6
Kay patsacho mastapis mana allikunata maytsaychömi rikashqä. 2 Imaykayuqpis kananpä y respitashqa kananpä pitapis Tayta Dios yanapanqantami rikashqä. Tsaynö yanapaptinmi ima munanqantapis tarin. Tsaynö tarirpis manami kikinqa probichantsu, sinöqa jäpa runakunami imaykantapis probichayan.† Tsayqa kaykan pasaypa llakikuypämi.3 Aybësis cäsu kanmanmi juk runa juk pachak (100) tsuriyuq karpis y atska wata kawashqa karpis llakishqalla kawanqan y wanuptin shumaq mana pampayanqan. Tsay runapäqa mas allimi kanman karqan manarä yurir shullu wamranö wanukuptin. 4 Shullu wamraqa mas allimi kaykan manakaqllapä kashqa karpis, mana musyaylla pampashqa karpis, jutiynaqlla kashqa karpis, 5 atsikyay patsata mana rikashqa karpis y imata mana musyashqa karpis. 6 Tsay runa ishkay waranqa (2,000) wata kawashqa karpis kushishqa mana kawarqa shullu wamrapitapis peormi kaykan. Ishkanpis wanukuqllami kaykäyan.
7 Runaqa pachallanpämi qoyay qoyay arun. Tsaynö kaptinpis ministinqankunaqa manami imaypis ushakantsu. 8 Tsaynöllami yachaq y mana yachaq karpis, muchuq y imaykayuq karpis imallatapis ministintsik. 9 Tsaynö kaykaptinqa imatapis tsararanqantsikwan contentakushun. Tsayqa mas allimi kaykan “kayta wakta tsararäman” nir mana contentakunqantsikpitaqa. Tsaynö kawarqa wayrata tsariyta munaqnöllami kaykantsik.
10 Llapan päsanqantapis unaypitanami Tayta Dios kamakätsirqan. Imanö kanantsikpä kaqtapis Tayta Dios maynami destinarqan. Noqantsikpita mas munayyuq kaykaptinqa yarpanqannö kamakätsinqanpita Tayta Diospa contrankunata ama parlashuntsu. 11 Alläpa parlarqa mana conviëniqkunatami parlantsik. Tsaynö parlarqa manami imatapis jipintsiktsu.
12 Kay patsacho kawanqantsik llantuynö päsaqlla kaptin manami pipis musyantsu noqantsikpä ima mas alli kanqanta. Tsaynöllami pipis musyantsu wanukuptin kay patsacho ima päsananpä kanqanta.†