2 Tsaymi templupa jatun kaq patiunman yaykuna norti kaqlä punkupa rikarqä soqtantin runakuna pelyayänanpä armankuna aptashqa shamuykaqta. Paykunawanmi juk runa lïnupita rurashqa latsapan jatishqa shamuykarqan. Paymi tseqllancho tsararaykarqan tintata y qellqakuna plümata. Templuman yaykurmi ichiskiyarqan broncipita rurashqa altar ñöpancho.

3 Tsaymi Israel runakunata kuyaq Tayta Diospa chipipiynin querubinkunapa janancho kaykanqanpita Lugar Santu yaykuna punkuman witirqan. Nirkurmi qellqakunanta tseqllancho tsararaq lïnu latsapashqa runata Tayta Dios qayar 4 nirqan: “Entëru Jerusalén markapa aywar munanqänö kawaq runakunata urkuncho señalamuy. Paykunaqa melanaypä mana allikunata rurayaptinmi rabyanäyan y llakikuyan”.^†

5 Nirkurmi wiyarqä tsay soqta runakunata Tayta Dios ninqanta: “Qamkunapis paypa qepanta aywar llapan markata rikapakur tumayämuy. Nirkur mana kuyapaypa ni juktapis mana jaqiypa llapanta wanutsiyämuy. 6 Awkinkunata, chölukunata, jipashkunata, wamrakunata y warmikunatapis llapanta wanutsiyämuy. Señalashqa kaqkunata itsanqa ama wanutsiyankitsu. Templu patiucho kaykaq runakunapita qallaykur wanutsiyanki”.

Tsaynö niptinmi templupa patiun punkucho kaykaq mayor runakunata wanutsiyarqan.

7 Nirkurnami nirqan: “¡Runakunata wanutsir ayakunata templu patiuman qoriyay! Tsaynöpami sagrädunatsu templu kanqa”.

Tsaynö niptinmi tsay arman aptashqa runakuna markacho runakunata wanutsiyänanpä aywayarqan.

8 Tsaynö wanutsiyaptinmi japalläna rikakuskirqä. Tsaymi pasaypa llakikur patsaman lätakaykur nirqä: “¡Ay Tayta Dios! Pasaypa rabyanarnin ¿llapan Israel runakunatatsurä ushakätsinki?”

9 Niptïmi nimarqan: “Israel runakunawan Judá runakunami jutsan poqushqa kaykäyan. Wanutsinakullarmi kay nacioncho kaykäyan. Kay markachöpis jutsata rurallarmi kaykäyan. Tsay runakunami nikäyan kaypita aywakushqa kar jutsata rurayanqanta manana rikanqäta. 10 Tsaymi paykunata manana kuyapäshänatsu ni perdonashänatsu. Tsaypa trokinqa jutsata rurayanqanman tupumi juzgashä”.

11 Tsaypitanami tseqllancho qellqakunata tsararaykaq lïnu latsapashqa runa kutiykamur nirqan: “Nimanqaykita cumplishqänami”.