Jerusalénta espädanwan Tayta Dios castigananpä ninqan
21
(6) Tayta Diosmi nimarqan: 2 (7) “Runapa tsurin, Jerusalén kaqläpa tikraykur templuta y Israel nacionta ima päsananpä kaqtapis willay. 3 (8) Israel runakunata willar ninki: ‘Tayta Diosmi nin: Contraykikuna shärirmi churaräkunanpita espädäta jipiskir jutsayuq y mana jutsayuqtapis wanutsishä. 4 (9) Espädäta jipiskirmi norti kaqläpita qallaykur sur kaqläyaq llapanta ushakätsishä. 5 (10) Tsaynöpami pïmaypis musyayanqa noqa Tayta Dios espädäta jipimunqäta. Wanutsiyta manarä usharqa churaräkunanman espädäta manami kutitsishätsu’.6 (11) “Runapa tsurin, llapan runakunapa rikanancho pasaypa llakikur waqay. 7 (12) Imanir waqanqaykita tapuyäshuptiki ninki: ‘Desgracia chämunanpä kanqanta musyarmi waqaykä. Tsay junaqqa pïmaypis kallpaynaqmi rikakuyanqa. Pasaypa almatakashqami llapanpis rikakuyanqa. Pasaypa mantsariywan tsuktsukyäyaptinmi qonqurninkunapis takanakunqarä. Tsaynö kananpä junaq chaykämunnami. Wallkallanami tsaynö kananpä pishin. Tayta Diosmi tsaynö nin’ ”.
“ ‘Tayta Diosmi nin:
Alli afilashqami espäda kaykan.
Afilashqa karmi pasaypa chipipiykan.
10 (15) Wanutsinanpä alli afilashqami kaykan.
Pasaypa chipipirrämi kaykan.
Tsaynö kaykaptinqa reymanpis ama yärakuyaytsu.
Paytapis ushakätsinqami.
11 (16) Tsay espädami alli afilashqa kaykan.
Pasaypa chipikyanqanyaq afilashqami kaykan.
Wanutsikuqta aptarkatsinäpäpis listunami kaykan.
12 (17) “ ‘Runapa tsurin, pasaypa qayarar waqay.
Kuyanqä runakunata wanutsinanpänami tsay espäda kaykan.
Israel nacionpa autoridäninkunatapis wanutsinanpänami kaykan.
Llapan runakunatami wanutsinqa.
Tsaypita llakikur pëchuykita takay.
13 (18) Llapanpämi ñakay chämunqa.
Reypis espädawan wanutsishqami kanqa.
Noqa Tayta Diosmi tsaynö nï.
14 (19) “ ‘Runapa tsurin, makikita jitarrä ima päsananpä kaqtapis jutïcho willakuy.
Ushakäyänanpä kanqanta runakuna tantiyayänanpä ishkay kimsa kutirä espädata kuyutsiy.
Mantsariypä atskata wanutsinanpämi kaykan.
15 (20) Runakunapa kallpanpis manami kanqanatsu.
Ayakunapis atskami mashtaräyanqa.
Runakunata wanutsinanpämi marka punkunkunaman wanutsikuq espädata churashqä.
Tsay espäda shumaq afilashqa karmi chipipinrä.
Wanutsinanpä alli afilashqami kaykan.
16 (21) “ ‘¡Espäda, derëcha kaqläpa y itsuq kaqläpapis roquy!
¡Mayqan kaqläpapis kutsuy!
17 (22) Tsaynö roquptikimi noqapis makïta jitarrä kaykäshä.
Rabyanaynï qallqunqanyaqmi tsaynö wanutsinki.
Tayta Diosmi tsaynö nin’ ”.
18 (23) Tayta Diosmi yapay nimarqan: 19 (24) “Runapa tsurin, Babilonia nacionpa mandaqnin rey espädanwan shamunanpä mäpacho ishkay nänita dibujay. Juk nacionllapita ishkan näni yarqamutsun. Cada näni qallanancho letrëruta churanki mayqan markaman aywaykanqantapis musyananpä. 20 (25) Juk nänita dibujanki amonita runakuna täyanqan Rabá markaman chänanpä. Jukaq nänitana dibujanki Judá nacioncho kaykaq jinchi murallashqa Jerusalén markaman chänanpä.
21 (26) “Mayqan nänipapis aywayta mana kamäpakurmi tinkuq nänicho Babilonia nacionpa mandaqnin rey suertita qatir flëchakunata chunkanqa. Tsaynöllami ïdulunkunata tapukur uywakunapa ñatinninkunatapis rikanqa. 22 (27) Tsaynö suertita qatiptinmi derëcha kaqlä nänipa aywananpä yarqunqa. Tsay derëcha kaqläpami Jerusalén kaykan. Tsaymi soldädunkunata rey juklla ninqa Jerusalénman aywar atacayänanpä. Tsaynöllami ninqa wanutsir qallaykuyänanpä, jinchi qayaräyänanpä, punkukunata pakiskir yaykuyänanpä, marka murälla waqtankunapa allpata qotuyänanpä y tsay murällapa ñöpankunacho törrikunata shäritsiyänanpäpis.
23 (28) “Babilonia nacionpa mandaqnin reywan willanakushqa karmi tsaynö atacananpä kanqanta Jerusalén runakuna criyiyanqatsu. Mana criyiyaptinpis contran shäriyanqanpitami paykunata prësu apanqa.
24 (29) “Tsaymi Jerusalén runakunata willanki noqa Tayta Dios ninqäta: ‘Qamkunaqa mana allikunallatami ruraykäyanki, mana mantsapakuypami jutsata ruraykäyanki y llutan ruraykunallatami ruraykäyanki. Tsaynö kayanqaykipitami prësu aywayanki.
25 (30) “ ‘Israel runakunapa mandaqnin rey, mana alli runa kanqaykipitami qamman castïgu chaykämunna.† 26 (31) Noqa Tayta Diosmi nï: Umaykicho jatiraykanqayki görrata y corönaykita jipiy. Llapanpis juknönami kanqa. Tsaymi penqakuyman churashqa runakuna alliman churashqa kayanqa. Chölu tukuqkunanami manakaqman churashqa kayanqa. 27 (32) Entëru Jerusaléntapis chipyaq ushakätsiptïmi raqällana rikakunqa. Tsaynö kanqa kachamunqä runa chämur juzgaptinmi. Paypa munayninmanmi llapanta churashä’.
Amonita runakunata castigananpä ninqan
28 (33) “Runapa tsurin, Israel runakunata ashlliq amonita runakunata† willar niy: ‘Tayta Diosmi nin: Wanutsikuq espäda churaräkunanpita jipishqanami kaykan. Ashi ashiykur ushakätsinanpänami tsay espäda alli afilashqa chipipirrä kaykan.
29 (34) “ ‘Qamkuna revelacionta rikayanqaykikuna manami rasunpaypatsu. Suerti qatiqnikikunapis llullapaykäyäshunkimi. Mana cäsukuq mana alli runakuna, tsay espädami kunkaykikunata roqunqa. Tsaynö wanuyänaykipämi höraykikuna chämushqana kaykan.
30 (35) “ ‘Amonita runakuna, espädaykikunata churaräkunanmanna kutitsiyay. Yuriyanqayki markachömi juzgashayki. Shakshayanqayki nacionchömi castigashayki. 31 (36) Lunyaypa lunyar nina rupaqnö pasaypa rabyanarmi ushakätsikuq y mana alli runakunapa makinman churaykushayki. 32 (37) Tsakishqa qewanömi rupar ushakäyanki. Yawarnikikunapis entëru nacionchömi mashtaranqa. Tsaynö ushakäyaptiki manami pipis yarpäyäshunkinatsu. Tayta Diosmi tsaynö nin’ ”.