Salmo 139 (138)
Tayta Dios llapanta musyanqanpita alabanqan
(1a) Cantaqkunapa mandaqninpämi. David qellqanqan salmu.
1 (1b) Tayta Dios, imanö kanqätapis musyankimi.
2 Musyankimi imay jamanqäta y imay shärinqätapis.
Karupitami yarpanqäkunatapis musyaykanki.
3 Tuta shärikunqäpita paqas pununqäyaqmi llapan ruranqätapis musyaykanki.
Maypa aywaptïpis rikaykämankimi.
4 Tayta Dios, manarä parlaptïmi imata ninäpä kanqantapis musyaykanki.
5 Maycho kaptïpis rikaykämankimi.
Makikiwanmi tsapaykämanki.
6 Tsaynö kanqaykiqa pasaypa kushikuypämi.
Manami imanöpapis tantiyayta kamäpakütsu.
7 Espïrituyki rikaykämaptinqa ¿mayllamanrä pakaküman?
Ñöpaykipita ¿mayllamanrä qeshpïman?
8 Qoyllurkuna kaqman witsaptïpis tsaychömi kaykanki.
Patsa ruriman pakakuptïpis tsaychömi kaykanki.
Maycho kaykaptïpis derëcha kaq makikiwanmi jancharaykämanki.
Tsakaypapis junaqpanöllami rikaykanki.
Paqaspis junaqpis qampäqa iwalllami kaykan.†
13 Qammi mamäpa pachancho llapan cuerpüta kamamarqayki.
14 Espantaypä kamamanqaykipitami alabä.
Ruranqaykikunaqa pasaypa kushikuypämi kaykan.
Tsaynö kanqantami llapan shonqüwan criyï.
15 Mamäpa pachancho kaykaptï pipis manami rikamashqatsu.
Tullükuna yurinqanta qamllami rikashqayki.
Patsa rurinchönöpis mana rikakayllami kamamarqayki.
16 Tsayrä rurakaykaptïmi rikamashqayki.
Manaräpis juk junaqyuq kaykaptïmi ayka wata kawanäpä kanqantapis libruykiman mayna qellqarqayki.
17 Tayta Dios, noqapä yarpanqaykikunaqa pasaypa kushikuypämi.
Tsay yarpanqaykikunaqa atskami kaykan.
18 Yupayta munaptïpis aqushapita mas atskami kaykan.
Pununqäpita rikcharkurpis qamwanmi imaypis kaykä.
19 Tayta Dios, mana alli runakunataqa llapanta ushakaykatsillay.
Wanutsikuq runakunata ñöpäpita qarquykullay.
20 Paykunami contrayki parlaykäyan.
Jutikitapis llutallami joqariyan.
21 Tayta Dios, musyankimi chikishuqnikikunata rikaytapis mana munanqäta.
Mana cäsukushuqnikikunata pasaypami ajanapä.
22 Paykunata pasaypami chikï.
Paykunaqa noqapapis conträmi kaykäyan.
23 Tayta Dios, imanö kawanqätapis rikaykullay.
Shonqü allita o mana allita yarpanqantapis musyaykullay.†
24 Yarpanqäpis, parlanqäpis o ruranqäpis mana alli kaptinqa tantiyaykatsillämay.
Qamwan imayyaqpis kawanäpä yachaykatsillämay.