Mandaqkunatapis jutsata rurayanqanpita castigananpä ninqan
11
Tsaypitanami Espíritu apamarqan Tayta Diospa templuncho kaykaq juk punkuman. Tsay punkuqa rupay yarqamunan kaqlä punkumi karqan. Punku yaykunachömi rikarqä ishkay chunka pitsqa (25) runakunata. Paykunawanmi Azurpa tsurin Jaazanías y Benaíapa tsurin Pelatíaspis kaykarqan. Jerusaléncho taq runakunapa mandaqninkunami paykuna kayarqan.2 Tsaymi Tayta Dios nimarqan: “Runapa tsurin, paykunaqa mana allita rurayänallanpämi yarpachakuyan. Tsaynöpis llutankunatami pïmaytapis yätsiyan. 3 Paykunami niyan: ‘Höra chaykämunnami wayikunata shäritsinantsikpä. Mankacho aytsa següru kanqannömi kay markacho següru kaykantsik’.† 4 Runapa tsurin, tsaynö niyaptinpis ninqäkunata willay”.
5 Nirkurnami Tayta Diospa Espïritun tantiyatsimarqan runakunata willar ninäpä: “Tayta Diosmi nin: Israel runakuna, imata yarpaykäyanqaykitapis y imata nikäyanqaykitapis noqa musyaykämi. 6 Tsaynöllami musyaykä kay markacho atskaqta wanutsiyaptiki cällikunachöpis tsaytsika ayakuna mashtaräyanqanta.
7 “Tsaymi noqa Tayta Dios nï: Niyanqaykinöllami Jerusalén marka imayka mankanö kaykan. Tsaynö kaptinpis mankapita aytsata jipiqnömi Jerusalénpita jipiyäshayki. Wanutsiyanqayki runakunapa ayankunallami mankacho aytsa quëdaqnö Jerusaléncho quëdayanqa. 8 Guërrata mantsayaptikipis guërrawanmi ushakätsiyäshayki. Noqa Tayta Diosmi tsaynö nï.
9 “Kay markapita qamkunata qarqurmi jäpa runakunapa makinman churar castigayäshayki. 10 Nacionnikikunapa mujunninkunacho juzgarmi espädawan wanutsiyäshayki. Tsayrämi Tayta Dios kanqäta musyayanki.
11 “Manami mankacho aytsa wiñaraqnötsu qamkuna kayanki. Ni kay markapis manami mankanötsu tsapäyäshunaykipä kanqa, sinöqa qamkunata juzgarmi nacionnikikunapa mujunninkunachöpis wanutsiyäshayki. 12 Tsayrämi Tayta Dios kanqäta musyayanki. Qamkuna manami munanqänötsu kawaykäyanki ni leynïkunatapis manami cumpliykäyankitsu. Tsaypa trokinqa ñöpaykikunacho kaq nacionkunapa costumbrinkunata yachakurmi llutankunata ruraykäyanki”.
13 Tayta Dios ninqankunata tsaynö willakuykaptïmi Benaíapa tsurin Pelatías wanuskirqan. Tsaymi patsaman lätakaykur qayaraypa rugakur nirqä: “¡Ay Tayta Dios! Juk ishkay quëdaqllantapis Israel runakunata ¿llapantatsurä ushakätsinki?” nir.
Mushuq shonquyuq kayänanpä ninqan
14 Tsaymi Tayta Dios nimarqan: 15 “Runapa tsurin, Babiloniacho taykaq castaykikunapä, wawqikikunapä y llapan Israel marka mayikikunapämi Jerusaléncho taq runakuna nikäyan: ‘¡Babiloniaman apashqa karmi paykunaqa Tayta Diospita karuchöna kaykäyan! Tsaymi kay nacioncho chakrankunata noqantsiktana jaqipamashqantsik’.
16 “Tsaynö niyaptinpis Babiloniacho taykaq Israel marka mayikikunata ninki: ‘Munayyuq Tayta Diosmi nin: Juklä nacionkunaman qamkunata qarqushqa karpis y mana reqiyanqayki markakunaman jitarishqa karpis tsay nacionkunacho qamkunawanmi kaykäshä’.
17 “Mastapis ninki: ‘Tayta Diosmi nin: Tiempu cumpliskiptin maytsay markakunapitami qoriyämushayki. Mashtakashqa kayanqaykipitami Israel nacioncho yapay täyänaykipä kutitsiyämushayki. 18 Kutiykatsimuptïqa llapan ïdulukunata jitarir melanaypä mana alli ruraynikikunatapis mananami rurayankinatsu. 19 Mushuq shonquta y mushuq espïritutami qamkunaman churamushä. Rumi shonquykikunata jipiskirmi alli shonqutana qoykushayki. 20 Tsaymi leynïkunata y llapan ninqäkunatapis cumplirna kawayanki. Qamkunami kuyanqä runakuna kayanki. Noqanami qamkunapa Diosnikikuna kashä.† 21 Melanaypä ïdulukunata adoraqkunatami itsanqa ajanätsiyämanqanpita kikï juzgashä. Noqa Tayta Diosmi tsaynö nï’ ”.
Jerusalénpita Tayta Diospa chipipiynin aywakunqan
22-23 Tsaypitanami querubinkuna ruëdantin pajar Jerusalénpita aywakur rupay yarqamunan kaqlächo kaykaq jirkanman chäyarqan. Paykuna jananchömi Israel runakunata kuyaq Tayta Diospa chipipiynin kaykarqan.†