Melanaypä kaqkunata Jerusaléncho ruraykaqta revelacioncho rikanqan
8
Babiloniaman prësu apayämanqanpita pitsqa wata y pitsqa killa y chusku junaqna taykarmi Judá mayor runakunawan wayïcho jamaraykarqä. Tsaychömi Tayta Diospa munaynin illaqpita noqaman chämurqan. 2 Ñukirkunqächömi rikarqä runa niraq ichiraykaqta. Paymi tseqllanpita jawaman nina tsariykaqnö karqan. Tseqllanpita janamannami chipipiykaq broncinö karqan.†3 Tsay runa niraq aqtsäta aptarkuptinmi Tayta Diospa Espïritun joqarkamar revelacioncho Jerusalénman apakamarqan. Nirkurnami altar kanqan kaq patiu yaykuna punkuman chätsimarqan. Tsay punku kaykarqan norti kaqläpami. Tsaychömi juk ïdulu kaykarqan. Tsayta rikarmi Tayta Dios pasaypa rabyanarqan.
4 Quebar mayu kuchuncho yuripämaptin rikanqänöllami tsaychöpis Israel runakunata kuyaq Tayta Diospa chipipiyninta rikarqä.† 5 Tsaymi Tayta Dios nimarqan: “Runapa tsurin, norti kaqläpa rikay”.
Nimaptinmi norti kaqläpa rikar altarman yaykuna punku ñöpancho Tayta Dios chikinqan ïduluta rikarqä. 6 Tapumarmi nimarqan: “Runapa tsurin, ¿rikankiku Israel runakuna ïduluta adoraykäyanqanta? Tsaynö adorar melanätsiyämaptinmi sagrädu templüpita witikuykä. Tsaynöllami kanan rikanqaykipita peor melanaypätarä rikanki”.
7 Nirkurmi altar kanqan kaq patiu yaykunaman apamarqan. Tsaychömi rikarqä pirqacho uchkuta. 8 Tsaymi nimarqan: “Runapa tsurin, tsay uchkuta mas jatunyätsiy”.
Uchkuta jatunyaykätsinqächömi punkuta tarirqä. 9 Tsaymi nimarqan: “Yaykuy. Tsaychömi tarinki pasaypa melanaypä kaqkunata ruraykaqta”.
10 Tsaymi yaykur juk cuartucho rikarqä llapan casta lätaypa puriq uywakuna y wakin impüru uywakuna llapan pirqacho dibujashqa kaykaqta. Tsaynöllami tsaycho dibujashqa kaykarqan Israel runakuna adorayanqan tukuy niraq ïdulukuna. 11 Nirkurmi qanchis chunka (70) Israel mayor runakuna tsay dibujanqankunata adoraykaqta rikarqä. Tsay mayor runakunawanmi Safánpa tsurin Jaazaníaspis kaykarqan. Cada ünunkuna tsararaykäyanqan inciensiu qoshnitsikuyänanpitami qoshnipis yana yanarä shäriykarqan.
12 Tsaymi Tayta Dios nimarqan: “Runapa tsurin, ¿rikankiku Israel mayor runakuna tsakaycho ïdulukunata pakayllapa adoraykäyanqanta? Paykunami niyan: ‘Tayta Dios manami rikamantsiknatsu. Payqa kaypita aywakushqanami’ ”.
13 Tsaymi nimarqan: “Kanan ruraykäyanqanpita peor melanaypäkunata ruraykäyaqtami rikanki”.
14 Nirkurmi altar kanqan kaq patiu yaykuna juk punkuman apamarqan. Tsay punkupis norti kaqläpami karqan. Tsaychömi rikarqä Tamuz diosta waqapar warmikuna jamaraykäyaqta. 15 Tsaymi Tayta Dios nimarqan: “¿Tsayta rikankiku? Tsayta rikaykanqaykipitapis mas peortarämi rikanki”.
16 Nirkurnami altar kanqan kaq patiupa pushamar Lugar Santuman yaykuna punku kaqman chätsimarqan. Tsaychömi rikarqä ishkay chunka pitsqanö (25) runakuna Tayta Diospa templunpita tumakuskir rupayta adoraraykäyaqta. Tsayqa karqan sacrificiuta rupatsina altarmanpami.†
17 Tsaymi Tayta Dios nimarqan: “Runapa tsurin, ¿rikaykankiku? Tsay niraq melanaypäkunata rurarpis Judá runakuna manami ajayäyantsu. Llapan kay nacioncho mana allikunata rurarmi pasaypa rabyanaykätsiyäman. Rupayta adorayanqanqa qanranörämi asyapäman. 18 Tsaynö rurayanqanpitami pasaypa rabyanar mana kuyapaypa paykunata castigashä. Mayjina qayaraypa rugakayämaptinpis manami perdonashätsu”.