Salmo 145 (144)
Tayta Diosta alabanqan
(1a) David qellqanqan alabanzami.
1 (1b) Tayta Diosllä, mandamaq reyllä, imaypis alabashaykimi.
Imayyaqpis jutikita joqarirmi agradëcikushayki.
2 Qoyay qoyaymi alabashayki.
Imayyaqpis jutikita joqarirmi alabashayki.
3 Llapanpä munayyuqmi kanki.
Cantukunata cantarmi adorashayki.
Munayyuq kanqaykiqa mana tantiyaypämi kaykan.
4 Tsurïkunatapis milagru ruranqaykikunapitami willapäshä.
Paykunapis mantsakaypä ruranqaykikunapitami tsurinkunata willapäyanqa.
5 Munayyuq y mantsakaypä kanqaykitami imaypis yarparäshä.
Kushikuypä ruranqaykita manami qonqäshätsu.
6 Munayyuq kanqaykitami willakushä.
Munaynikiwan ruranqaykikunatami pïmaypis parlayanqa.
7 Kuyakuq kanqaykitami maychöpis willakuyanqa.
Allillata ruranqaykipitami cantarnin alabayäshunki.
8 Tayta Diosqa alli shonqu y kuyapäkuqmi.
Kuyakuq karmi jukllaqa ajanantsu.
Kuyakuyninqa manami imaypis ushakantsu.†
9 Tayta Diosqa pïmaypäpis allitami ruran.
Llapan kamanqantami kuyar rikan.
10 Tayta Dios, llapan kamanqaykikunapis alabaykuyälläshuy.
Munanqaykinö kawaqkuna llapanpis adoraykuyälläshuy.
11 Alli mandaq kanqaykipitami parlayanqa.
Mantsakaypä ruranqaykikunatami willakuyanqa.
12 Tsaynöpami munayyuq kanqaykita kay llapan patsachöpis musyayanqa.
Munaynikiwan mandanqaykitami pïmaypis musyayanqa.
13 Rey kanqaykiqa mana ushakaqmi kaykan.
Imayyaqpis mandaqmi kaykanki.
Awninqaykitaqa imaypis cumplinkimi.
Ruranqaykiqa llapanpis allimi kaykan.
14 Desalentädukunatapis shakyätsinkimi.†
Llakishqa kaykaqkunatapis kushikatsinkimi.
15 Llapan kawaqkunami qamta shuyäyäshunki hörancho mikuyta qaranaykipä.
16 Kuyaparmi llapan kawaqkunapäpis bendicionnikita churamunki.
17 Tayta Dios ruranqankuna llapanpis allimi kaykan.
Kuyakuq karmi imatapis allillata ruran.
18 Llapan shonqunwan mañakuqkunapa ñöpanchömi Tayta Dios kaykan.
19 Paypita mantsapakuqkunataqa imata munayanqantapis kamaripanmi.
Ausiliuta mañakuyaptinqa jukllami salvan.
20 Kuyar cäsukuqkunataqa rikanmi.
Mana alli runakunatami itsanqa ushakätsin.
21 Noqaqa Tayta Diostami alabashä.
Pïmaypis jutinta joqarir imaypis alabayätsun.