Jerusalén runakuna jutsata rurayanqan
22
Tayta Diosmi nimarqan: 2 “Runapa tsurin, wanutsikuq kayanqanpita Jerusaléncho taqkunata qayapay. Mana kachaypa melanaypä kaqkunata rurayanqanpita qayapar 3 niy: ‘Tayta Diosmi nin: Marka mayikikunata wanutsiyanqaykipita y ïdulukunata rurar pasaypa impüru rikakuyanqaykipitami ushakäyänaykipä kaq höra chaykämunna. 4 Runakunata wanutsir y rurayanqayki ïdulukunata adorarmi pasaypa jutsata rurayashqayki. Tsaynö karmi ushakäyänayki junaq chämunanpä pasaypa munayashqayki. Ushakätsiptïmi maytsay nación runakuna ashlliyäshurniki penqakuyman churayäshunki. 5 Pasaypa mana alli kayanqaykipitami cercacho taqkunapis y karucho taqkunapis asipäyäshunki.6 “ ‘Autoridänikikunapis autoridä kayninman yärakurmi pitapis llutalla wanutsiyan. 7 Manami mamaykita ni taytaykita respitaykäyankitsu.† Jäpa runakunatapis ñakaykätsiyankimi. Viüdakunata y waktsakunatapis manakaqmanmi churaykäyanki.† 8 Sagrädu kaqkunata y jamay junaqkunatapis mana respitarmi munayanqaykikunata ruraykäyanki.† 9 Pitapis llutalla tumparmi wanuykätsiyanki. Jirkankunacho ïdulukunapä mikuyta kusinarmi fiestatapis ruraykäyanki. Pasaypa melanaypä kaqkunatami ruraykäyanki.
10 “ ‘Wakinnikiqa mädistaykikunawanmi kakuykäyanki. Wakinnikinami warmiki killa qeshyanwan kaykaptinpis respitayankitsu. 11 Wakinnikimi juk runapa warminwan kakuykäyanki. Wakinnikinami llumtsuynikikunawanpis y legïtimu panikikunawanpis kakuykäyanki.† Taytaykipa tsurïpakuynintapis manami respitaykäyankitsu.
12 “ ‘Wakinnikimi päguta chaskiykäyanki runa mayikita wanutsiyänaykipä. Wakinnikinami qellayta mañaykurpis wachayninta mañaykäyanki.† Mana cäsukamarmi runa mayikikunata tsaynö ñakaykätsiyanki. Tayta Diosmi tsaynö nin’.
13 “ ‘Imapäpis mallaqashqa kayanqaykipita y runa mayikikunata wanutsiyanqaykipitami pasaypa ajanä. 14 Castiganqä junaq manami imapäpis valornikikuna ni kallpaykikunapis kanqatsu. Noqa ninqäqa ninqämi kanqa. Tsaymi ninqäta cumplishä.
15 “ ‘Qamkunata castigarmi maytsay nacionkunaman qarquyäshayki.† Tsaynöparämi jutsa ruraypita jipiyäshayki. 16 Qamkunata castiganqäta rikarmi wakin nación runakuna penqakatsiyäshunki. Tsayrämi Tayta Dios kanqäta musyayanki’ ”.
17 Yapaymi Tayta Dios nimarqan: 18 “Runapa tsurin, broncita, estäñuta, fiërruta y plömuta jornucho tsullutsiptin qanran yarqur imapäpis mana välinqannömi Israel mayikikuna ni imapäpis väliyantsu. 19 Paykunata niy: ‘Tayta Diosmi nin: Llapaykikunami imapäpis mana väliq qanranö kaykäyanki. Tsaymi Jerusalén marka chawpiman muntunaskir castigayäshayki. 20 Qellayta, cobrita, fiërruta, plömuta y estäñuta jornucho tsullutsinqannömi noqapis pasaypa ajar castigayäshayki.
21 “ ‘Jerusalén chawpinman qoriykurmi pasaypa ajar ushakätsiyäshayki. 22 Imanömi qellayta jornucho tsullutsiyan tsaynömi qamkunatapis marka chawpincho castigayäshayki. Tsayrämi musyayanki noqa Tayta Dios pasaypa rabyanar castiganqäta’ ”.
23 Yapaymi Tayta Dios nimarqan: 24 “Runapa tsurin, Israel runakunata niy: ‘Ajanarnin castiganqä junaqqa shullyapis ni tamyapis mana chänan chakranömi kayanki.
25 “ ‘Profëtaykikunapis mallaqashqa leonkuna uywata mikuqnömi runakunata wanuykätsiyan. Nirkurmi riquëzankunata y väliq kaqkunata imaykankunatapis apakuyan. Tsaynöpami viüdakunapis atska kaykäyan.
26 “ ‘Sacerdötikikunapis leynïkunata mana respitarmi sagrädu kaqkunata lluta manijakuyan. Sagrädu kaqkuna y mana sagrädu kaqkuna mayqan kanqantapis manami cäsuyantsu. Tsaynöpis püru kaqkuna y impüru kaqkuna mayqan kanqantapis manami cäsuyantsu.† Jamay junaqkunatapis mana respitarmi munayanqanta rurar penqakuyman churaykäyäman.
27 “ ‘Autoridänikikunapis uywakunata mikuq löbunömi kaykäyan. Runakunata wanuskatsirmi imaykantapis apakuyanqanwan rïcuyaykäyan. 28 Tsaynö jutsata rurayaptinpis rabyananqäta profëtaykikuna manami willakuyantsu. Tsaypa trokinqa juchunaykaq murällata shumaq kananpä llushtaqnöllami llutankunaman yärakatsiyan. Imatapis mana parlapaykaptïmi tsay profëtaykikuna “Tayta Diosmi nimashqa” nir llullakuykäyan.
29 “ ‘Qamkunacho taq común runakunapis suwakuyanmi. Waktsakunatapis y ñakaqkunatapis manakaqmanmi churayan. Nacionnikicho taq jäpa runakunatapis ñakatsiyanmi.