8
Yachaq kayqa kushikuypämi. Yachaq runaqa kushishqami imaypis kaykan.2 Tayta Diospa ñöpancho awninqaykinölla rey nishunqaykita imaypis wiyakuy. 3 Reypa contran ama shäriytsu ni mana alli runakuna rurayanqanta ama ruraytsu. Reyqa tsaynö kaqkunata pasaypami castiganqa.
4 Tsaynöllami rey ninqantaqa pïmay cumplinan. Paytaqa imata ruraptinpis manami pipis michayta puëdintsu. 5 Rey ninqanta cäsukuq runaqa manami castigashqatsu kanqa. Yachaq karqa rey mandanqantami imanö cumplinanpäpis yarpachakun. 6 Cumplinanpä aja kaptinpis yarpachakur y pacienciakurqa cumplinqami. 7 Itsanqa manami musyankitsu ni pipis willashunkitsu waray warantinkuna ima päsananpä kanqantapis.
8 Manami pipis wanuypita qeshpintsu ni imay junaq wanunanpä kanqanta akrayta puëdintsu. Wanuypita washäkunaykipäqa manami ima armapis kantsu. Mana alli kanqaykipis wanuypitaqa manami salvashunkitsu.
9 Kay patsacho imanir llapan päsanqankunata tantiyanäpä yarpachakur y runakuna runa mayinta imanir ñakatsiyanqanta yarpachakurmi tsaykunata tantiyashqä.
Alli runa y mana alli runa imanö kayanqanpis
10 Tsaynöllami rikashqä wakin runakuna sagrädu templuman aywarpis mana allikunata rurayanqanta. Wanuskiptinmi mana alli kanqanta qonqaykur alli kanqanta nir pampayan. Tsayqa llakikuypämi kaykan.
11 Mana alli runata jutsanpita juklla mana castigaptinqa wakinpis llutanta rurayänallanpämi yarparäyanqa.
12 Mana alli runakuna juk pachak (100) kuti jutsata rurayaptinpis y atska wata kawayaptinpis noqaqa musyämi Tayta Diospita mantsapakuqkuna allipä cäsukuyanqanta. 13 Mana alli runaqa Tayta Diospita mana mantsapakur manami allitsu kawanqa ni atska watatsu kawanqa. Tsaypa trokinqa llantuy päsaqnöllami ushakanqa.
14 Tsaynöllami rikashqä alli runakuna jutsa ruraqnöpis pasaypa ñakaykäyaqta. Tsaynöllami rikashqä mana alli runakuna allita ruraqnöpis alli kawaykäyaqta.† Tsaypis llakikuypämi kaykan. 15 Tsaymi nï: Tsaypita llakikunantsikpa trokinqa kushishqa kawashun. Kay patsacho ñakarpis mikushun, upushun y kushishqa kawashun.
16 Kay patsacho imanir llapan päsanqankunata musyayta munarmi shumaq yarpachakushqä. Tsaymi rikashqä punuytapis mana tariypa runakuna aruyanqanta.
17 Tsaynöllami tantiyashqä Tayta Dios kay patsacho llapan ruranqanta pipis mana tantiyanqanta. Imanöpa yarpachakurpis manami tantiyashuntsu. Yachaq runa “noqaqa tantiyämi” nirpis manami rasunpaqa tantiyantsu.