Ushakay junaq chämunanpäna ninqan
“ ‘¡Kay llapan nación ushakänanpä kaq junaq chaykämunnami!
3 ¡Ushakäyänaykipä wallkallanami pishin!
Qamkunata castigarrämi rabyanaynïta qallqütsishä.
Jutsata rurayanqaykiman tupumi juzgayäshayki.
Melanaypä mana allikunata rurayanqaykipitami castigayäshayki.
4 Manami perdonayäshaykitsu ni kuyapäyäshaykitsu.
Tsaypa trokinqa jutsata rurayanqaykiman tupumi juzgayäshayki.
Melanaypä mana allikunata rurayanqaykipitami castigayäshayki.
Tsayrämi Tayta Dios kanqäta tantiyakuyanki’.
5 “Noqa Tayta Diosmi nï:
Qatinakurrämi desgraciakuna qamkunaman shamuykan.
6 Ushakäyänaykipä wallkallanami pishiykan.
Castiganäpä listunami kaykä.
7 “Judácho taq runakuna, ushakäyänayki junaq chaykämunnami.
Janaykichönami tsay junaq kaykan.
Jirkakunachöpis kushikuyänaykipa trokinmi llakikuyanki.
8 Qamkunata castiganäpä manami pishinnatsu.
Pasaypa castigaptïrämi rabyanaynï qallqunqa.
Melanaypä mana allikunata rurayanqaykipitami chipyaq ushakätsiyäshayki.
9 Manami perdonashaykitsu ni kuyapäshaykitsu.
Tsaypa trokinqa jutsata rurayanqaykiman tupumi juzgashayki.
Melanaypä mana allikunata rurayanqaykipitami castigashayki.
Tsayrämi tantiyakuyanki noqa Tayta Dios castigaykanqäta.
10 “¡Ushakäyänaykipä kaq junaq janaykichönami!
¡Tsay junaq chaykämunnami!
Maytsaychömi mana allikunata rurayan y runa tukuyan.
11 Llutankunata rurarmi pïmaypis mana alli tikrayashqa.
Tsaynö kayanqanpitami llapan ushakäyanqa.
Ni riquëzankunapis manami quëdanqatsu.
12 “Tsay junaq janaykichönami kaykan.
Castiganäpä kaq hörapis chämushqanami.
Rantikuq kaq ni rantiq kaqpis ama kushikuyätsunnatsu.
Pasaypa ajarmi runakunata castigashä.
13 Rantikuq runa mana wanurpis rantikunanpä kaqkunata manami tarinqanatsu.
Runakunata ushakätsinäpä willakatsinqänöllami llapanpis kanqa.
Jutsata ruranqanpita castigaptï manami pipis qeshpinqatsu.
14 “Pasaypa ajarmi llapan runakunata castigashä.
Tsaymi cornëtata tukamuptinpis guërraman aywayänanpä pipis kanqanatsu.
15 Tsaypa trokinqa marka rurinchömi pestiwan y mallaqaywan wanuyanqa.
Marka waqtankunacho kaqkunatanami espädawan wanutsiyanqa.
16 Wakinnami mantsakashqa palumakunanö jirkakunaman qeshpiyanqa.
Jutsankunapita tsaynö ñakarmi llapanpis waqayanqa.
17 Llapanpis kallpaynaqmi tikrayanqa.
Mantsariyllawanmi qonqurninkunapis tsuktsukyanqa.
18 “Qachqa latsapata jatikurkurmi aqtsankunatapis qara putuypa rutukuyanqa.
Mantsariywan pasaypa tsuktsukyäyanqa.
Penqakurmi qaqllankunapis pukayashqa umpuräyanqa.
19 Rabyanar ushakätsinqä junaq manami qellayninpis ni qorinpis salvanqatsu.
Qellaynin kaptinpis rantiyänanpä mikuy manami kanqatsu.
Tsaymi qellayninkunatapis cällikunaman mashtariyanqa.
Qorinkunatapis mana väliq qanratanömi jitariyanqa.
Tsaynö kanqa qoripä y qellaypä raykuq jutsata rurayanqanpitami.
20 “Kuyayllapä qori adornunkuna kaptinmi pasaypa runa tukuyashqa.
Tsay adornukunapitami melanaypä ïdulukunata rurayashqa.
Tsaymi tsay adornunkunapis melanaypäna kanqa.
21 Kachariptïmi jäpa runakuna imaykantapis suwapäyanqa.
Mana alli runakuna manakaqman churarmi llapan riquëzankunata apakuyanqa.
22 Kuyayllapä templüman suwakuna yaykur impüruyätsiyaptinpis manami imatapis nishätsu.
23 “Kay nacionchöqa wanutsinakuyllami kaykan.
Markacho taqkunapis maqanakullarmi kaykäyan.
Tsaynö kayanqanpitami cadinaräyanqa.
24 Noqami kamakätsishä juklä nación mana alli runakuna chaykamur markacho taq runakunapa wayinkunata qechuyänanpä.
Tsaynöpami munayyuq Israel runakunatapis munayniynaq kayänanpä kamakätsishä.
Respitayanqan altarkunapis manami sagrädunatsu kanqa.
25 Tsaymi runakuna pasaypa mantsariyanqa.
Alli kawayta munarpis manami kamäpakuyanqatsu.
26 “Desgraciakunallami qatinayman chanqa.
Desgraciakuna kananpä kaqllatami pïmaypis parlayanqa.
Profëtata tapukuyaptinpis willananpä revelacionta manami chaskinqanatsu.
Sacerdötikunapis runakunata yätsiyänanpä leynïkunata manami yarpäyanqanatsu.
Mayor runakunapis manami ima yätsiytapis kamäpakuyanqanatsu.
27 Reypis llakikurmi lütuta jatikunqa.
Mandaqkunapis llakikuymanmi churakäyanqa.
Llapan runakunami mantsariywan tsuktsukyäyanqa.
Imanöpis kawayanqanman tupumi paykunata castigashä.
Runa mayinta juzgayanqannöllami kikinkunatapis juzgashä.
Tsayrämi Tayta Dios kanqäta musyayanqa”.