Jerusaléncho taqkunata castigananpä ninqan
5
Tayta Diosmi nimarqan: “Runapa tsurin, fïlu naväjawan shapraykita y aqtsaykita rutukuy. Nirkur balanzawan pësaskir kimsa partiman rakiy. 2 Juk parti rakinqayki kaqta churanki adöbi janancho ruranqayki Jerusalén chawpinman. Jerusalénta atacayänanpä kanqanta musyatsir rakinqayki aqtsata tsayllacho kayanki. Jukaq parti rakinqayki kaqtana ruranqayki markapa waqtanpa ichishaqllaman rutuskir jichanki. Mas jukaq parti sobraq kaqtana junishpa matsirinki. Tsaynö ruranki Jerusaléncho kawaykar quëdaq runakunata espädäta aptarkur qatikachänäpä kanqanta musyatsinaykipä. 3 Juk ishkay aqtsaykitana cäpaykipa kuchunman watarkunki. 4 Tsay watanqayki aqtsapita wakin kaqta ninaman jitanki. Tsaynöpami musyayanqa Israel runakunapa markankuna kayashqa kayänanpä kanqanta”.5 Tayta Diosmi nin: “Jerusalén markata noqami churarqä llapan markakunapa y nacionkunapa chawpincho kananpä. 6 Tsaynö churaykaptïpis Jerusalén runakunaqa chukru shonqu karmi mandamientükunata y estatütükunata cäsukuyantsu. Leynïkunatapis yätsinqäkunatapis manami wiyakuyantsu”.
7 Tsaymi Tayta Dios nin: “Jerusalén runakuna, mandamientükunata y leynïkunata mana cäsukurmi ñöpaykicho taq nación runakunapa leyninkunallatapis cumpliyankitsu. Paykunapita peormi mana wiyakuq kaykäyanki. 8 Tsaymi contrayki rikakur llapan nación runakunapa rikanancho castigayäshayki. 9 Melanaypä ïdulukunata adorayanqaykipita imaypis mana castiganqäpitami alli cösa castigayäshayki. 10 Tsaynö castigaptïmi pasaypa mallaqarnin wakinniki tsurikikunata mikuyanki.† Tsurikikunapis wakinnikita mikuyäshunki. Tsaynö castigarmi kawaykar quëdaq kaqkunata maytsaypapis qarquyäshayki.
11 “Pasaypa melanaypä mana allikunata templücho rurar impüruyätsiyanqaykipitami illakätsiyäshayki. Manami perdonayäshaykitsu ni kuyapäyäshaykitsu. Noqa Tayta Diosmi tsaynö kananpä jurä. 12 Patsan markachömi wakinniki pesti qeshyawan wanuyanki y wakinnikinami mallaqaywan wanuyanki. Wakinnikitami contraykikuna marka ñöpankunacho wanutsiyäshunki. Y wakinnikitanami maytsaypapis aywakuyänaykipä espädäta aptakurkur kikï qatikachäyäshayki. 13 Tsaynö castigaskiptïrämi ajanaynï qallqunqa. Tsaynöpami tantiyayanki noqa Tayta Dios castiganäpä ninqänölla pasaypa ajanar castiganqäta.
14 “Jerusalén marka, raqällana rikakunqaykiyaqmi ushakätsishayki. Tsaymi ñöpayki nacionkuna y nänipa päsaqkunapis asipäyäshunki. 15 Pasaypa ajanar castigaptïmi ashlliyäshurniki manakaqman churayäshunki. Castigakuq kanqäta tantiyarmi llapanpis mantsariyanqa. Noqa Tayta Diosmi tsaynö kananpä nï.
16 “Wanutsikuq flëchakunatanörämi muchuyta qamkunaman kachamushä. Mikuyänaykipä imatapis mana kamaripaptïmi pasaypa mallaqaywan wanur ushakäyanki. 17 Mallaqayta kachamunqänöllami mikukuq uywakunatapis wamraykikunata mikuyänanpä kachamushä. Pestita, wanutsinakuyta y guërratami qamkunaman kachamushä.† Noqa Tayta Diosmi tsaynö nï”.