4
Tsaypitanami rikashqä kay patsacho munayyuq runakuna qollmi shonqukunata ñakatsiyanqanta. Pipis mana shoqaptin y mana yanapaptinmi waqaykaqta rikashqä. 2 Tsaymi tantiyakushqä kawaq runakunapitapis wanukuq runakuna mas alli kayanqanta. 3 Wanukuqkunapitapis y kawaqkunapitapis mas allimi kaykan manarä yuriqkuna. Paykunaqa manami rikayanrätsu kay patsacho mana alli ruraykunata.4 Tsaynöllami rikashqä alli arukuqta chikipäyanqanta. Tsaynö karqa wayrata tsariyta munaqnöllami kaykantsik.
5 Runakunami niyan: “Mana tantiyakuq upa runaqa makin oqllashqalla kakurmi muchuyman char pasaypa ñakanqa”.
6 Noqami itsanqa nï: Atskata gänar mana jamaypa arunantsikpa trokinqa wallkallata gänarpis jamanqantsikmi mas alli kaykan. Mana jamaypa arurqa wayrata tsariyta munaqnöllami kaykantsik.
Japallan kay mana alli kanqan
7 Tsaypitanami mastapis rikashqä. Tsay rikanqäpis manakaqllapämi kaykan. 8 Rikashqämi wakin runakuna japallan kaykarpis tsuriynaq y wawqiynaq kaykarpis mana jamaypa arunqanta. Aykata gänarpis imaykayuq kaytami munan. Imaypis manami yarpachakuntsu pasaypa arunqankuna pipä jaqinanpä kanqanta y imanir alläpa ñakar arunqanta. Tsaynö alläpa ñakar arunqanpis manakaqllapämi kaykan.
9 Japallan arunanpa trokinqa ishkaq aruyanqanmi mas alli.
10 Ishkaq karqa juknin ishkiptinpis jukninmi shäritsin.
Japallan kaykar ishkiptinqa manami pïninpis kantsu shäritsinanpä.
Japallan runa ishkirqa kuyapaypämi kaykan.
11 Tsaynöllami juk cämallacho ishkaq punurqa qoñutsinakuyan.
Jukllaylla punurqa ¿imanöparä qoñunqa?
12 Jukllayllataqa maqar vincinmi.
Ishkaq kaptinmi itsanqa pipis vinciyta puëdintsu.
Waskapis kimsapashqaqa rasllaqa manami rachintsu.
Rey kaypis päsaqlla kanqan
13 Mana tantiyakuq y yätsinqanta mana chaskikuq awkin reypitaqa tantiyakuq chölumi imaynaq karpis mas alli kaykan. 14 Tsay chöluqa awkin reypa trokin yaykuptin carcelpita yarqushqa y ñakaqlla yurishqa kaptinpis 15 llapan runakunami janan yarquyan. 16 Rey kayman yaykunqan witsan atska runakuna janan karpis tiempu päsaskiptinqa paypapis contranmi rikakuyan. Llapan tsaykunapis wayrata tsariyta munaqnöllami kaykan.