4 “ ‘Israel runakuna, raqällana markakunacho taq atuqkunanömi llulla profëtaykikuna kaykäyan. 5 Marka murälla juchushqa kaykaqta rikarpis mana allitsaqnömi paykunaqa yätsiyäshunkitsu castïgupita qeshpiyänaykipä. Alli profëta karqa castiganä junaq chämuptin salvakuyänaykipämi tantiyatsiyäshunkiman karqan. 6 Paykuna willakuyanqanqa manami rasunpaypatsu. Paykunaqa manapis kachaykaptïmi willakuyänanpä kachanqäta nikäyan. Niyanqannö llapanpis kananpä kanqantami yarpäyan. 7 “Revelacionchömi rikashqä” nirpis llullakuykäyanmi. Ima kananpä kanqanta nirpis manami rasuntatsu parlaykäyan. Imatapis mana revelaykaptïmi noqa parlapanqäta nikäyan.

8 “ ‘Tsaymi llulla profëtakunata noqa Tayta Dios nï: Qamkuna manami rasun kaqtatsu willakuykäyanki. Revelacioncho rikayanqaykitapis manami noqatsu rikatsishqä. Tsaynö llutanta willakuyanqaykipitami qamkunapa contrayki kaykä. Noqa Tayta Diosmi tsaynö nï.

9 “ ‘ “Revelaciontami rikashqä” nir llullakuq profëtakunatami castigashä. Kuyanqä Israel runakuna qorikäyanqanmanpis manami yaykuyanqanatsu. Israel markapa acta librunkunamanpis manami jutinkunata qellqayanqanatsu. Israel nacionmanpis manami kutiyämunqanatsu. Tsayrämi Tayta Dios kanqäta musyayanqa.

10 “ ‘Tsaynö kanqa Israel runakunata imapis mana päsananpä kanqanta criyitsinqanpitami.^† Tsay llulla profëtakuna willakuyanqanqa juchunaykaq murällata yësuwan lashtayanqannöllami kaykan. 11 Juchunaykaq murällata llushtayaptin juchunqannömi llulla profëtakuna willakuyanqanpis manakaqllapä kaykan. Pasaypa mangäda y shukukuynintin runtu tamya shamur juchunaykaq murällata juchutsinqannömi Jerusalénmanpis castïgu char ushakätsinqa. 12 Castïgu chaptinmi tsay llulla profëtakunata niyanqa: “Castïgu mana chämunanpä kanqanta willakuykäyaptiki ¿imanirtä Jerusalén ushakashqa?” ’ ”

13 Tsaymi llulla profëtakunata Tayta Dios nin: “Rabyanarmi shukukuyta wayratsimuqnö, mangäda tamyata y runtu tamyata tamyatsimuqnö ushakätsiyäshayki. 14 Juchunaykaq murälla llushtashqa karpis cimientunkuna rikakanqanyaq ushakanqannömi qamkunapis castigaptï ushakäyanki. Tsayrämi Tayta Dios kanqäta musyayanki.

15 “Jerusalénta y llulla profëtakunata ushakätsiptïrämi ajanaynï qallqunqa. Nirkurnami willayäshayki llulla profëtakunapis Jerusalén markapis ushakashqana kanqanta. 16 Jerusaléncho mana alli kaykaptinpis alli kaway kananpä kanqanta willakuqkuna llapanmi ushakäyanqa”. Tayta Diosmi tsaynö nin.

17 “Runapa tsurin, llullakuq profetïsakunaqa yarpayllanpitami noqapa jutïcho willakuykäyan. Paykunata ninki: 18 ‘Tayta Diosmi nin: ¡Allaw runata engañar puriqkuna! Qamkunaqa kuyanqä runakuna suertiyuq kayänanpä llullaparmi maki muñicankunaman watakuyänanpä cintata awaykäyanki y umankunaman shukutakuyänanpäpis jakuta awaykäyanki. ¿Imanirtä kuyanqä runakunata tsaynö engañaykäyanki?

19 “ ‘Tsaynö manakaqkunata jutïcho rurarmi manakaqman churaykäyämanki. Juk aptay cebädallapä y juk amuy tantallapämi kuyanqä runakunata llullapaykäyanki. Tsaynö llullapäyaptikimi jutsaynaqkuna wanuyan y jutsayuqkuna kawayan.

20 “ ‘Tsaymi Tayta Dios nin: “Maki muñicaykiman awanqäta watakurmi suertiyuq kanki” nirmi kuyanqä runakunata engañaykäyanki. Tsaymi qamkunapa contrayki kaykä. Pishqukunata jaulacho wichqarätsiqnömi kuyanqä runakunata engañar munaynikikunacho kaykätsiyanki. Pishqukunata jaulapita jipiqnömi makikikunapita paykunata jipishä. 21 Nirkurmi tantiyatsishä shukutakuyanqan jakukunaman manana criyiyänanpä. Yapayqa mananami tsaykunaman criyiyanqanatsu. Tsayrämi Tayta Dios kanqäta musyayanki.

22 “ ‘Qamkunaqa llullaparmi alli runakunata llakikuyman churaykäyanki. Llakishqa kayänanta mana munaykaptïmi llakikaykätsiyanki. Mana alli runakunatanami llutankunata rurayänanpä parlapaykäyanki. Tsaymi castïgupita salvakuyänanpä jutsa rurayta kachariyantsu. 23 Qamkunata castigaptï manami llullakuyankinatsu ni suertitapis qatiyankinatsu. Kuyanqä runakunata noqami makikikunapita jipishä. Tsayrämi Tayta Dios kanqäta musyayanki’ ”.