10
Perfümiman qenrash yaykur perditsinqannömi mana tantiyakuq runapis yachaq runa yätsinqanta perditsin.2 Yachaq runaqa allitami yarpan.
Mana yachaq runami itsanqa mana allita yarpan.
3 Mana yachaq runaqa imata rurarpis llutantami ruran.
Tsaymi pïmaypis paypäqa upa kanqanta niyan.
4 Rey ollqutupäshuptikipis ama ajanaytsu.
Wiyaräkurqa rabyashqa kaykaqtapis qallqütsinkimi.
5 Kay patsachömi rikashqä reykuna llutanta rurar 6 mana yachaq runata mandaq kananpä churayanqanta y yachaq runatana pitsapakuq kananpä churayanqanta. 7 Tsaynöllami rikashqä wätay runakuna patronnö cawallun muntashqa puriykäyaqta y patronkuna wätaynö chakillapa puriykäyaqta.
8 Uchkuta uchkuqqa kikinmi tsayman jeqanqa.†
Pirqata paskaptinqa culebrami kaninqa.
9 Rumita llaqllarqa rumiwanmi roqukunqa.a
Yantata tseqtarqa kikinmi kallapakunqa.
10 Jächa loqtuyaptin mana afilarqa mas kallpawanrämi mutuntsik.
Imatapis shumaq yarpachakuskir rurashqaqa mas allimi kaykan.
11 Culebra mana kaninanpä upayätsiyta yachanqanpis kaniptinqa manami välintsu.
12 Yachaq runa parlanqanqa maypis wiyakuy munaymi.
Mana yachaq runa parlanqanqa ajayaypämi kaykan.†
13 Mana yachaq runaqa imaypis manakaqkunallatami parlan.
14 Payqa manami imaypis upällakuntsu.
Waray warantinkuna ima päsananpä kanqanta mana musyaykarqa ¿pirä musyanman wanukuptin ima päsananpä kanqanta?
15 Qela runaqa ichikllata aruykarpis pasaypami pishipan.
Tsaynö karmi imata rurananpäpis musyantsu.
16 Kuyapaypämi juk nación kaykan mandaqnin rey wamralla kaptin y mandashiqninkunapis fiestata rurallar kakuyaptin.
17 Kushikuypämi juk nación kaykan mandaqnin rey yachaq kaptin.
Tsaynöllami kushikuypä kaykan mandashiqninkunapis upyaman churakäyänanpa trokin kallpan kananpä hörancho mikuyaptin.
18 Qela runapaqa wayinpis jutuykällarmi ushakan.
Allitsananpa trokin rikaräkuptinqa juchunmi.
19 Mikuyqa pacha junta mikunantsikpämi.
Vïnuqa kushikunantsikpämi.
Qellayqa imachöpis gastanantsikpämi.
20 Shonqullaykichöpis reypa contran ama yarpaytsu.
Japallayki karpis imaykayuq runapa wasanta ama rimaytsu.
Rimaptikiqa pishqukunallapis willaskinmanchi.