Salmo 140 (139)
Mana alli runakunapita tsapänanpä Tayta Diosta mañakunqan
(1) Cantaqkunapa mandaqninpämi. David qellqanqan salmu.
1 (2) Tayta Dios, mana alli runakunapita tsapaykallämay.
Wanutsikuq runakunapita salvaykallämay.
2 (3) Paykunaqa llutanta rurayänallanpämi imaypis yarpachakuyan.
Qoyay qoyaymi pïmaytapis wajupar puriyan.
3 (4) Paykunapa shiminkunaqa culebrapa lanzëtannörämi kaykan.
Parlayanqankunapis culebrapa venënunnömi kaykan.† Selah
4 (5) Tayta Dios, mana alli runakunapita tsapaykallämay.
Wanutsikuq runakunapita salvaykallämay.
Paykunaqa jutsata ruratsiyämänanpämi willanakuykäyan.
5 (6) Runa tukuq karmi trampata churapäyämashqa.
Imaykanöpapis desgracia päsamänantami munaykäyan.
Maypa aywaptïpis trampatami churapäyäman. Selah
6 (7) Tayta Diostami mañakü:
“Diosnïmi kaykanki.
Mañakamunqäta wiyaykallämay” nir.
7 (8) Munayyuq Tayta Dios, salvamaqnïmi kanki.
Conträ shäriyaptinpis tsapämankimi.
8 (9) Tayta Dios, mana alli runakuna llutankunata imatapis rurayänanta ama munaykuytsu.
Yarpäyanqanpis ama kamakaykullätsuntsu.
Manatsayqa runa tukuyanqami. Selah
9 (10) Chikimaqnïkuna maldicionayämanqanqa kikinkunaman chätsun.
10 (11) Paykunaman rawraykaq shansha ishkimutsun.
Ninamanpis jitashqa kayätsun.
Imaypis mana yarqayämunanpä sinigaman jatikäyätsun.
11 (12) Wasarimakunaqa kay patsacho ama mirayätsuntsu.
Maqakuq yaqa runakunataqa ima desgraciapis päsatsun.
12 (13) Tayta Dios, musyämi ñakaqkunata yanapar justiciata ruranqaykita.
Imaynaqkunapa jananmi shärinki.
13 (14) Alli ruraq runakunami jutikita joqarir alabayäshunki.
Munanqaykinö kawaq runakunami ñöpaykicho kawayanqa.