Salmo 141 (140)
Jutsata mana rurananpä Tayta Diosta mañakunqan
(1a) David qellqanqan salmu.
1 (1b) Tayta Dios, qamtami mañakamü.
Yanapamänaykipä shamuykullay.
Rugakamuptï juklla yanapaykallämay.
2 Mañakamunqäpis inciensiunö ñöpaykiman chaykallämutsun.
Makïta joqarkur rugakamunqäpis tardipa rupatsinqan sacrificiunö kaykullätsun.†
3 Tayta Dios, llutanta mana parlanäpä shimïta tsapaykullay.
Mana allikunata mana parlanäpä imaypis yanapaykallämay.
4 Llutanta shonqü mana yarpänanpä tantiyaykatsillämay.
Jutsa ruraqkunawan tsay yarpaylla kanäta ama munaykullaytsu.
Paykunawan mikur upur kanätapis ama munaykullaytsu.
5 Alli runa corrigimar asutamaptinpis chaskikümi.
Yätsimanqantami cäsukü.
Jutsa ruraqkuna yätsiyämanqantaqa manami wiyaytapis munätsu.
Paykunata castigananpämi Tayta Diosta imaypis mañakuykä.
6 Mandaqninkunataqa imayka desgraciami päsanqa.
Tsayrämi tantiyakuyanqa noqa willakunqä rasun kanqanta.
7 Chakrata yapyayaptin kurpakuna mashtaräyanqannömi tullunkunapis panteonkunacho mashtaräyanqa.
8 Tayta Dios, qamllamanmi yärakamü.
Ama kachaykallämaytsu.
9 Mana alli runakuna trampata churapäyämanqanman mana jeqanäpä tsapaykallämay.
10 Trampata churapäyämanqanman kikinkuna jeqayätsun.
Noqataqa salvaykallämay.