Salmo 147 (146—147)
Tayta Diosta alabanqan
1 ¡Aleluya!
Kushikuypämi kaykan salmukunata cantar Tayta Diosnintsikta alabanqantsik.
Payta alabarqa kushikuntsikmi.
2 Tayta Diosmi Jerusalénta yapay shäriykätsin.
Israel runakunatapis maytsaypitami qoriykämun.
3 Llakishqa kaykaqkunatami shoqan.
Qerinkunatapis jampinmi.
4 Qoyllurkuna ayka kayanqantapis musyanmi.
Llapan qoyllurkunatapis jutinpami reqin.
5 Tayta Diosqa pasaypa munayyuqmi kaykan.
Paypa yachayninqa mana ushakaqmi.
6 Muchuqkunatapis Tayta Diosmi yanapan.
Mana alli runakunatami itsanqa penqakuyman churan.
7 Tayta Diosta agradëcikurnin alabashun.
Arpata tukayllapa salmukunata cantar Tayta Diosnintsikta alabashun.
8 Paymi ciëlutapis pukutaywan tsapaskin.
Paymi tamyatapis tamyatsimun.
Qewakunatapis jirkakunachömi wiñatsimun.
9 Paymi uywakuna mikuyänanpäpis qewata wiñatsimun.
Pushapa ankakuna mallaqar waqayaptinpis mikuytami qaran.
10 Manami guërrapä cawallukunata rikartsu Tayta Dios kushikun.
Manami pelyayta yachaq soldädukunata rikartsu kushikun.
11 Tsaypa trokinqa paypita mantsapakushqami kushikun.
Tsaynöpis kushikun kuyakuq kanqanman yärakushqami.
12 ¡Jerusaléncho taqkuna, Tayta Diosta alabayay!
¡Sióncho taqkuna, Tayta Diosta alabayay!
13 Paymi markaykipa punkunkunata jinchi wichqan.
Markaykicho taqkunamanmi bendicionninta churan.
14 Lindëruykita respitatsiptinmi añaw taykäyanki.
Mikuyniki atska kananpämi bendicionninta churamun.
15 Tayta Diosmi kay patsa imanö kananpäpis mandan.
Mandaptinmi juklla cumplin.
16 Paymi yuraq bayëta mashtaykushqatanörä rashtatapis rashtatsimun.
Qajapatapis uchpa mashtashqatanörämi warätsimun.
17 Tayta Diosmi runtu tamyatapis rumitanörä tamyatsimun.
Tsaymi mana atipaypä alan.
18 Tayta Dios niptinmi tsururupis tsullun.
Paymi wayratapis wayrätsimun y yakutapis aywatsin.†
19 Jacobpita aywaraqkunatami palabranta musyatsirqan.†
Israel runakunatami estatütunkunata y ninqankunata musyatsirqan.
20 Tsaynöqa wakin nacionkunata manami musyatsirqantsu.
Paykunaqa manami imaypis Tayta Dios ninqanta musyayashqatsu.
¡Aleluya!