Ïdulukunata adorayanqanpita castigashqa kayänanpä willakunqan
6
Tayta Diosmi nimarqan: 2 “Runapa tsurin, Israel kaqlä jirkakunapa rikaskir castiganäpä kaqta willakunki. 3 Willakur ninki: ‘Israelcho kaykaq jirkakuna, Tayta Dios ninqanta wiyayay. Jirkakunata, jirkankunata, pampakunata, raqrakunatapis Tayta Diosmi nin: Noqami qamkunapa janaykicho pasaypa guërra kananpä kamakätsishä. Ïdulukunata runakuna adorakuyänan altarkunatapis ushakätsishämi. 4 Inciensiu qoshnitsikuyänan y uywakunata rupatsikuyänan altarkunatapis juchutsirmi ushakätsishä. Qamkunacho taq runakunata ïdulukunapa ñöpancho wanutsiyänanpämi kamakätsishä. 5 Ayankunatapis ïdulukunapa ñöpanmanmi qotushä. Altarkunapa waqtankunapami tullunkunatapis mashtashä.6 “ ‘Israel runakuna täyanqan llapan markakunami ushakäyanqa. Ïdulukunata adorayänan altarkunapis ushakätsishqami kanqa. Ïdulukunapis pakir ushashqami qoturäyanqa. Inciensiu qoshnitsikuyänan altarkunapis ushakäyanqami. Runakuna imaykata rurayanqanpis chipyaqmi ushakanqa.† 7 Atskaq runakuna qamkunacho wanuyaptinmi maytsaychöpis tantiyakuyanqa rasunpaypa Tayta Dios kanqäta.
8 “ ‘Tsaynö ushakätsirpis wakin runakuna kawaykar quëdayänanpämi kamakätsishä. Paykunatami maytsay nacionkunamanpis qarqushä. 9 Prësu aywayanqan nacionkunacho tarninmi noqata yarpäyämanqa. Tsaynöllami yarpäyanqa mana cäsukamar melanaypä ïdulukunata adorar pasaypa ajanätsiyämanqanta. Ïduluta rurayaptin melananqäta tantiyakurmi pasaypa penqakur llakikuyanqa. 10 Tsaynöpami tantiyakuyanqa noqa Tayta Dios ninqänölla castiganqäta’ ”.
11 Tayta Diosmi yapay nimarqan: “Makitapis taqllarrä jaytakacharnin qayarar niy: ‘¡Allaw! ¡Israel runakuna melanaypä mana allikunata rurayanqanpita imanörä kayanqa! Jutsankunapitami guërrachöpis, mallaqaywanpis y qeshyawanpis wanuyanqa. 12 Karucho taqkuna qeshyawanmi wanuyanqa. Cercacho taqkunami guërracho wanuyanqa. Kawaykar quëdaqkunami mallaqaywan wanuyanqa. Tsaynö castigaptïrämi ajanaynï qallqunqa.
13 “ ‘Maychöpis ïdulukunata adorar inciensiuwan qoshnitsikuyänan altarkunapa ñöpanchömi ayankuna jitaräyanqa. Tsay altarkuna kanqanchöqa jirkankunachöpis, jirkakunachöpis y llimllasapa jachakuna chakinkunachöpis mashtaräyanqami. Tsaynö castigaptïrämi Tayta Dios kanqäta tantiyakuyanqa.
14 “ ‘Paykunata castigashä sur kaqlä tsunyaq jirkapita hasta norti kaqlächo Ribla marka kaykanqanyaqmi. Maytsay nacioncho täyaptinpis täyanqan partikunata chipyaqmi ushakätsishä. Tsayrämi Tayta Dios kanqäta musyayanqa’ ”.