Salmo 142 (141)
Tayta Dios yanapaykunanpä mañakunqan
(1) Machaycho pakakunqanta yarparmi kay salmuta David qellqarqan.†
1 (2) Tayta Dios, llapan kallpäwanmi mañakamü yanapamänaykipä.
Llapan shonqüwanmi rugakamü kuyapämänaykipä.
2 (3) Ima päsamaptinpis qamtami willä.
Llakikunqätapis qamtami willä.
3 (4) Pasaypa llakishqa kaykaptïpis qammi kushikatsimarqayki.
Purikunä näniman trampata churaqnömi mana alli runakuna llutankunaman ishkinäta munayan.
4 (5) Amïgüpis manami kantsu shakyätsimänanpä.
Pïnïpis manami kantsu janä shärinanpä.
Noqataqa manami pipis yarpämantsu.
5 (6) Tayta Dios, qamta mañakurmi nï:
“Kay patsacho qamllami herenciä y tsapämaqnï kanki”.
6 (7) Mañakamunqäta wiyaykallämay.
Kallpäpis ushakaykannami.
Chikimaqnïkunapa makinpita tsapaykallämay.
Paykunaqa noqapita mas kallpasapami kayan.
7 (8) Carcelcho kaykaqnömi kaykä.
Jutikita joqarir alabanäpä jipiykallämay.
Yanapamanqaykipita kushikurmi yärakamuq mayïkunawan alabashayki.