Salmo 146 (145)
Tayta Diosta alabanqan
1 ¡Aleluya!
Llapan shonqüwanmi Tayta Diosta alabashä.
2 Kawanqäyaqqa imaypis Tayta Diostami alabashä.
Kay patsacho kanqäyaqqa salmukunata cantarmi alabashä.†
3 Ama yärakushuntsu munayyuq runakunamanqa.
Runalla karmi salvamäshuntsu.
4 Wanurnin kanqallanmi allpaman tikrayanqa.
Yarpäyanqankunata manarä rurarmi wanuyanqa.
5 Tayta Dios yanapanqan runa kushishqami kawanqa.
Payqa Tayta Diosllamanmi imay hörapis yärakun.
6 Tayta Diosmi ciëluta, kay patsata, lamarta y llapan tsaycho kaqkunatapis kamashqa.
Ninqantaqa imaypis cumplinmi.†
7 Ñakaycho kaykaq runakunata yanapanmi.
Mallaqaqkunapäpis mikuyta kamaripanmi.
Prësu kaykaqkunatapis Tayta Dios jipimunmi.
8 Qaprakunapa ñawintapis Tayta Dios kichanmi.
Desanimashqa kaykaq runakunatapis Tayta Dios shakyätsinmi.
Pay munanqannö kawaqkunataqa Tayta Dios kuyanmi.
9 Jäpa runakunatapis Tayta Dios rikanmi.
Waktsakunatapis viüdakunatapis yanapanmi.
Mana alli runakunatami itsanqa yarpanqanta mana rurayänanpä tsapata churapan.
10 Sión, Tayta Diosmi imayyaqpis rey kanqa.
Mandamaqnintsik reymi imayyaqpis kanqa.
¡Aleluya!