Tsaynö yarpachakur kawanqäpis manakaqllapämi kaykan. 2 Tsaymi kushikunqäpis y munanqäta ruranqäpis manakaqllapä kanqanta tantiyakushqä.

3 Tsaynöllami shumaq yarpachakuskir mana tantiyakuq runanö vïnuta upyarqä. Tsaynö upyarqä alli o mana alli kanqantapis tantiyanäpämi.

4 Tsaynöllami imayka obratapis ruratsishqä. Palaciukunatapis ruratsishqämi.^† Üvatapis atskatami plantatsishqä. 5 Jardinta ruraykurmi imayka niraq waytakunatapis plantatsishqä. Tsaynöllami tukuy casta frütakunatapis plantatsishqä. 6 Plantäkunata qarpatsinäpämi jatusaq pözukunata ruratsishqä.

7 Wätaykunatapis atskatami ollqutapis warmitapis rantishqä. Makïcho yuriq wätaykunapis kashqami. Jerusaléncho taq unay runakunapa wäkankunapita y üshankunapitapis mas atskami wäkäkuna y üshäkunapis kashqa. 8 Wakin reykunapata y wakin provinciakunapatami qorintapis qellaynintapis muntun muntun impuestuta cobrar qorishqä. Cantapämaqkunapis atskaqmi ollqupis warmipis kayashqa. Munanqäkunata rurarmi warmitapis atskaqta tsararashqä.^†

9 Jerusaléncho taq unay runakunapitapis mas reqishqa y imaykayuqmi kashqä.^† Imaypis tantiyakuqmi kashqä. 10 Imatapis shonqü munanqantaqa llapantapis kushishqami rurashqä. Tsay kushikunqämi pägü kashqa llapan ruranqäkunapita. 11 Tsaynö kaptinpis yarpachakurmi tantiyakushqä kay patsacho pasaypa ñakar ruranqantsikkuna manakaqllapä kanqanta. Tsaymi ruranqantsikkunaman yärakurqa wayrata tsariyta munaqnölla kaykantsik.

12 Noqa musyanqäpita mastaqa trokï yaykuq rey manami imatapis musyanqatsu. Tsaymi yachaq kay y mana yachaq kay imanö kanqantapis tantiyatsinäpä yarpachakushqä.

13 Yarpachakurmi tantiyakushqä paqaspita aktsi mas alli kanqannö tantiyakuq kay mas alli kanqanta. 14 Yachaq runaqa imatapis tantiyakunmi. Mana yachaq runami itsanqa tsakäpakushqanö kar imatapis tantiyantsu.

Tsaynö kaptinpis tantiyakushqämi yachaq y mana yachaq runapis ushakaqlla kanqanta. 15 Tsaymi yarpachakur nishqä: Mana yachaq runanölla noqapis wanunäpä kaykaptinqa yachaq kanqäpis ¿imapätä välin? Tsaymi tantiyakushqä yachaq kaypis manakaqllapä kanqanta. 16 Wanukuptinqa yachaqtapis y mana yachaqtapis qonqaskiyanqami. Yachaq runa y mana yachaq runapis ushakaqllami kaykäyan. 17 Tsayta tantiyaskirmi pasaypa llakikur ima ruraytapis munashqänatsu. Tsaykunata tantiyayta munar wayrata tsariyta munaqnöllami kaykantsik.

18 Tsaynöllami tantiyakushqä wanukuptï trokï yaykuq rey llapan ruranqäkunata probichananpä kanqanta. Tsayta tantiyakurmi pasaypa llakikushqä. 19 Kay patsacho pasaypa ñakar y shumaq tantiyakuskir ruranqäkunata tsararänanpäqa ¿yachaq runatsurä o mana yachaq runatsurä kanqa? Alli tantiyakushqaqa kay vïdacho llapan ruranqantsikpis manakaqllapämi kaykan.

20 Kay patsacho pasaypa ñakar ruranqäkuna ushakaqlla kanqanta tantiyakurmi shonqüpis nanayparä llakikurqan. 21 Shumaq yarpachakuykur arunqantsiktapis wanukurqa mana yanapamaqnintsikkunapämi jaqipaykuntsik. Tsaypis manakaqllapä y manami allitsu.

22-23 Runaqa qoyay qoyay pasaypa yarpachakullarmi kawan. Pasaypa ñakarmi arun. Aybësis punuytapis manami tarintsu. Tsaynö kaptinpis kay patsacho pasaypa ñakar arunqanpita ¿imatatä jipin? Tsaynö arunqantsikkunapis manakaqllapämi kaykan.^†

24 Tsaynö kaykaptinqa kawanqantsikyaq arur gänanqantsikwan kushishqa mikushun y upushun. Kushishqa kawanantsikpämi Tayta Dios kamamashqantsik. 25 Tayta Dios mana yanapamashqaqa manami pipis kushishqa kawanmantsu.

26 Kuyanqan kaqtami Tayta Dios yanapan tantiyakuq kananpä, yachaq kananpä y kushishqa kawananpä.^† Jutsa ruraq runatami itsanqa jaqiriykun. Tsaymi tsay runa arun alli runa probichanallanpä.^† Mayjina arurpis wayrata tsariyta munaqnöllami kaykan.