Profëta Ezequiel prësunö aywaq tukunqan
12
Tsaypitanami Tayta Dios nimarqan: 2 “Runapa tsurin, mana wiyakuq runakuna täyanqanchömi taykanki. Tsay runakuna ñawiyuq karpis manami rikayantsu. Rinriyuq karpis manami wiyayantsu.† Mana wiyakuq karmi tsaynö kayan.3 “Tsaymi qepikita kamarikuskir llapan runa rikaykäyäshuptiki prësu aywaykaqnö aywaq tukunki. Pïmaypis rikaraykäshuptiki taykanqaykipita jukläpa aywakunki. Tsaynö rikayäshurniki mana wiyakuq kayanqanta capazchi tantiyakuyanman.
4 “Juklä nacionman prësu apayäshunaykipänö kamarikunki. Nirkur llapan rikaraykäyäshuptiki kamarikunqayki qepikita junaqpa jipinki. Tardipanami llapanpa rikanancho prësu aywakuykaqnö wayikipita yarqunki. 5 Wayikipita yarqunaykipämi llapanpa rikanancho adöbita uchkuskir qepikita aparikurkur tsaypa yarqunki. 6 Patsa tsakaskiptin llapan rikaraykäyäshuptiki qepikita aparikurkur aywakunki. Qepaman mana rikanaykipä qaqllaykita tsapakunki. Tsaynöpami Israel runakunata tantiyatsinki nacionninpita prësu yarquyänanpä kanqanta”.
7 Tsaymi Tayta Dios nimanqannölla llapanta rurarqä. Juklä nacionman prësu apayämaptin aywaqnömi kamarikurqä. Junaqpami apanäpä kaqkunata jipirqä. Tardipanami wayipita yarqunäpä adöbita uchkurqä. Patsa tsakaskiptinnami llapan runa rikaraykäyämaptin qepïta aparikurkur aywakurqä.
8 Waraynin tutanami Tayta Dios nimarqan: 9 “Runapa tsurin, mana wiyakuq Israel runakunami tapuyäshunki imanir tsaynö ruraykanqaykitapis. 10 Tsaynö tapuyäshuptiki ninki: ‘Tayta Diosmi nin: Kay rikayanqayki kaykan Jerusaléncho reyta y tsaycho taqkunata ima päsananpä kanqantapis tantiyayänaykipämi’.
11 “Tsaynömi paykunata willanki: ‘Jerusaléncho reyta y tsaycho taq runakunatapis juklä nacionmanmi contrankuna prësu apayanqa. Tsaymi wayïpita yarqunqäta rikayanqaykinölla paykunapis yarquyanqa. 12 Tayta Diosmi nin: Reypis qepin aparishqami murälla pirqata uchkuyanqanpa paqaspa qeshpinqa. Markanta mana rikananpämi qaqllanta tsapakurkur aywakunqa. 13 Tsaynö aywaykaqtami mälläwan tsariskir caldeo runakunapa nacionnin Babiloniaman prësu apatsishä. Tsaynö kaptinpis tsay nacionta manami rikanqatsu.† Tsay nacionllachönami wanukunqa.
14 “ ‘Reypa llapan cuidaqninkunatapis y soldädunkunatapis wakpa kaypami mashtakätsishä. Tsaynö mashtakashqa kaykaqtami qati qatiykur espädawan wanutsishä. 15 Wakinkunanami juklä nacionkunacho y jäpa markakunacho prësu kayanqa. Tsayrämi Tayta Dios kanqäta musyayanqa.
16 “ ‘Juk ishkay runakuna guërrapita qeshpiyänanpämi kamakätsishä. Wakinkunaqa manami qeshyawanpis ni mallaqaywanpis wanuyanqatsu. Contrankuna juk nacionkunaman prësu apayaptinmi tsay nacionkunacho willakuyanqa jutsata rurayanqanpita castiganqäta. Tsayrämi Tayta Dios kanqäta musyayanqa’ ”.
17 Yapaymi Tayta Dios nimarqan: 18 “Runapa tsurin, mikunqayki höra y yakuta upunqayki höra llakikuywan y mantsariywan pasaypa tsuktsukyay. 19 Babiloniacho taykaq Israel marka mayikikunata ninki: ‘Tayta Diosmi nin: Jerusaléncho y Israelcho taq runakuna runa mayinta ñakatsiyanqanpita castigaptïmi nacionninpis tsunyaq rikakunqa. Tsayta musyarmi mikuytapis mantsa mantsa mikuyanqa y yakutapis llakishqalla upuyanqa. 20 Markankunapis raqällana rikakuptinmi entëru nacionpis pasaypa tsunyaqllana kanqa. Tsayrämi Tayta Dios kanqäta tantiyayanki’ ”.
21 Tayta Diosmi yapay nimarqan: 22 “Runapa tsurin, ¿imanirtä Israel runakuna nikäyan: ‘Killatsarkunpis watatsarkunpis tsaynöllami. Profëta willakunqanqa manami imaypis cumplintsu’?† 23 Kanan tsay runakunata niy: ‘Tayta Diosmi nin: Noqami kamakätsishä Israelcho tsay parlata manana parlayänanpä. Profëtäkunawan willakatsinqänöllami llapanpis cumplinanpäna kaykan.
24 “ ‘Kananpitaqa llulla profëtakuna manami Israel runakunata llullapäyanqanatsu ni manakaqkunamanpis yärakaykätsiyanqanatsu. 25 Willakuqnïkuna imata willakuyänanpäpis kikïmi parlapäshä. Willakatsinqänöllami llapanpis kanqa. Manarä wanuyaptikimi ninqänölla llapantapis cumplitsishä. Mana wiyakuq runakuna, tantiyakuyay’. Tayta Diosmi tsaynö nin”.