Tayta Diosta awninqantsikta cumplinantsikpä yätsinqan
5
(4.17) Tayta Diospa templunman aywar shumaq yarpachakunki tsaycho yachakunqaykita cäsukunaykipä. Mana tantiyakuq runakunanöqa ama kankitsu. Paykunaqa sacrificiuta aparpis Tayta Diosta manami cäsukuyantsu. Mana tantiyakuypami jutsata rurayan.2 (1) Llutallaqa Tayta Diosta imatapis ama awninkitsu. Ni yarpaynikillachöpis mana cumplinaykipä kaqtaqa ama awninkitsu. Payqa ciëluchömi kaykan y qamqa kay patsallachömi kaykanki. Tsaynö kaykaptinqa mejor upällakunki.
3 (2) Alläpa yarpachakuqkuna mana allitami suëñuyan.
Tsaynöllami alläpa parlaqkunapis manakaqkunata parlayan.†
4 (3) Mana tantiyakuq runaqa llutalla awnirmi Tayta Diosta ajanätsin. Tsaynö kaptinqa Tayta Diosta awninqaykita mana qonqaypa cumplinki.† 5 (4) Mana cumplinaykipä kaptinqa imatapis ama awninkitsu.
6 (5) Paqtä Tayta Diosta imatapis llutalla awnirkur sacerdötipa ñöpancho ninkiman: “Shumaq mana tantiyakuypami awnishqä. Manami cumpliyta puëdïtsu”.
Tsaynö nir Tayta Diosta ajanätsiptikiqa castigashunkimi.
7 (6) Runaqa munanqanta chaskinanpä yarparmi alläpa parlar llutalla imatapis awnikun. Qamqa Tayta Diospita mantsapakur tsaynö kaytsu.
Mana alli autoridäkuna kayanqan
8 (7) Maytsaychöpis muchuqkunata pasaypa ñakaykätsiqta rikar o mana alli autoridäkunata rikar ama mantsakaytsu. Autoridäkuna tsaynö llutanta rurayan mas munayyuq kaq autoridäkuna janan shäriptinmi. Y tsay munayyuq autoridäkunapapis mas mandaq autoridäkunami janan shäriyan. 9 (8) Tsay autoridäkuna mana allikunata ruraykäyaptinqa ¿nacionnintsik allitsakanqatsurä? Tsaynöpis ¿chakra runakunata rey yanapaykantsurä?
Arur tarinqantsik ushakaqlla kanqan
10 (9) Qellaypä ayrajashqa kaqkunaqa tarirpis manami contentakuyantsu. Imaykayuq runakunaqa imaykayuq karpis manami contentakuyantsu. Tsaynö kanqanpis manakaqllapämi kaykan.
11 (10) Imaykantsikkunapis atska kaptinqa masmi imaykachöpis ushantsik. Ministinqantsikpita masta tsarararpis manami ima provëchutapis jipintsiktsu, tsaypa trokinqa rikayllami rikaykuntsik.
12 (11) Arukuq runaqa wallkata o atskata mikurpis kushishqami punun. Imaykayuq runaqa imaykanpäpis yarpachakurmi punuytapis tarintsu.
13 (12) Kay patsachömi rikashqä imaykayuq runa imaykata qorinqanpis afanllanpä kanqanta. Tsayqa pasaypa llakikuypämi kaykan. 14 (13) Tsay runaqa mana alli negociuman jatikarmi llapan imaykantapis ushaskin. Tsaymi tsurinta jaqipänanpä imanpis kannatsu.
15 (14) Kay patsaman jinaylla shamunqantsiknöllami jinaylla aywakushun. Aywakurqa manami imaykantsiktapis apashuntsu.† 16 (15) Tsaynö kaykaptinqa ¿imapätä välin pasaypa ñakar arunqantsikpis? Tsayqa llakikuypämi kaykan. 17 (16) Tsaynöllami kawanqantsikyaqqa llakikurnintsik pasaypa yarpachakur, nanätsikur y qallayashqa kawantsik.
18 (17) Tsaynö kaykaptinqa noqapa tantiyaynïpita mikushun, upushun y kay kawaycho ñakar tarinqantsikkunata kushishqa gastashun. Tsaynö kawanqantsikmi päguntsik kaykan. 19 (18) Tsaynö kaptinqa Tayta Dios kamaripämanqantsikta mikur upur kushishqa kawashun. Tsaynö kushishqa kawanqantsikmi Tayta Diospa bendicionnin kaykan. 20 (19) Kushishqa kawanantsikpä Tayta Dios yanapamashqaqa manami yarpachakuntsiknatsu imayyaqlla kawanantsikpä kanqantapis.