Eclesiastés
Yachatsikuq runa willakunqan
Llapanpis ushakaqlla kanqan
1
Kaychömi qellqaraykan yachatsikuq runa willakunqan. Payqa Davidpa tsurin karmi Jerusaléncho rey karqan. 2 Paymi yachatsikuq kar nirqan:“¡Imaykapis manakaqllapämi kaykan!
¡Kay patsacho päsanqankuna imanir y imapä kanqantapis manami tantiyayta kamäpakuntsiktsu!
3 ¡Imatatä runa jipin kay patsacho mayjina arurpis!
4 “Maytsaychömi wamrakunapis yuriykäyan y runakunapis wanuykäyan.
Tsaynö kaykaptinpis kay patsaqa kanqallanmi kaykan.
5 Rupaypis mana ajayaypami yarqamun y jeqan.
Yapay yarqamunallanpämi kanqanman kutin.
6 Tsaynöllami wayrapis sur kaqläpa aywaykur norti kaqläman kutin.
Mana takyaypami imaypis tumaykan.
7 Llapan mayukunapis lamarllamanmi aywayan.
Tsaynö kaptinpis lamarqa manami imaypis juntantsu.
Ñawin pukyukunapitami yaku yapay yarqamun.
Nirkurmi imaypis aywanqannö yapay raqrapa aywan.
8 Llapanpis tsaynölla kaptinmi pasaypa llakikü.
Pasaypa llakikunqätapis manami shumaq tantiyatsiyta kamäpakütsu.
Mayjina runa rikaptinpis rikananpä kaqkuna masrämi kaykan.
Atskata wiyaptinpis wiyananpä kaqkuna masrämi kaykan.
9 “Unay päsanqankunaqa yapaymi päsaykan.
Ñöpata rurakanqankunaqa yapaymi rurakaykan.
Kay patsachöqa llapanpis unay kanqannöllami kaykan.
10 Tsaynö kaptinmi wakinqa niyan:
‘¡Kaymi itsanqa imaypis kashqatsu!’
Tsaynö niyaptinpis noqami nï:
‘Noqantsik manarä yurishqa tsaypis maynami kashqa.
11 Unay runakuna rurayanqanpis qonqakashqanami.
Tsaynöllami kanan ruranqantsikpis qonqakanqa.
Qepa yuriq runakuna rurayanqanpis qonqakanqami’ ”.
Llapan ruranqantsikkuna manakaqllapä kanqan
12 Noqa yachatsikuqqa Jerusalénchömi Israel runakunapa mandaqnin rey karqä. 13 Tsaymi imaykata jaqiykur yarpachakushqä kay patsacho imanir llapan kanqankunata tantiyanäpä. Tsayta tantiyakunantsikpä Tayta Dios churamashqapis alläpa ajami kaykan. 14 Kay patsacho imanir llapan kanqankunata tantiyayta munarqa wayrata tsariyta munaqnöllami kaykantsik.
15 Imatapis wiksushqataqa manami derechayta kamäpakuntsiktsu.
Mana kaptinqa imatapis manami yupantsiktsu.
16 Shonqullächo yarpachakurmi tantiyashqä pïmaypitapis mas tantiyakuq kanqäta. Jerusaléncho noqapita mas ñöpa kaq reykunapitapis mas yachaqmi kä.† 17 Tsaymi yarpachakushqä alli ruraykuna y llutan ruraykuna imanö kanqantapis musyanäpä. Tsaynö kaptinpis tantiyakuyta munarqa wayrata tsariyta munaqnöllami kaykantsik.
18 Mas yachaq karqa masmi uma nanayta tarinqa.
Mas tantiyakuq karqa masmi llakikunqa.