Llapantsikpis ushakaqlla kanqantsik
9
Kay patsacho imanir llapan päsanqankunata musyanäpämi llapan shonqüwan shumaq yarpachakushqä. Tsaynö yarpachakurmi nishqä: Alli runa ni tantiyakuq runa karpis manami musyantsiktsu arunqantsikman Tayta Dios bendicionninta churamunanpä kanqanta o mana churamunanpä kanqantapis.† Tsaynöpis manami musyantsiktsu waray warantinkuna imanö kanantsikpä kanqantapis.2 Musyantsikmi llapantsikpis ushakänantsikpä kanqanta. Ushakäshunmi alli runa o mana alli runa karpis, Dios munanqannö kawarpis o pay munanqannö mana kawarpis, Diospä sacrificiuta rupatsishqa o mana rupatsishqa karpis, jutsaynaq o jutsayuq karpis, allita ruranantsikpä Diosta awnirpis o mana awnirpis. 3 Kay patsacho llapan runapis wanukuqlla kanqanqa llakikuypämi kaykan. “Wanurqa ushakäshämi” nirmi runakuna shonqun munanqannö mana allikunata rurayan. 4 Tsaynö kaptinpis wanunqantsikpitaqa kawaykanqantsikmi mas alli kaykan. Parlapis ninmi: “Wanushqa leonpitaqa awkis allqullapis mas allimi kaykan”.
5 Llapantsikpis musyantsikmi wanunantsikpä kanqanta. Wanuskirqa manami imatapis musyashunnatsu ni munashunnatsu. Wanuskishqaqa manami pipis yarpämäshunnatsu. 6 Tsaynöllami kuyakuq kaynintsikpis, chiki kaynintsikpis y imata munanqantsikpis ushakanqa. Tsaymi kay patsacho imatapis rurashunnatsu.
7 Tsaynö kaykaptinqa kawanqaykiyaq mikuyta kushishqa mikunki y vïnuta kushishqa upunki. Tsaynö ruranqaykiqa Tayta Diospa shonqunpänömi kaykan. 8 Llakikunaykipa trokinqa alli latsapata jatikurkur perfümita umaykiman wiñakunki.
9 Kay patsacho Tayta Dios qaramanqantsik kaway päsaqlla kaykaptinqa warmikiwan kuyanakur qoyay qoyay kushishqa kawanki.† Tsaynö kawanqaykimi päguyki kaykan kay patsacho pasaypa ñakar arunqaykipita. 10 Tsaynö kaykaptinqa llapantapis kushishqa ruranki. Wanuskirqa manami imatapis rurankinatsu, yachankinatsu ni musyankinatsu.
11 Kay patsacho mas imata rikanqätapis kanan willashayki.
Mas cörriq karpis llallinakuycho manami siempritsu gänan.
Mas kallpayuq karpis pelyacho manami siempritsu vincin.
Mas tantiyakuq karpis manami siempritsu imaykayuqpis kaykan.
Mas alli yarpayyuq karpis manami siempritsu mas qellayta gänan.
Mas yachaq karpis manami siempritsu kuyashqa kaykan.
Llapantsikpämi allipis mana allipis suertintsik kaykan.
12 Tsaynöpis manami musyantsiktsu imay höra desgracia päsamänantsikpä kanqanta. Mällawan pescäduta illaqpita tsarinqannö y trampawan pishquta illaqpita tsarinqannömi runatapis desgracia illaqpita tsarin.
13 Kay patsacho mas juktapis rikashqämi. Kanan tantiyatsishayki imata rikanqäta y imata tantiyakunqätapis. 14 Rikashqämi juk taksha markacho wallkaqlla runakuna kaykaqta. Tsaymanmi munayyuq rey atacananpä chaykur jiruruypa tsapaskiyarqan. Markaman yaykuyänanpämi soldädunkunawan kamarikuyarqan. 15 Tsay markachömi imaynaq yachaq runa tarqan. Tsay runami yachaq kar marka mayinkunata yätsirqan imanöpapis salvakuyänanpä. Yätsinqannö salvakurpis paytaqa imaynaq kaptinmi pipis cäsurqantsu.
16 Tsayta rikarmi nï: Yachaq kaymi mas alli kaykan kallpayuq kaypitapis.† Yachaq kaptinpis imaynaq runataqa manakaqmanmi churayan y shumaq yätsiptinpis manami cäsuyantsu.
17 Mana tantiyakuq mandaq runa jinchi parlanqanpitaqa mas allimi kaykan yachaq runa yachayllapa parlanqan.
18 Allinnin kaq armapitapis yachaq kaymi mas alli kaykan.
Imallatapis pantashqaqa llapanmi ushakan.