Llapanpäpis tiemputa Tayta Dios kamakätsinqan
3
Kay patsachöqa llapanpis tiempuyuqllami kaykan.2 Tayta Diosmi tiemputa kamakätsin yurinantsikpä y wanunantsikpäpis.
Tiemputa kamakätsin murukunantsikpä y cosechanantsikpäpis.
3 Tiemputa kamakätsin wanutsinantsikpä y jampinantsikpäpis.
Tiemputa kamakätsin juchutsinantsikpä y shäritsinantsikpäpis.
4 Tiemputa kamakätsin waqanantsikpä y kushikunantsikpäpis.
Tiemputa kamakätsin lütunantsikpä y fiestata ruranantsikpäpis.
5 Tiemputa kamakätsin rumikunata jitanantsikpä† y qorinantsikpäpis.
Tiemputa kamakätsin makallanakunantsikpä y mana makallanakunantsikpäpis.
6 Tiemputa kamakätsin ashinantsikpä y oqranantsikpäpis.
Tiemputa kamakätsin churakunantsikpä y jitarinantsikpäpis.
7 Tiemputa kamakätsin rachinantsikpä y shillpanantsikpäpis.
Tiemputa kamakätsin upällakunantsikpä y parlanantsikpäpis.
8 Tiemputa kamakätsin kuyanantsikpä y chikinantsikpäpis.
Tiemputa kamakätsin guërrata ruranantsikpä y guërrata mana ruranantsikpäpis.
9 Mayjina arurpis ¿imatatä runa jipin? 10 Tsaynö kaptinpis tantiyakushqä runa arur kawananpä Tayta Dios kamakätsinqantami. 11 Paymi llapantapis tiempullancho kamakätsin.
Tsaynöllami mana ushakaq kaway kanqanta tantiyanantsikpä Tayta Dios kamakätsishqa. Manami tantiyayta kamäpakuntsiktsu qallaykunanpita ushananyaq Tayta Dios imata ruranqantapis.†
12 Tsaynö kaptinpis tantiyakushqä allita rurar kushishqa kawanqantsik mas alli kanqantami. 13 Tsaynöllami tantiyakushqä arunqantsikpita mikur y upur kushishqa kawanantsikta Tayta Dios munanqanta.
14 Tsaynöllami tantiyakushqä Tayta Dios llapan kamanqankuna imaypis tsaynölla kanqanta.† Kamanqankunamanqa manami imatapis yapantsiktsu ni tsaypita manami imatapis jipintsiktsu. Paypita mantsapakunantsikpämi llapantapis Tayta Dios tsaynö kamashqa.
15 Kanan päsanqannömi unaypis päsarqan.
Unay päsanqankunapis yapaymi päsanqa.
Ñöpata kanqannö yapay kananpämi Tayta Dios kamakätsin.
Kay patsacho mana allikuna kanqan
16 Kay patsachömi rikashqä autoridäkuna shumaq arreglayänanpa trokin chaskipakur jutsaynaq runapa contran shäriyanqanta. 17 Tsaymi shonqullächo nirqä: “Llapanpis tiempuyuqlla kaykaptinqa tiempu chämunqami alli runatapis y mana alli runatapis Tayta Dios juzgananpä”.†
18 Tsaymi shonqullächo yarparqä: “Runakunataqa Tayta Diosmi tantiyatsin uywakunanölla kayanqanta. 19 Runapapis y uywapapis tsayllami destïnun kaykan.† Llapanpis jamayyuqkunaqa wanuqllami kayan. Runapis uywapis ushakaqllami kaykan”.
20 Wanurqa llapantsikpis ushakäshunmi.
Llapantsiktapis allpallapitami kamamashqantsik.
Wanurqa llapantsikpis allpallamanmi kutishun.†