5 “ ‘Tsaynöllashi tsay ankaqa Judácho shumaq barbichashqa chakraman juk muruta muruykunä.^c Atska yaku chänanmanshi imayka saucinö wiñananpä murunä. 6 Tsay murunqan jeqamurshi üva plantaman tikranä. Altuyaq mana wiñarpis llimllasapashi kanä. Llimllankuna wiñarshi anka kaykanqan kaqpa makyaränä. Ruriyaq michïkurshi atska ñükayuq kar pasaypa llimllasapayänä.

7 “ ‘Tsaypitanashi jukpis jatunkaray anka chänä. Tsay ankapis jatunkaray älayuq y plümasapashi kanä. Tsayshi tsay üva plantapa michinkuna anka kaykanqan kaqläpana yaykunä. Llimllankunapis anka kaqläpanashi makyaräyänä. Tsaynö tikrayänä tsay anka kaykanqan kaqlächo yaku kaykaqta musyarshi.^d 8 Tsaynö kaptinpis tsay üva plantaqa alli allpacho y atska yaku aywaq kuchunchöshi plantaränä. Tsaychöshi kanä lloqlluypa lloqllurrä wiñar llimllasapayänanpä y alli wayunanpä’.

9 “Tsaynöpis ninki: ‘Tayta Diosmi nin: Tsay üva planta ¿allitsurä wayunqa? Punta kaq anka tsay üva plantapa michinta sutaskiptinmi wayuyninpis shushur ushakanqa. Raprankunapis qarwashtaykarmi tsakinqa. Tsaynö rurananpä manami atska runatarätsu ni alläpa kallpatarätsu ministinqa. 10 Plantaranqanpita jukläman plantaptinpis ¿kawanqatsurä? ¿Manatsurä tsakiskinqa? Rupay yarqamunan kaqläpita wayra shamurmi shumaq sheqlliykaqta chipyaq tsakitsinqa’ ”.

11 Mastami Tayta Dios nimarqan: 12 “Mana cäsukuq Israel runakunata tapunki tinkutsiypa willanqaykita tantiyayanqanta o mana tantiyayanqantapis. Nirkur ninki: ‘Babilonia nacionpa mandaqnin reymi Jerusalénman aywar Judá nacionpa mandaqnin reyta y yanapaqninkunata Babiloniaman prësu apamurqan. 13 Nirkurmi Judá nacionpa mandaqnin reypa castanpita juk runata akrarqan mandaq autoridä kananpä. Nirkurmi pactuta rurar juratsirqan pay ninqannölla Israel nacioncho mandananpä. Kutiykurnami Israelcho alli respitashqa y alli yachaq runakunata Babiloniaman apamurqan. 14 Tsaynöpami Babilonia nacionpa mandaqnin reyqa Judá nación runakunata munaynincho tsarararqan. Judácho mandaq autoridä pactuta rurar juranqanta cumpliptinmi Judá runakuna alli kawayarqan.

15 “ ‘Tsaynö kaptinpis Judácho mandaq runaqa Babilonia reypa contranmi shärirqan.^† Tsaymi Egiptuman runakunata kacharqan cawallukunata y atska soldädukunata apayämunanpä. Babilonia nacionpa mandaqnin reyta sirvinanpä juraykar contran shärir ¿manatsurä castigashqa kanqa? 16 Tsay mandaq runaqa Babilonia nacionchömi wanunqa Judácho mandananpä Babilonia nacionpa mandaqnin rey churaptin juraykarpis mana cumplinqanpitami wanunqa. Noqa Tayta Diosmi tsaynö wanunanpä jurä.

17 “ ‘Babilonia soldädukuna Jerusalén murälla waqtankunapa allpata qotur yaykuyaptin y törrikunata rurar runakunata wanutsiyaptin soldädunkuna washäyänanpä Faraón manami kachanqatsu. 18 Babilonia nacionpa mandaqnin reyta sirvinanpä juraykar makinta qoykarpis mana cumplinqanpitami Judá nacionpa mandaqnin wanunqa’.

19 “Tayta Diosmi nin: ‘Judá nacionpa mandaqnin tsay pactuta rurar imaypis cumplinanpä jutïcho jurarmi awnirqan. Jutïcho awnirpis mana cumplinqanpitami payta castigashä 20 Mällawan tsariqnömi Babiloniaman prësu apayämunanpä payta tsaritsishä. Awnimanqanta mana cumplinqanpitami tsaycho castigashä.^† 21 Mas allinnin kaq soldädunkunapis guërrachömi wanuyanqa. Kawaykar quëdaqkunapis maytsaypami qeshpir aywakuyanqa. Tsayrämi musyayanki ninqäkunata cumpliq Tayta Dios kanqäta’.

22 “Tayta Diosmi nin: ‘Noqapis cedru qerupa ñükanta pakiskirmi altunnin jirka puntaman plantashä.^e 23 Israelcho llapan jirkakunapitapis altunnin kaq jirkamanmi plantashä. Tsaychömi shumaq llimllasapayarnin jatunkaray cedru tikrar alli wayunqa. Tukuyläya pishqukunami qeshunta rurar tsay jachapa llimllankunachöpis täyanqa. 24 Maytsaychöpis llapan jachakunami musyayanqa noqa Tayta Dios jatun kaq jachata mutuskir taksha kaq jachata jatunyätsinqäta. Tsaynöllami musyayanqa lloqlluykaq jachata tsakiskatsir tsakishqa kaq jachata sheqllitsimunqäta. Noqa Tayta Diosmi tsaynö nï. Ninqänöllami llapantapis cumplishä’ ”.