Alli kawanantsikpä yätsinqankuna
7
Alli runa kanqantsikta pïmaypis parlanqanqa chanin perfümipitapis mas allimi kaykan.†Wanunqantsik junaqmi yurinqantsik junaqpitapis mas alli kaykan.
2 Ushakaqlla kaykarqa kawanqantsikyaq yarpäshun wanukuqlla kanqantsikta.
Fiestaman aywanantsikpa trokinqa mas alli kaykan runa wanuptin täpapakuq aywanqantsikmi.
3 Asikunqantsikpitaqa mas allimi kaykan waqanqantsik.
Llakikurqa qaqllantsik jukläyaptinpis shonquntsikchömi shumaq kawanantsikpä yarpachakuntsik.
4 Yachaq runaqa wanuqllapä kanqantami tantiyan.
Mana yachaq runami itsanqa imatapis mana yarpachakuypa fiestan fiestan purikun.
5 Mana yachaq runa alabamanqantsikpitaqa mas alli kaykan yachaq runa yätsimanqantsikmi.
6 Mana yachaq runaqa shiraka lunyar pashtaqnömi llutalla imapitapis asikun.
Tsaynö kanqanpis manakaqllapämi kaykan.
7 Yachaq kanqantsikta yarparpis runa mayintsikta ñakatsirqa mana yachaqmi kaykantsik.
Pipis chaskipakurqa llutan ruraymanmi chan.
8 Aruyta qallar kushikunqantsikpitapis ushaskirqa masrämi kushikuntsik.
Imapitapis juklla rabyakunaykipa trokinqa mas allimi kaykan wiyaräkunqayki.
9 Imapitapis jukllaqa ama ajankitsu.†
Mana yachaq runakunallami tsaynö ajanäyan.
10 Ama ninkitsu: “¿Imanirrä unayqa imapis mas alli karqan?”
Tsaynö nirqa mana yachaq runanömi parlaykanki.
11 Kay patsachöqa yachaq kanqayki allimi.
Yachaq kanqayki y imaykayuq kanqaykimi itsanqa mas alli.
12 Yachaq kaypis y imaykayuq kaypis ima peligrupitapis tsapäshunkimi.
Tsaynö kaptinpis yachaq runaqa imaykayuq runapitapis mas alli kawaytami tarin.
13 Tayta Dios wiksutsinqantaqa manami pipis derechayta kamäpakuntsu.a
Tsaynö kaykaptin Tayta Dios kamakätsinqanta shumaq tantiyakunki.
14 Tranquïlu kawanaykipä destinashqa kaykaptinqa kushishqa kawanki.
Ñakaycho kanaykipä destinashqa kaykaptinqa tantiyakunki kushikuypis llakikuypis Tayta Diospita kanqanta.
Waray warantin imanö kanaykipä kanqantapis manami musyankitsu.
15 Kay vïdächömi rikashqä alli runa kaykarpis manaräpis unayta wanunqanta.
Tsaynöllami rikashqä mana alli runa kaykarpis atska wata kawanqanta.
16 Ama jutsaynaq tukunkitsu ni yachaq tukunkitsu.
Tsaynö karqa kikillaykimi mana alliman chanki.
17 Tsaynöpis jutsata rurankitsu ni mana tantiyakuq kankitsu.
Tsaynö karqa kikillaykimi wanuyta ashiykanki.
18 Tsay ninqäkunata chaskikuy.
Tsaynöpami jutsaynaq tukunkitsu ni jutsata rurankitsu.
Tayta Diospita mantsapakur tsaynö kawaptikiqa llapan ruranqaykipis allimi kanqa.
19 Yachaq karqa ima peligrupitapis qeshpintsikmi.
Tsaymi markata mandaq chunka runakunapitapis yachaq runa mas alli kaykan.
20 Kay patsachöqa manami pipis kantsu allillata ruraq y jutsata imaypis mana ruraqqa.†
21 Runakuna llapan niyanqanta ama cäsunkitsu.
Mana cäsurqa wätayniki wasayki rimanqantapis manami musyankitsu.
22 Qampis atska kutimi jukpa wasanta rimashqayki.
Tsayta manami ñëgankimantsu.
Yachaq kananpä yarpachakunqan
23 Kay patsacho imanir llapan päsanqankunata tantiyanäpämi yarpachakushqä. Imanö yarpachakurpis manami tantiyayta kamäpakushqätsu. 24 Tantiyanapaqa pasaypa ajami. Tsaytaqa manami pipis tantiyayta kamäpakuntsu.
25 Tsaynö kaptinmi yachaq kanäpä y llapan päsanqankunata tantiyanäpä masrä yarpachakushqä. Tsaynöpami tantiyashqä mana alli kay y mana yachaq kay mana alli kanqanta.
26 Tsaynöllami tantiyakushqä mañösa warmi wanuypitapis mas mantsaypä kanqanta. Tsay warmipa shonqunqa trampanömi y rikrankunapis waskanömi kaykan. Tayta Dios munanqannö kawaq runaqa tsay niraq warmipita witikunmi. Jutsa ruraq runami itsanqa tsay warmiwan kakun.†
27 Yachatsikuq karmi shumaq yarpachakunqäta kanan nishayki: 28 Kay patsacho imanir llapan päsanqankunata tantiyanäpä mayjina yarpachakurpis manami shumaq tantiyayta kamäpakütsu. Imanö kaptinpis tantiyashqä Tayta Dios munanqannö kawaq runakuna wallkalla kayanqantami. Juk waranqa (1,000) runakunapita jukllayllatami tarishqä Tayta Dios munanqannö kawaqta. Juk waranqa warmikunapitaqa manami ni jukllayllatapis tarishqätsu Tayta Dios munanqannö kawaqta.
29 Tsaynöllami tantiyakushqä jutsaynaq kawanantsikpä Tayta Dios kamamanqantsikta. Tsaynö kawanantsikpä kamashqa kaykarmi llutan rurayman churakashqantsik.