Prostitüta warmiman Jerusalénta tinkutsinqan
16
Tayta Diosmi nimarqan: 2 “Runapa tsurin, Jerusalén runakuna llutankunata rurayanqanta tantiyatsir qayapay. 3 Jerusalén markata ninki: ‘Tayta Diosmi nin: Jerusalén, ¡qamqa kaykanki Canaáncho yuriq warmillami! ¡Taytaykiqa amorreo castallapitami! ¡Mamaykipis heteo castallapitami! 4 Yurinqayki junaq manami pipis pupu watuykita roqurqantsu. Manami pipis mayllatsishurqaykitsu ni kachi yakuwanpis llushipäshurqaykitsu. Inchanawanpis manami inchashurqaykitsu. 5 Manami pipis kuyapäshurqaykitsu. Kuyapäshunaykipa trokinmi melanäyäshurniki jitaskiyäshurqayki.6 “ ‘Tsaymi ñöpaykipa päsar yawarllana qoshpaykaqta rikarqä. Tsayta rikarmi kuyapar nirqä: “¡Ama wanuytsu!”
7 “ ‘Qoriskirmi jachanö jatunyänaykipä shakshätsirqä. Shaksharnami kuyayllapä jipashyarqayki. Chuchuykikuna pukshuptinmi shapraykipis yurirqanna. Tsaynö kaptinpis latsapaynaq qallapächullami kaykarqayki.
8 “ ‘Tsaypita ñöpaykipa yapay päsarmi rikarqä jipash poquraykaqna kar majatsakänaykipä allina kaykanqaykita. Tsaymi warmï kanaykipä qoriskir qallapächulla kaptiki punchüwan tsapaykurqä. Nirkurmi majatsakänantsikpä pactuta rurarqantsik. Tsaypitanami noqapa warmïna kashqayki’.† Tayta Diosmi tsaynö nin.
9 “ ‘Tsaypitanami yawarllana kaykaqta bäñaskatsir perfümita wiñaparqä. 10 Nirkurmi kuyayllapä bordashqa latsapata y allinnin kaq zapatuta jatitsirqä. Lïnupita kuyayllapä awashqa tseqlla watuwan wachakätsirnikimi sëda tëlata umaykimanpis shukutatsirqä.
11 “ ‘Shumaq kanaykipämi kuyayllapä adornukunata jatitsirqä. Makikipis shumaq kananpämi brazalëtikunata jatitsirqä. Nirkurmi kuyayllapä kanaykipä wallqatapis wallqatsirqä. 12 Senqaykimanpis kuyayllapä adornutami churaparqä. Rinrikikunamanpis kuyayllapä arëtitami jatitsirqä. Umaykimanpis kuyayllapä corönatami jatitsirqä. 13 Tsaymi qellaywan y qoriwan adornashqa karqayki. Bordashqa latsapaykikunapis lïnupita y sëdapitami karqan. Allinnin kaq tantata, abëjapa mishkinta y olïvupa aceitintami mikurqayki. Kuyayllapä kar y imaykayuqpis tikrarmi reina kaymanpis charqayki. 14 Tsay jatitsinqäkunawanmi pasaypa kuyayllapä karqayki. Kuyayllapä kanqaykitami maytsay nacionkunachöpis parlayaq’ ”. Tayta Diosmi tsaynö nin.
15 “ ‘Tsaynö kaptinpis qamqa kuyayllapä kanqaykiman yärakurmi pïmaywanpis lluta kakushqayki. Munaq kaqwanmi kakushqayki.a 16 Ïdulukunata adorakuna wayikunatami latsapaykikunawan adornayashqayki. Tsaycho ïdulukunata adorarmi juk runawan kakuqnö kashqayki. ¡Imanirtä tsaynö tikrashqayki! ¡Tsaynöqa imaypis ama rurankimantsu karqan!
17 “ ‘Qaranqä qellaypita, qoripita y kuyayllapä alhäjakunapitami runa niraq ïdulukunata ruraykur adorashqayki. 18 Kuyayllapä bordashqa latsapata jatitsinqätami tsay ruranqayki ïdulukunata jatitsishqayki. Nirkurnami aceitïta y inciensiütapis tsay ïdulukunata qarashqayki. 19 Mikunaykipä kamaripanqä allinnin kaq tantata, aceitita y abëjapa mishkintapis tsay ruranqayki ïduluman mushkuynin chänanpämi rupatsishqayki. Tayta Diosmi tsaynö nin.
20 “ ‘Tsaynöllami noqapä entregamanqayki wamraykikunatapis warmita ollqutapis adoranqayki ïdulukunapä rupatsishqayki. Ïdulukunata adoranqaykiwan mana contentakur 21 ¿imanirtä wamraykikunatapis pishtaskir ïdulukunapä rupatsishqayki? 22 Jipashyaskirqa ïduluta adorarmi manana yarpankinatsu wamra kaptiki cuidanqäta ni yurinqayki witsan qallapächu yawarllana qoshpanqaykitapis.
23 “ ‘Tayta Diosmi nin: ¡Allaw! ¡Tsaynö kanqaykipita kanan imarä päsashunki! 24 Pläzakunachöpis ïdulukunata adoranaykipämi tolduta shäritsishqayki. 25 Pïmaywanpis kakunayki raykuqmi cälli esquïnakunachöpis tsaynö rurashqayki. Tsaychömi pïmaywanpis kakushqayki.b
26 “ ‘Jichurpanörä kaptinmi vecïnuyki Egipto runakunawanpis kakushqayki.c Paykunawanpis kakurmi pasaypa ajanätsimashqayki. 27 Tsaynö kanqaykipitami qamta castigar nacionnikita takshayätsiyänanpä chikishuqniki filisteo runakunapa makinman churashqä. Pasaypa mana allita ruranqaykita rikarmi paykunapis penqakuyarqan.
28 “ ‘Mana jimaq karmi Asiria runakunawanpis kakushqayki. Paykunawan mayjina kakurpis manami jimashqaykitsu. 29 Tsaynöllami Babilonia negocianti runakunawanpis kakushqayki. Paykunawan kakurpis manami jimashqaykitsu. 30 Tsaynö kakuptikimi qaqllaykichöpis yawarniki kantsu. Prostitütanö kanqayki ¿manaku penqakuypä kaykan?’ Tayta Diosmi tsaynö nin.
31 “ ‘Cälli esquïnakunacho y pläzakunacho runakunawan kakurmi prostitütanö cobranaykipa trokin pitapis cobrankitsu. 32 Runan qanrataq warminömi kaykanki. 33 Prostitütaqa cobranmi. Qamqa cobranaykipa trokinmi päganki. Tsaynö päganki maytsaypitapis shamuq runakunawan kakunaykipämi. 34 Pägayäshunaykipa trokinqa qammi päganki. Tsaynö rurar prostitütapitapis mas peormi kaykanki.
35 “ ‘Pïmaywanpis kakuq Jerusalén, Tayta Dios ninqanta wiyay. 36 Tayta Diosmi nin: Mana penqakuypami qarapachakur waynaykikunawan kakushqayki.d Tsaynöpis ïduluykikunata adoranaykipämi wawaykikunatapis altarcho wanutsishqayki. 37 Tsaymi kuyanqayki kaqkunatapis y chikinqayki kaqkunatapis llapan waynaykikunata ñöpaykiman qorimushä. Paykunapa ñöpancho qamta qarapachaptï llapanpis penqaynikita rikayaptinmi pasaypa penqakunki.†
38 “ ‘Jukwan jukwan rakchatämanqaykipita y wanutsikuq kanqaykipitami pasaypa rabyanar castigashayki. 39 Tsaymi waynaykikunapa makinman churaykuptï shäritsinqayki tolduykikunata y cämaykikunatapis ushakätsiyanqa. Latsapaykikunata qechuyäshurnikimi adornuykikunatapis apakur jinayllatana jaqiykuyäshunki.
40 “ ‘Atskaq runakuna shamurmi saqmayäshunki y espädankunawan wanutsiyäshunki. 41 Wayikikunatapis kayarmi ushayanqa. Llapan warmikunapa rikananchömi tsaynö ushakätsiyäshunki. Tsaynöpami prostitüta kanqaykipita ushakätsiptï waynaykikunata pägaykankinatsu. 42 Tsayrämi rabyanaynï qallqunqa. Llutankunata manana ruraptikiqa mananami rabyanäshänatsu.
43 “ ‘Wamra kaptiki cuidanqäta qonqaykurmi llutankunata rurar pasaypa ajanätsimashqayki. Tsay jananmanmi pasaypa mana jimaq kar jukwan jukwan kakushqayki. Tsaynö penqakuypä kawanqaykipitami castigashayki’. Tayta Diosmi tsaynö nin.
44 “ ‘Castigaptï llapan runakunami asipäyäshurniki niyanqa: “¡Wawanpis mamannöllami!”
45 “ ‘Qampa mamaykiqa heteo casta warmimi y taytaykinami amorreo casta runa.e Mamaykipis ñañaykikunapis qowanta y wawankunatami chikiyashqa.f 46 Samaria markami mayor ñañayki. Payqa norti kaqlächömi wawankunawan täyarqan. Qepa kaq ñañaykinami Sodoma marka. Payqa sur kaqlächönami wawankunawan täyarqan. 47 Paykunata rikarmi jutsata rurayashqayki. Nirkurpis paykunapita mas peorrämi llutankunata rurashqayki.
48 “ ‘Noqa Tayta Diosmi jurar nï: Qam ruranqaykinö y wawaykikunag rurayanqannöqa manami ñañayki Sodomapis ni wawankunapis rurayashqatsu. 49 Ñañayki Sodomapis y wawankunapis mikuynin pasaypa atska kaptinmi añaw kawar orgullösa rikakuyashqa. Tsaynö karmi muchuqkunata y ñakaqkunata imaypis yanapashqatsu. 50 Pasaypa allish tukurmi melanaypä jutsata rurayashqa. Tsaynö kanqanta rikarmi illakätsishqä.
51 “ ‘Ñañayki Samariapitapis mas peormi jutsata rurashqayki. Qampa jutsaykipitaqa ñañaykipa jutsan wallkallami kaykan. 52 Mas melanaypä kaqkunata rurashqa karmi ñañaykikunapitapis mas jutsayuq kaykanki. ¡Tsaynö jutsasapa kaykarqa penqakuy!
53 “ ‘Sodomata y Samariatami wawankunatawan yapay yanapashä. Tsaynöllami qamtapis yapay yanapashayki. 54 Yanapaptïpis mana allita ruranqaykipita pasaypami penqakunki. Tsaymi ñañaykikunapis kushikuyanqa qamnö jutsata mana rurayanqanpita. 55 Yanapanqä witsanmi ñañayki Sodomapis wawankunawan y ñañayki Samariapis wawankunawan unay kawayanqannö añawna yapay kawayanqa. Tsaynöllami qampis wawaykikunawan añawna kawayanki.
56 “ ‘Orgullösa kanqayki witsanmi ñañayki Sodomata manakaqman churarqayki. 57 Tsay witsanqa mana allikunata ruranqayki manarämi musyakarqanrätsu. Kananmi itsanqa Edom nación, Filistea nación y llapan vecïnuyki nacionkunapis musyaskir ashlliyäshurniki penqakuyman churayäshunki. 58 Mana jimaq kar pasaypa melanaypä kaqkunata ruranqaykipita castigaptïmi pasaypa ñakanki. Tayta Diosmi tsaynö nin.
59 “ ‘Tayta Diosmi nin: Qamqa pactu ruranqantsikta manakaqman churarmi cumplishqaykitsu. Tsaymi kananqa makïta apanki. 60 Tsaynö castigarpis jipash kanqayki witsan pactu ruranqantsikta manami qonqäshätsu. Tsaymi imayyaqpis alli kawanantsikpä yapay pactuta rurashun. 61 Tsaynöllami mayor ñañaykita y qepa ñañaykita wawaykikunanö kayänanpä makikiman churamushä. Tsaynömi rurashä paykuna wawaykinö kayänanpä mana parlashqa kaptintsikpis. Tsaynö ruraptïmi imanö jutsata ruranqaykitapis yarparkur pasaypa penqakunki.