Salmo 137 (136)
Babiloniacho llakikuyanqan
1 Babiloniacho kaykaq mayukuna kuchunman jamaykurmi Siónpä yarpaskir waqarqantsik.†
2 Cantanantsikpä gänasnintsik mana kaptinmi arpantsikkunatapis sauciman warkurqantsik.
3 Prësu apamaqnintsikkunami cantanantsikpä nimarqantsik.
Tsay runakunaqa kushishqa kanantsiktami munayarqan.
Tsaymi nimarqantsik:
“Sióncho kaykar cantayanqaykita cantapäyämay”.
4 Jäpa nacioncho kaykarqa ¿ima gänaswanrä Tayta Diosta alabashwan?
5 ¡Ay Jerusalén, Jerusalén!
Qamta qonqaptïqa derëcha kaq makïpis tsakikäkutsun.
6 Qamta mana yarpaptïqa y jutikita mana joqariptïqa qallüpis tsakir palagarnïman laqakätsun.
7 Jerusalén markata atacayaptinmi edomita runakuna qayaykachar niyarqan:
“¡Ushakätsiyay! ¡Ushakätsiyay!
¡Wayinkunatapis cimientuntinta ushakätsiyay!”
Tayta Dios, tsaynö niyanqanpita juzgaykullay.†
8 ¡Babilonia marka!
Qamtapis ushakätsiyäshunkimi.
Ñakatsiyämanqaykipita ushakätsishuqnikikuna kushishqa kawayätsun.†
9 Wamraykikunata rumikunaman tsapiqkunapis kushishqa kawayätsun.