Salmo 138 (137)
Tayta Diosta agradëcikunqan
(1a) David qellqanqan salmu.
1 (1b) Llapan shonqüwanmi alabashayki.
Salmukunata cantarmi ciëlucho munayyuq kaqkunapis wiyayänanpä alabashayki.
2 Qamman y palabraykimanqa manami imapis tinkuntsu.
Tsaymi santu templuyki kaqläpa qonqurikuykur alabashayki.
Kuyapäkuq kanqaykipita y awninqaykita cumpliq kanqaykipitami alabashayki.
3 Mañakamuptïmi wiyamarqayki.
Shakyätsimarmi kallpata qomarqayki.
4 Tayta Dios, palabraykita wiyarmi kay patsacho llapan reykunapis alabayäshunki.
5 Ruranqayki alli kanqanta tantiyarmi kushikurnin alabayäshunki.
Pasaypa munayyuq y kuyapäkuqmi kaykanki.
6 Tayta Dios, ciëlupita patsami llampu shonqu runakunata yanapaykämunki.
Allish tukuqkunataqa manami cäsupankitsu.
7 Ñakaptïpis qammi yanapamanki.
Chikimaqnïkuna pasaypa ajar conträ shäriyaptinpis derëcha kaq makikiwanmi tsapämanki.
8 Tayta Dios, noqapä yarpanqaykitami imaypis cumplinki.†
Imaypis kuyamankimi.
Kuyaykämarqa ama kachaykallämaytsu.