Ïdulu adoraqkunata castigananpä ninqan
14
Juk ishkay Israel mayor runakunami wayïman chaykamur ñöpäman jamakuyarqan. 2 Tsaymi Tayta Dios nimarqan: 3 “Runapa tsurin, kay runakunaqa ïdulukunatami adorayan. Tsaynö kaykäyaptinqa tapukayämanqanta ¿imanötä paykunata willäman?4 “Paykunata ninki: ‘Tayta Diosmi nin: Mayqaykipis ïdulukunata adoraykarqa profëtaman tapukuq ama aywayaytsu. Aywayaptikiqa ïduluman yärakuyanqaykipitami castigayäshayki. 5 Tsaynö castigaptï capazchi ïdulu adorayta kachariyankiman. Ïdulukunata adorarmi cäsukayämankinatsu’.
6 “Tsaynö kaykaptinqa Israel runakunata niy: ‘Tayta Diosmi nin: Ïdulukunata adorayta y melanaypä mana allita rurayanqaykita kacharirnin ninqäkunata cäsukuyay. 7 Noqata mana cäsukamar mayqan runapis ïdulukunata adoraykar profëtaman tapukuq aywaptinqa kikïmi castigashä, Israel runa o Israelcho taq jäpa runa kaptinpis. 8 Tsay runakunata kikï castigarmi runakuna rikayänanpä ushakätsishä. Tsaynöpami kuyanqä runakunacho tsay niraq runakuna kayanqanatsu. Tsayta rikarmi Tayta Dios kanqäta musyayanki.
9 “ ‘Tsay runa tapukunqanta mayqan profëtapis noqapa jutïcho willakuptinqa tsay profëtatapis kuyanqä Israel runakunacho kaykaqtami illakätsishä. Imata willakurpis noqa Tayta Dios pantatsiptïmi llutanta willakunqa. 10 Tapukuq runatapis y llulla profëtatapis castigashämi. 11 Tsaynö castigaptïmi Israel runakuna qonqäyämanqanatsu ni jutsata rurayanqanatsu. Tsaymi kuyanqä runakuna kayanqa. Noqanami paykunapa Diosnin kashä’. Tayta Diosmi tsaynö nin”.
Jerusalén runakunata castigananpä ninqan
12 Tayta Diosmi nimarqan: 13 “Runapa tsurin, may nación runakunapis mana cäsukamar jutsata rurayaptinqa uywankunata y kikinkunatapis muchuywanmi ushakätsishä. 14 Noé, Daniel y Job tsay nacioncho täyaptinpis runakuna manami castïgupita qeshpiyanqatsu. Tsaypa trokinqa alli kawayanqanpita Noé, Daniel y Jobllami castïgupita qeshpiyanqa”. Tayta Diosmi tsaynö nin.
15 “Tsay nacioncho taq runakunata ushayänanpä y pipis tsaypa mana purinanpämi mikukuq munti uywakunatapis kachashä. 16 Tsaynö castiganäpä kaykaptï tsay kimsan runakuna tsay nacioncho tarpis manami warmi ni ollqu tsurinkunata salvayta kamäpakuyanqatsu. Tsaypa trokinqa kikinkunallami salvakuyanqa. Tsaynö kaptinqa tsay nación chipyaqmi ushakanqa. Noqa Tayta Diosmi tsaynö kananpä jurä.
17 “Tsaynöllami entëru nacionta atacayänanpä soldädukunata kachamuptï runakunata y uywakunata wanutsir ushayaptin 18 tsay kimsan runakuna tsay nacioncho tarpis warmi ni ollqu tsurinkunata salvayta kamäpakuyanqatsu. Tsaypa trokinqa kikinkunallami salvakuyanqa. Noqa Tayta Diosmi tsaynö kananpä jurä.
19 “Pasaypa rabyanar tsay nacionman pestita kachaptï runakunapis uywakunapis ushakäyaptinmi 20 Noé, Daniel y Job tsay nacioncho tarpis warmi ni ollqu tsurinkunata salvayta kamäpakuyanqatsu. Tsaypa trokinqa alli kawaq kayninpami paykunalla pestipita salvakuyanqa. Noqa Tayta Diosmi tsaynö kananpä jurä.
21 “Noqa Tayta Diosmi nï: Jerusaléncho pasaypa ñakayänanpämi chusku castïgukunata kachamushä. Tsay castïgukunami kanqa guërra, mallaqay, mikukuq uywakuna y pesti qeshya.† Tsay castïgukunawanmi runakunapis uywakunapis chipyaq ushakäyanqa.
22 “Tsaymi juk ishkayllana runakuna quëdayanqa. Paykunatami wamrantinta warmita ollqutapis Babiloniaman prësu apayämunqa. Täyanqaykiman chäyämuptinmi ïdulukuna adoraqta y jutsata ruraykaqta rikayanki. Tsayta rikarmi tantiyakuyanki imanir tukuyläya castïguwan Jerusalénta pasaypa ushakätsinqäta. 23 Tsaynöpami tantiyakuyanki paykuna jutsa rurayanqanpita Jerusalénta ushakätsinqäta”. Tayta Diosmi tsaynö nin.