Salmo 144 (143)
Tayta Diosta agradëcikunqan
(1a) David qellqanqan.
1 (1b) Imapitapis tsapämaq Tayta Dios alabashqa kaykullätsun.
Paymi guërracho pelyanäpä yanapaman.
2 Paymi kuyamaqnï y imapitapis tsapämaqnï.
Paymi amparakunä y salvamaqnï.
Escüdunö tsapämaptinmi payman yärakü.
Llapan nacionkunata vincinäpäpis paymi yanapaman.
3 Tayta Dios, ¿imanatä runa kaykan tsayjinanpa paypä yarpachakunaykipä?
¿Imanatä runa kaykun tsayläya kuyaykunaykipä?†
4 Jamaynöllami runaqa kaykan.
Kawayninpis llantuynö päsaqllami kaykan.
5 Tayta Dios, ciëluta kichaskir uraykallämuy.
Qoshni shärinanpä jirkakunata yataykullay.
6 Chikimaqnïkuna mantsarir qeshpiyänanpä maqakatsimur flëchaykikunawan atacaykullay.
7 Yanapamänaykipä ciëlupita patsa shamuykullay.
Lamar yaku junishpa junishpa pulchaqyaykaqchönö kaykanqäpita jipiykallämay.
Jäpa runakunapa makinpita salvaykallämay.†
8 Tsay runakunaqa llullakuyllaman churakashqami kaykäyan.
Derëcha kaq makinta joqarirpisa llullakuyanmi.
9 Tayta Dios, mushuq cantuta cantarmi alabashayki.
Chunka cuerdayuq arpata tukayllapami salmukunata cantar alabashayki.
10 Qammi chikiqninkunata vinciyänanpä reykunata yanapanki.
Espädawan mana wanutsinanpämi sirvishuqniki Davidtapis salvanki.†
11 Jäpa runakunapa makinpita salvaykallämay.
Tsay runakunaqa llullakuyänallanpämi yarpachakuykäyan.
Derëcha kaq makinta joqarirpis llullakuyanmi.
12 Ollqu tsurïkuna kuyayllapä jatusaq jachakunanörä alli wiñaykuyällätsun.
Warmi tsurïkunapis palaciuta adornaraq columnakunanörä kaykuyällätsun.
13 Wayïkunachöpis imaykaläya mikuykuna junta kaykullätsun.
Chakräkunaman juntaqpä uywäkuna waranqanpa miraykuyällätsun.
14 Törükunapis aruyänanpä sänu kaykuyällätsun.
Täyanqä marka murällakunapis ama juchuykullätsuntsu.
Cällikunachöpis mantsariypita pipis ama qayarätsuntsu.†
15 Tsaynö kawayänäpä yanapamaptikimi kushishqa kawayäshä.
¡Tayta Diosman yärakuq runakuna kushishqami kawayan!†