Jerusalénta mana alli üvaman tinkutsinqan
15
Tayta Diosmi nimarqan: 2 “Runapa tsurin, ¿üvapa tullun imallapäqa allitsurä? ¿Wakin qerukunapita mas allitsurä üvapa qerun kaykan? 3 ¿Üvapa tullunpita tablata rurayanmantsurä? ¿Imata warkunallanpäpis warkukunata rurayanmantsurä?4 “Üvapa tullunqa yantallapämi alli kaykan. Ishkan puntanpa ruparmi shonqunpis rupar ushakan. Tsaynö rupaskirqa imapäpis manami välinnatsu. 5 Manarä rupashqa kaykar imata rurayänanpäpis mana väliykarqa peorrächi rupashqana kar imapäpis välinmantsu.
6 “Tsaymi Tayta Dios nin: ‘Munticho üvapa tullunta kayaqnömi Jerusaléncho taq runakunatapis ushakätsishä. 7 Noqami paykunapa contran rikakushä. Tsaymi ninapita qeshpiyaptinpis ninawan ushakätsishä. Tsaynö contran rikakuptïrämi Tayta Dios kanqäta musyayanqa.
8 “ ‘Imaypis cäsukayämänanpä awniykämarpis mana cäsukayämanqanpitami nacionninta pasaypa tsunyaqman tikraratsishä’. Tayta Diosmi tsaynö nin”.