Tsaynö niptinmi rikaraykaptï Tayta Dios ninqannölla tsay runa yaykurqan. 3 Templupa patiun sur kaqlächömi querubinkuna tsay höra kaykäyarqan. Ruëdakuna kanqanman lïnu latsapashqa runa yaykuptinmi altar kanqan kaq patiuman pukutay juntaskirqan.

4 Tsaymi Tayta Diospa chipipiynin querubinkuna jananpita joqarikarkur Lugar Santu yaykuna punkuchöna takyaskirqan. Templuman pukutay juntaskiptinmi altar kanqan kaq patiuman Tayta Diospa chipipiynin juntarqan.^† 5 Querubinkunapa älankuna sapsapyanqanmi templupa jatun patiunyaq wiyakarqan. Llapanpä munayyuq Tayta Dios parlanqannörämi tsay sapsapyanqan wiyakarqan.

6 Querubinkunapa chakincho kaykaq ruëdakunapita ninata jipimunanpä Tayta Dios nishqa kaptinmi lïnu latsapashqa runa ruëdakuna kaqman aywar ichiskirqan. 7 Juk querubinnami ruëdakuna chawpincho kaykaq shanshata jipiskamur lïnu latsapashqa runata makyarqan. Chaskiskirmi yarqur aywakurqan. 8 Querubinkunapa älankuna rurinpitami runapa makinnö kaykaqta rikarqä.

9 Nirkurnami querubinkunapa chakincho chusku ruëdakuna kaykaqta rikarqä. Cada querubinpa chakinchömi juk ruëda kaykarqan. Imayka crisólito ruminömi tsay ruëdakuna kuyayllapä chipipirqan. 10 Tsay tamäñullami chuskun ruëdakuna kayarqan. Cada ruëda chawpinchömi juk ruëda cruzaypa kaykarqan. 11 Mayqanläpapis aywarqa tsay ruëdakuna manami tikrayaqtsu, sinöqa punta kaq ruëda aywanqallanpami mana tikraypa aywayaq.

12 Querubinkunapa waqtankunacho, makinkunacho, älankunacho y entëru cuerpunchömi ñawinkuna karqan. Tsaynöllami ruëdankunachöpis ñawinkuna karqan. 13 Wiyaykaptïmi tsay ruëdakuna jiruruq kanqanta niyarqan.^†

14 Tsay querubinkunaqa chusku qaqllayuqmi kayarqan. Jukaq qaqllanmi querubinpanö karqan, jukaq qaqllanmi runapanö karqan, jukaq qaqllanmi leonpanö karqan y jukaq qaqllannami ankapanö karqan.^† 15 Tsay querubinkunami pajar aywakuyarqan. Quebar mayu kuchuncho runa niraqkunata rikanqäkunallami tsay querubinkuna kayarqan.^†

16 Querubinkuna aywayaptinqa ruëdankunapis aywayaqmi. Pajayänanpä älankunata kichayaptinpis ruëdakuna manami paykunapita rakikaqtsu. 17 Pajaykäyanqancho ichiskiyaptinqa ruëdankunapis takyaskiyaqmi. Pajar qallaykuyaptinqa ruëdankunapis joqarikäyaqmi. Tsaynö kayarqan querubinkunapa jaynin ruëdakunacho kaptinmi.

18 Tsaypitanami Tayta Diospa chipipiynin Lugar Santu punkucho kaykanqanpita joqarikar querubinkuna jananman churakarqan. 19 Rikaraykaptïmi querubinkuna älankunata kichaskir patsapita pajar rupay yarqamunan kaqlä templu punkuman aywakuyarqan. Pajayaptin ruëdankunapis mana jipikaypami aywayarqan. Tsay punkucho ichiskiyaptinmi Tayta Diospa chipipiyninpis querubinkunapa janancho kaykarqan.

20 Tsay querubinkunaqa Quebar mayu kuchuncho runa niraqkunata rikanqäkunallami kayarqan. Quebar mayu kuchuncho rikaptï Israel runakunata kuyaq Tayta Diospa chakinchömi kayarqan. Tsaymi tantiyakurqä querubinkuna kayanqanta. 21 Paykuna chusku qaqllayuq y chusku älayuqmi kayarqan. Älankuna rurinchöpis runapa makinnömi rikakämurqan. 22 Qaqllankunapis Quebar mayu kuchuncho rikanqänöllami kaykarqan. Tsay querubinkunaqa mana tikramuypami aywayarqan.