Jerusalénman atacaq yaykuyänanpä ninqan
4
“Runapa tsurin, juk adöbita ñöpaykiman churaykur janancho Jerusalén markata ruray. 2 Toldukunatapis jiruruypa ichïtsiy. Pukllana soldädukunata yaykuykaqtanö jiruruypa churay. Murälla waqtankunapa allpata qotuy. Markaman yaykuyänanpä escalëratapis churay. Murällata juchutsinanpä mäquinakunatapis jiruruypa churay. 3 Nirkur tsay markapita rakishunaykipä juk lätata ichïtsiy. Tsaypita markaman contrankuna atacaq yaykuykaqtanö rikaranki. Tsaynö ruranqaykimi señal kanqa Israel mayikikunata ima päsananpä kanqanta musyayänanpä.4 “Tsaypitana itsuq kaqlänikipa kitiräkunki. Tsaynö kitiranki Israel runakunapa jutsankunata qamta jitapaptïmi. Tsaynö kitirarmi paykunapa jutsankunapita ñakanki. 5 Tsaynö kitiranki kimsa pachak isqun chunka (390) junaqyaq. Cada junaq kitiranqaykimi tinkunqa Israel runakuna cada wata conträ shäriyanqanman.
6 “Tsay junaqkunata cumpliskirnami chusku chunka (40) junaqyaq derëcha kaqlänikipana kitiranki. Tsaynö kitirarmi Judá runakunapa jutsakunapita ñakanki. Juk junaq kitiranqaykimi tinkunqa juk wata conträ shäriyanqanman.
7 “Tsayyaqmi adöbi janancho ruranqayki Jerusalén kaqläpa tikraranki. Camisaykita remangakurkur tsay markata ima päsananpä kanqantapis willanki. 8 Tikrakuytapis mana kamäpakunaykipämi wamrata inchaqnö waskawan inchatsishayki. Tsaynö kanki kitiränaykipä ninqä junaqkuna cumplinqanyaqmi.
9 “Trïguta, cebädata, häbasta, lentëjasta, mijutaa y avënata talluskir aqanqaykita mankaman churay. Tsay aqanqaykipitami tantata ruraskir mikunki kimsa pachak isqun chunka (390) junaq itsuq kaq ñöpaykipa kitirar. 10 Cada junaq media librallata reqishqa höracho mikunki. 11 Reqishqa hörallacho pullan litru yakutapis cada junaq upunki. 12 Cebäda tantata shanshacho kuwanqaykinö tsay tantata kuwaskir mikunki. Runapa chukrushqa ismaninwan shanshata rurarkur tsay tantata kuwanki. Tsaynö ruranki llapan runakunapa rikanancho”.
13 Mastami Tayta Dios nimarqan: “Tsaynömi Israel runakunapis qanra tantata mikuyanqa jäpa nacionkunaman qarquptï”.
14 Tsaymi nirqä: “¡Ay Tayta Dios! Manami imaypis qanrata mikushqätsu. Wamra kanqäpita patsapis manami wanushqa uywapa aytsanta ni jirka uywakuna wanutsinqantapis mikushqätsu. Mana mikuna kaq aytsataqa yawayllapis manami yawashqätsu”.
15 Tsaymi Tayta Dios nimarqan: “Runapa chukrushqa ismaninwan tantayki kuwayta mana munarqa wäka karkawan kuwanki”.
16 Nirkur mastami nimarqan: “Runapa tsurin, Jerusaléncho mikuy ushakänanpämi kamakätsishä. Tsaymi tupushqallatana mikuyta llakishqa mikuyanqa. Yakupis tupushqallana kaptinmi mantsa mantsalla upuyanqa. 17 Mikuypis yakupis ushakaptinmi pasaypa uyutar rikapänakur mantsanakuyanqa. Jutsankunapita tsaynö ñakaykällarmi wanuyanqa”.