan capitanlla, mandaqkunalla y shumaq chölukunalla. 7 Aholaqa alli chölu Asiria runakunawan kakurmi ïdulunkunata adorar pasaypa jutsata rurashqa.
8 “Egiptucho jipashllarä kaykar jukwan jukwan kakunqannöllami Asiria runakunawanpis kakurqan. Chuchunkunata yatapar Egipto runakuna perditsiyanqannöllami Asiria runakunapis payta mañösayätsiyarqan. 9 Tsaymi waynäkunqan Asiria runakunapa munayninman kachapaykurqä. 10 Tsay runakunami payta qarapachaskir espädawan wanutsiyarqan. Nirkurnami wawankunata warmita ollqutapis apakuyarqan. Tsaynö ushakanqantami maytsaychöpis warmikuna parlayan.
11 “Tsayta rikarmi ñañan Aholibapis pasaypa mañösayar ñañanpitapis mas peorrä pïmaywanpis kakurqan. 12 Paypis ñañannömi Asiria runakunata pasaypa kuyakurkurqan.† Asiria runakunami llapanpis kayarqan kuyayllapä azul latsapashqa y cawallunkuna muntashqa. Tsaynöllami kayarqan capitankunalla, mandaqkunalla y shumaq chölukunalla. 13 Tsaymi Aholibatapis rikashqä ñañantanölla jukwan jukwan kakuqta.
14 “Aholiba pïmaywanpis lluta puriykanqanchömi Babiloniaa runakunata murälla pirqakunacho pukawan dibujashqa kaykaqta rikashqa. 15 Tsay dibujashqa runakunapa tseqllankunapis wachukuwan wachakäkushqa, umankunapis kuyayllapä tëlawan watashqa y Babiloniapita shamuq capitankuna niraqllami kayashqa.
16 “Tsay dibüjukunata rikaykullarmi Babilonia runakunawanpis kakuyta munar kachata kacharqan pushamunanpä. 17 Tsaynöpami Babilonia runakuna chäyämuptin jukninwan jukninwan kakur pasaypa jutsata rurashqa. Tsaynö jutsata rurarmi melananqanyaq paykunawan kakushqa.
18 “Mana penqakuypa pitapis lluta waynäkuptin ñañanta rikayta mana munanqänöllami Aholibatapis rikayta munashqätsu. 19 Tsay jananmanpis Egiptucho jipashllarä kaykar pïmaywanpis kakunqanta yarpaskirmi mana penqakuypa pïmaywanpis kakushqa. 20 Egiptucho pasaypa mañösa karmi pïmaytapis waynäkushqa. Tsay runakunapaqa compañonninkunapis ashnupanörämi y lichinpis cawallupanörämi kashqa. 21 Tsaymi jipashllarä kaykar Egipto runakunawan kakunqannö kakushqa. Chuchunkunatapis yataparmi tsaycho perditsiyashqa”.
22 Tsaymi Tayta Dios nin: “Aholiba, kananqa melananqayki waynaykikunawanmi chikitsishayki. Tsaymi ushakätsiyäshunaykipä maytsaypitapis shayämunqa. 23 Tsay runakunami shayämunqa Asiriapita y Babiloniacho Caldeapita. Tsay caldeo runakunami kayanqa Pecod, Soa y Coa partikunapita. Llapanpis kayanqa kuyayllapä chölukuna, capitankuna, mandaqkuna y cawallun muntashqa reqishqa runakunami.
24 “Maytsay nacionpitami atska soldädukuna atacayäshunaykipä carrëtankunawan shayämunqa. Escüdunkuna y armankuna aptashqa y fiërru cascunkuna jatishqami shayämunqa. Castigayäshunaykipä kachaptïmi munayanqannö castigayäshunki. 25 Pasaypa rabyanashqa karmi paykunata kachashä vincishurniki senqaykita y rinrikita roquyäshunaykipä. Wawaykikunata ollqutapis warmitapis qechuyäshurnikimi espädawan wanutsiyanqa. Nirkurmi llapan imaykaykikunatapis rupatsiyanqa. 26 Latsapaykikunatapis alhäjaykikunatapis llapantami apakuyanqa.
27 “Tsaynöparämi Egiptucho pïmaywanpis mañösayar kakunqaykinö kankinatsu. Mananami ïdulukunata adoraykankinatsu ni Egipto runakunapä yarparaykankinatsu”.
28 Tayta Diosmi nin: “Chikinqayki nación runakunapa munayninman y melananqayki runakunapa makinmanmi kachaykushayki. 29 Paykuna pasaypa chikiyäshurnikimi qoriyanqaykita qechur qarapachäyäshunki. Penqakuypä pïmaywanpis lluta kanqayki chipyaqmi musyakanqa. 30 Tsaynö ñakanaykipä kikikimi jutsayuq kaykanki. Qamqa juk nación runakunawanmi kakushqayki y paykuna adorayanqan ïdulukunatami adorashqayki. 31 Ñañayki ruranqannöllami qampis rurashqayki. Tsaymi ñañaykita uputsinqä castïgu cöpäta qamtapis uputsishayki”.b
32 Tayta Diosmi nin: “Ñañaykita uputsinqä jatunkaray cöpapitami uputsishayki.† Tsay cöpaqa anchu y jondumi. Tsaypita upuptikimi pïmaypis manakaqman churashurniki asipäyäshunki. 33 Tsay cöpaqa ñañayki Samaria upunqan mantsariypä cöpami. Tsaymi tsaypita upur macharnin pasaypa llakikunki. 34 Chipyaq upuskirmi tsay cöpata pakirir chuchuykitapis qashar ushanki”. Tayta Diosmi tsaynö nin.
35 Tsaymi Tayta Dios nin: “Qonqaykamar penqakuypä kawanqaykipitami pasaypa ñakanki”.
36 Tayta Diosmi nimarqan: “Runapa tsurin, Ahola y Aholiba jutsata rurayanqanpita qayapay. 37 Paykuna ïdulukunata adorarmi adulteriu jutsata ruraqnö kaykäyan. Tsaynöpis ïdulukunata adorarmi wawankunata altarcho kayar wanutsikuq kaykäyan. 38 Mana penqakuq karmi wawankunata wanutsiyanqan junaqlla templüman adorayämänanpä yaykuyashqa. Tsaynöpami templüta impüruyätsiyashqa. Jamay junaqtapis manami respitayantsu. 39 Yapaymi nï: Ïdulunkunata adorar wawankunata kayayanqan junaqllami adorayämänanpä yaykur templüta manakaqman churayashqa. ¡Templütarämi impüruyätsiyashqa!
40 “Tsaynöllami karucho taq runakunata qayatsiyänanpä tsay warmikuna kachata kachayarqan. Qayatsiyanqan runakuna chaykuyaptinmi tsay warmikuna bäñakur ñawinkunata pintakuyashqa y shumaq kayänanpä adornunkunatapis jatikuyashqa. 41 Kuyayllapä cäma jananman tsay runakunawan jamaykurmi ñöpancho kaykaq mësaman sagrädu inciensiutawan perfümitapis churayashqa. 42 Wayincho fiestata rurar qayaräyanqanmi wiyakämushqa. Tsunyaq jirkapita shamuq runakunapis tsayman chaykurmi pulcërakunata y kuyayllapä corönakunata jatitsiyashqa.
43 “Tsaymi yarpayllächo nirqä: ‘Tsay chakwasyashqa mañösa warmikunawan kakuyta munarqa kakuyätsunpis’. 44 Tsay yarpanqänöllami Aholaman y Aholibaman atska runakuna shayämushqa. Mana penqakuq warmi kayaptinmi jukninpis jukninpis paykunawan kakuyashqa. 45 Tsaynö kayanqanpitami jutsaynaq runakuna tsay warmikunata juzgayanqa. Majanta engañaq warmi kayanqanpita y wanutsikuq kayanqanpita juzgarmi condenayanqa.† Wanutsikuq kayaptin makinkunapis yawarllanami kaykan”.
46 Tsaymi Tayta Dios nin: “Paykunata atacayänanpä atska runakunata kachamuptïmi llapan imaykantapis apakuyanqa, 47 saqmar ushayanqa, espädankunawan tuksiyanqa, wawankunatapis ollquta warmita wanutsiyanqa y wayinkunatapis kayar ushayanqa. 48 Tsaynöpami kay nacioncho melanaypä mana alli ruraykunata ushakätsishä. Tsayta rikarmi wakin warmikunapis tsaynö kayanqanatsu. 49 Tsay warmikuna ïdulukunata adorayanqanpitami castigashä. Tsayrämi Tayta Dios kanqäta musyayanki”.