Salmo 143 (142)
Tayta Diosman yärakur mañakunqan
(1a) David qellqanqan salmu.
1 (1b) Tayta Dios, mañakamunqäta wiyaykallämay.
Rugakamunqäta awniykallämay.
Awnimanqaykita cumpliq kaykarqa yanapaykallämay.
2 Musyankimi llapan runakunapis jutsayuq kayanqanta.
Sirviqniki karmi mañakamü mana castigamänaykipä.
3 Wanutsiyämayta munarmi chikimaqnïkunaqa tumapaykäyäman.
Wanushqatanömi juklla pampayämayta munaykäyan.
4 Pasaypa llakishqami kaykä.
Shonqüpis ushakaykannami.
5 Unay ruranqaykikunatami yarparkü.
Mantsakaypä ruranqaykikunapämi yarpachakü.
6 Makïta joqarkurmi mañakamü.
Tsaki allpa yakuta ministinqannömi noqapis qamta ministï.† Selah
7 Tayta Dios, jamanï manarä ushakanqanyaq juklla parlapaykallämay.
Noqapita ama pakakuykullaytsu.
Pakakuptikiqa wanushqanöchi rikakushä.
8 Taytay, llapan shonqüwanmi yärakamü.
Kuyakuq kanqaykita tutapa musyaykatsillämay.
Imata ruranäpä kaqtapis tantiyaykatsillämay.
9 Tayta Dios, qamman amparakaykämuptïqa chikimaqnïkunapita tsapaykallämay.
10 Tayta Diosnïmi kaykanki.
Munanqaykinö kawanäpä yanapaykallämay.
Allikunata ruranäpä Espïrituyki tantiyaykatsillämätsun.
11 Tayta Dios, munayyuq kanqaykita pïmaypis musyananpä yanapaykallämay.
Alli ruraq kaynikiwan kay llakikuypita jipiykallämay.
12 Kuyapämar conträkunata ushakaykatsillay.
Kawaykaqta ama jukllayllatapis kachaykullaytsu.
Taytay, qampa munaynikichömi kaykä.